یه‌كگرتووی ئیسلامی گه‌وره‌تر مه‌كه‌ن...

به‌شدار علی

ئه‌گه‌ر مامه‌ڵه‌ی پارتی و یه‌كێتی نه‌بوایه‌،خه‌ڵكی كوردستان هه‌رگیز ئاشنایه‌تی له‌گه‌ڵ ئه‌و حیزبه‌ ئیسلامیانه‌ نه‌ده‌بوو،ئه‌گه‌ر برسیه‌تی و نه‌بونی و شه‌ڕ و كوشتار و ناعه‌داڵه‌تی پارتی و یه‌كێتی نه‌بوایه‌،ئیستا ئیسلامیه‌كانیش نه‌ده‌بونه‌ ئه‌و هێزه‌ كه‌ هه‌ره‌شه‌ له‌هه‌موو تازه‌گه‌رییه‌ك بكه‌ن.ئه‌وه‌ ده‌سه‌ڵاتی سیاسی بوو له‌به‌ر به‌رژه‌وه‌ندی و راگرتنی ته‌وازنی سیاسی هاوكاری و پشتتگیرییان كردن و چاویان

له‌ تیرۆر و كاره‌ تێكده‌ره‌ییه‌كانیان نوقاند و فه‌رشی سوریان بۆ راخستن و له‌ هه‌موو ئیمكانیاتێك به‌هره‌مه‌ندیان كردن،هه‌ر هه‌فته‌ی رابردوو به‌هۆی فشاری حیزبه‌ ئیسلامیه‌كان گۆڤاری (خه‌ڵك)یان داخست.

قسه‌كردنێكی زۆری میدیای پارتی ئه‌م رۆژانه‌ زوومه‌كانیان روو له‌ یه‌كگرتووی ئیسلامیه‌،به‌ڵام به‌ قازانجیان ته‌واو ده‌بێت و فرسه‌ت وه‌رده‌گرن بۆكوتانه‌وه‌ی هه‌موو به‌ها ئه‌خلاقی و مرۆڤایه‌تیه‌كانی كۆمه‌ڵگا كه‌ له‌گه‌ڵ بیركردنه‌وه‌ی ئه‌وان ناكۆكه‌.

 پێویستی به‌ فه‌لسه‌فه‌ و مێژوو و لێكۆڵینه‌وه‌ و به‌دواداچون نیه‌ تا له‌ راستیه‌كان تێبگه‌ین،كاتێك كه‌ ده‌سه‌ڵاتیان ره‌ها بوو،سه‌دان مرۆڤیان ته‌نها له‌سه‌ر ووتنی ووشه‌ی ماف و ئازادی و یه‌كسانی، سه‌ریان له‌لاشه‌ جیاكرده‌نه‌وه‌ و مه‌حكومیان كردن به‌ مه‌رگ،نوسه‌ران و رۆشنبیران نه‌یانتوانی له‌به‌ر فتوای ئیسلامیه‌كان بۆچونه‌كان له‌سه‌ر قێزه‌وه‌نترین دیارده‌ ده‌رببڕن،تێزابیان كرد به‌ قاچی و ئه‌و كچانه‌ی جلی مه‌ده‌نیان پۆشی و خه‌ڵكیان له‌دژیان هاندا،تا ئیستاش كادیران و لایه‌نگرانیان له‌ مینبه‌ری مزگه‌وته‌كاندا هه‌ره‌شه‌ ده‌كه‌ن و خوێنی ئه‌و خه‌ڵكانه‌ حه‌ڵاك ده‌كه‌ن كه‌ وه‌كو ئه‌وان بیرناكه‌نه‌وه‌،خراپی گوزه‌رانی خه‌ڵكیان به‌ فرسه‌ت زانی و پێدانی چه‌ند كیلۆیه‌ك ئارد و برنج و پێدانی چه‌ند پۆلێكی وه‌رگیراو له‌ وڵاتانی ئیسلامی و كه‌نداویان كرده‌ مه‌رجی له‌ چادر هه‌ڵكێشانی كچان و مناڵان و راكێشانیان بۆ نێو حوجره‌كانیان و شۆرینه‌وه‌ی مێشكیان به‌ خورافیات،مزگه‌وته‌كانیان كرده‌ شوێنی سرینه‌وه‌ و پلان دانان بۆ ئه‌و ده‌نگ و ره‌نگانه‌ی له‌ خۆیان جیاوازن،به‌رگریان له‌ بۆگه‌نده‌رترین سیسته‌می په‌روه‌رده‌ و فێركردن كرد بۆ به‌رهه‌م هێنانی نه‌وه‌یه‌كی یه‌خسیر و گوێرایه‌ڵ و بێ‌ بیركردنه‌وه‌،له‌ هه‌وڵدان بۆ هێشتنه‌وه‌ی یاساو ده‌ستورێك كه‌ به‌ ئاشكرا شه‌رعیه‌ت ده‌دا به‌ پله‌دوویی و ژێرده‌سته‌ی ئافره‌تان،..هه‌موو ئه‌مانه‌ش به‌ ئیجازه‌ و له‌ژێر چاودێره‌ ده‌سه‌ڵاتی سیاسی و پارتی و یه‌كێتی ئه‌نجامدران.

وێرانی وه‌زعیه‌ته‌كه‌ لێره‌وه‌یه‌،حیزبێكی ئیسلامی وه‌كو یه‌كگرتوو كه‌ هه‌موو به‌رنامه‌ و پرۆگرامه‌كانیان له‌ ئه‌لفه‌وه‌ تاكو یائی ناكۆكه‌ له‌گه‌ڵ سه‌ره‌تاترین ماف و ئازادییه‌كانی تاك و به‌هره‌مه‌ند بوون له‌ ژیانێكی به‌خته‌وه‌ر بۆ به‌شه‌ره‌كان، هه‌میشه‌كار له‌سه‌ر دورست كردنی جیاوازی و مانه‌وی هه‌ژاری و برسیه‌تی و تیرۆر و تۆقاندن و ته‌قاندنه‌وه‌ و مل په‌ڕاندن و ناكۆكی سه‌رگه‌ردانی خه‌ڵك ده‌ده‌ن،كه‌چی ئیستا و وه‌كو فریادڕه‌س خۆیان ده‌ناسێنن و باسی مافی و ئازادی ده‌كه‌ن !!!

دابینكردنی خزمه‌تگوزارییه‌كان و فه‌راهه‌مبونی ژیانێكی نۆرماڵ بۆ تاكه‌كان،كۆتایهێنان به‌ بێكاری و نه‌بونی و شه‌ڕ و ئاژاوه‌ و ناشه‌فافی و دابه‌شكردنی سه‌روه‌ت و سامان به‌ یه‌كسانی،رزگاربوون له‌ سه‌رگه‌ردانی و پێكهێنانی ده‌وڵه‌تێكی مه‌ده‌نی بۆ خه‌ڵكی كوردستان،ده‌توانێ‌ زۆرێك له‌هێزی نه‌خوازراو له‌ گۆره‌پانی كوردستان كاڵ بكاته‌وه‌،هه‌ر ئه‌مه‌ش رێگای كارساز نه‌ك هێرش و په‌لاماردانی ناڕه‌وا و دورستكردنی ژینگه‌ی ترس و تۆقاندن.چونكه‌ ئه‌م وه‌زعیه‌ته‌ به‌ قازانجی ئه‌وان ته‌واو ده‌بێت.