بۆ ئەو دەستە نابڕن..؟!

بەشدار على

ئێوە سەیرى ئەو بەدبەختیە بکەن،خەڵک بۆ ئاو و کارەبا و سوتەمەنى هاتنە سەر جادە،کەچى دەسەڵاتى سیاسى و دەزگا ئەمنیەکانى کوردستان بە تێکدەر و لە پشتەوەبونى (دەستێک) تۆمەتبار یانکردن،خەڵک چیتر تەعەمولى بینینى ناعەدالەتیەکانى نەماوە کە رۆژ لەدوایى رۆژ کێرڤەکەى بەرزدەبێتەوە داواى سەرەتاترین مافى خۆى دەکات،

کەچى ناوى خائین و لە پشتەوەبونى (دەستێک) تۆمەتبارکران،خەڵکى پیرەمەگرون دوو دەیە زیاترە ئاوى پاکیان لێ بۆتە حەسرەت و مناڵەکانیان لەنێو قوڕ و لیتەى زستانان و تۆز و خۆڵى هاوینان دووچارى دەیان پەتا و نەخۆشى و کارەسات هاتون و لەتاوان هاتونەتە سەر جادە و داوایى کەمترین و سادەترین پێداویستیەکانى ژیانى نورماڵى ئینسانەکان دەکەن،کەچى دەسەڵاتى سیاسى بە لە پشتەوەبونى (دەستێک)تۆمەتبارى کردن و رەوانەى زیندانەکانی کردن،پەیامەکەى خەڵکى پیرەمەگرون روون بوو،گووتیان ئێمەش دەمانەوێت گوزەرانێکى نۆرماڵمان هەبێت و لەبرسان نەمرین،نەک ژیانى شاهانەى وەکو ئێوە،گوتیان ئێمە کۆشک و تەلارەکانى ئێوە دەبینین،بەڵام ئێوە کەلاوەکانى ئێمە نابینن !
ئەوە ئەوپەڕى سوکایەتیە بەرامبەر بەخەڵک،سەروەت و سامان و هەموو مافێکى خەڵک بۆ خۆت ببەیت و لە هەموو سیما و روخسارێکى ژیانى بەشەرى بێبەشیبکەیت و کەچى لەکاتى نارەزایەتیش بە خائین و تێکدەر و نۆکەرى بێگانە تاوانبارى بکەیت و رەوانەى زیندانەکانیان بکەیت،ئەو مامەڵانە لە قاموسى دەسەڵاتێک جێگاى نابێتەوە کو ئۆزقاڵێک نزیکایەتى بە ماف و ئازادییەکانەوە هەبێت.
دوو دەیەیە ئەو وڵاتە لەبەردەستاندایە و بەنرخترین سامانى سروشتى هەیە و دەکرا ئەوەى خەونە ببێت بەراستى، ئایا ئێوە دەستتان لە پشتە کە ئاو و کارەبا و رێگاوبان بۆ خەڵک دابین ناکەن یان خەڵکى قوڕبەسەرى پیرەمەگرون؟(دەستێک) لە پشتەوەى بەرزرکردنەوەى کۆشک و ڤێلا و ئاپارتمانەکانى خۆتان و مناڵ و دەست و پێوەندەکانتانە؟(دەستێک) لە پشتەوەى ئەوەیە سەرەتاترین پێداویستیەکانى پزیشکى بۆ خەڵک دابین نەکەن و سوککترین دەرد و بەڵا دەیان و سەدان قوربانى لێبکەوێتەوە؟ئەوە (دەستێک) لە پشتەوەى ئەوەیە مناڵان لەنێو تاریکى و نەزانین بهێڵنەوە و مێشکیان بە خورافیاتى مەزهەبى و کۆنترین فەرهەنگ بشۆنەوە ،ئێوە شارەزاى و ئەزموونى باشتان لەرێگا تاران و ئەنقەرە و واشنتن و بەرلین و رێگا شاراوەکانى تر هەیە،نەک خەڵکى کوردستان! ئەوە خەڵک نەبوە دەستى وڵاتانى دراوسێ و ناوچەکە و جیهانى بۆ ناو کوردستان راکێشابێت،ئەوە خەڵک نەبوە هاوپەیمانى و رێکەوتنى لەگەڵ جەلاددترین و شۆڤینیترین هێز و قەوارە کردبێت لەپێناوى ئیمتیازى زیاتر بۆ خۆتان.
بەڵێ ،ئەوە ئێوەن دەستى تێکدەر و وێرانکردنى ئەو وڵاتەتان لە پشتەوە و خەڵکتان بە فەرامۆشى سپاردوە ،ئەوە ئێوەن دەبێت بخرێنە زیندانەوە نەک کەسانێک کە بیست ساڵە لە هەموو شتێک بێبەشتان کردوون و یاریش بە هەست و نەستیان دەکەن.بەعس چارەنوسى دوو نەوەى لە کوردستان بۆ خۆى برد،ئێوەش خەریکن هەمان ئەزمون دەکەنە نسیبى خەڵک.
پێویست ناکات خەڵکى نارازى بە تێکدەر و خائین و لە پشتەوەبونى دەستێک تاوانبار بکەن،وەرن هیمەت بکەن و ئیمکانیات زۆرە و واز لەبەرزکردنەوەى کۆشکەکان و زیادکردنى شرکاتەکان و گۆڕینى مۆدیلى ناوماڵ و سەیارە و سەفەرى وڵاتان بهێنن و ئاوڕێک لە خەڵک بدەنەوە و ئەو (دەستە)ببڕن.
(دەستەکەى)پشتەوەى خۆپیشاندانى خەڵکى پیرەمەگرون و نارەزایەتى کوردستان دەستێکى پیرۆزە و دەبێت بپارێزرێت کە دەستى باشکردنى ژیانى خەڵکە.
ئه‌م ئیمه‌یڵه‌ شاردواوه‌یه‌ له‌ مشه‌خۆره‌کان، پێویستت به‌ یاڤا سکریپته‌ بۆ بینینی