حیکایەتی مێشەکە

رەحمان غەریب

ئەو رۆژەی وەزیری تەندروستی کابینەکەی سەرۆکی حکومەتی هەرێمی کوردستان عومەر فەتاح بەردی بناغەی قۆناغی یەکەمی پرۆژەی 400 قەرەوێلێیەکەی سلێمانی دانا لە 2002 دا،هێشتا دروسکردنی بەرزترین تاوەر لەجیهاندا،بە خەیاڵی میری دوبەیشدا نەهاتبوو.وەلێ ئەوان ئەوەتا یاری ئاگرین بەسەر تاوەرەکەیان هەڵئەدەن،دواکەوتنی پرۆژەکەی ئێمەیش بوو بەحیکایەتی مێشەکە.

نازانم کاربەدەستانی حکومەت ئەوانەی سەپەرشتی نەخۆشخانە400 قەرەوێڵەکەی سلێمانییان کردووەو ئەیکەن،ئەوانەی کەخەونی بەدوبەی کردنی شاری سلێمانیان دەبینی،تەماشای ئاهەنگەکەیان کرد یان نا؟
ئەیبێت ئەو زاتانە چ جۆرە هەستێک دایگرتبن؟ پرسیارێکیان ئاراستەی خۆیان کرد، ئاخۆ ئەو کاتەی سەپەرشتیارانی تاوەرەکەی دوبەی یاری ئاگرین بەسەر پرۆژە جیاهنێکەیان هەڵدەدا، هەر سورن لەسەر ئەوەی سلێمانی بکەن بە دوبەی؟ یان جارێ زۆرمان ماوە؟
بورجەکەی دوبەی بەرزترین تاوەری دونیا کە بەدەستی مرۆڤ بنیاتنرا،بە درێژایی 828 مەتر باوەشی بە ئاسمانا کردووە لە 200 نهۆم پێکهاتووە،لە دوری 95 کلم دەبینرێت،سیحرەکەی هەرلەوەدانیە کەپسپۆرانی ئەمریکایی ءفەرەنساییء بەریتانی بنیاتیان ناوە.
بەڵکو سییحری پرۆژەکە جیدیەتێکیمان پیشان ئەدات لەسیاسەتی ئابوری، کە دەزانێت مامەڵەکردن لەگەڵ کۆمپانیاکانی کەرتی تایبەت، تەنها یاسایە رێکیدخات،نەک مقاولء مشەخۆری حزبی، یاسا نەک موغامەرەو گەمەکردن بە داهاتی ڕەشوڕوتی ووڵات.

بورجی خەلیفە کە لە 2004 دەستی بەکارکردن کردوو لە 2010 ڕادەستی ئیمارەتی دوبەی کرا،ئێستا لەهەر نهۆمێک یەک مەتر چوارگۆشە بە نرخێکی جیاواز بەکرێ بان دەفرۆشرێت. بووە بەرەمزی ئاودانکردنەوەی بیابان لە لایەن ئینسانەوە.

پرۆژەی تاوەرەکەی خەلیفە لە دوبەی سەری لەناو هەوردایە ، بەرزترین مزگەوتء بەرزترین مەلەونگەء بەرزترین ئوتێلء بەرزترین خۆشگوزاری تێدایە،بوو بەرەمزی خەونی وڵاتێک بۆ پێشکەوتن،دەستڕەنگینی ئەو 12 هەزار کرێکارو پسپۆرء کارمەندەمان پیشان ئەدات کە بڕیاریان دابوو بچەنە ناو کتێبی گێنس.

پرۆژە بەدبەختەکەی لەمەڕخۆمان، کە ئەوسا نوێنەی حزب لە دەزگای پرۆژەکانی ئاوەدانکردنەوە ئیحالەیکرد بۆ کۆمپانیای بیانی. نازانین تا چەند ساڵی تر تارمایی هەیکەلی تەواونەکراوی، لەسەر شەقامی شەست 60 مەتری، بەحکومەت پێدەکەنێت؟.

حکومەت، تازە بە تازە 57ملێون دۆلاری تری بۆ تەرخانکراوە، وەزیر تەندرەوستی تەسلیمی وەزیری دوای خۆی دەکاتء ئەم جێگری سەرۆک وەزیران ئەرکی سەپەرشتیکردنی بەو جێگیری سەرۆک وەزیران دەسپێرێت ،لیژنە هونەری بە لیژنەی لێکۆڵینەوە دەڵێت لاچۆ بەولاوە، هەر بەپرسێکی تازە دێت کامێرای تەلەفزێۆنەکان دوای خۆی ئەخات،لە نزیکەوە چاودێری کارەکانی ئەکات، بێ ئەوەی لە هەواڵێکدا پێمانبڵێن، ئەم حیکایەتە بێتامەی ئەو 6 نهۆمە، کەی تەواو دەبێت؟

ئامادەنەبونی چەمکی لێپرسینەوە ،لاوازبونی چاودێری دارایی گشتی وڵات، نەبونی لیژنەی نەزاهە،یاسای دواکەوتوو وایکردوە تەندەرری پرۆژەی گەرەوە بچوکی ئەم وڵاتە بە گروپی کۆمپانیاکانی حزب بسپێردرێت، کە وایکردووە جیاوازیەکی گەورە لە نێوان گیرفانی حزبء قاسەی حکومەت نەمێنی.
ئەوە یاسای دواکەوتی بانکء روتێنی تاقەتپڕوکێنی حکومەتە پرۆژەکانی کردووە بە حیکایەتی مێشەکەو هەر تەواو نابێت.
ئەوە فاسدو موفسدینی ئەم وڵاتەیە وایکردووە پرۆژەکانی حکومەت،ببنە مایەی نوکتەی گالتەجاڕیء فراوانکردنی ناڕەزایی خەڵک،تا ڕادەی بەردبارانی رەمزەکانی دەوڵەت،بێباکییش بێت بەرامبەر چارەنوسی ئەزمونەکەی،ئەو ئەزمونەی کە هاوڵاتی ئەم وڵاتە ئامادبوو ژیانی خۆی،ئەندامانی خێزانەکەی، پاشانیش ماڵکەی بۆ بسوتێنێت،نەک بەهۆی کەڵکەبونی ناڕەزایی سەیارەی پۆلیس بسوتێنێ.
ئه‌م ئیمه‌یڵه‌ شاردواوه‌یه‌ له‌ مشه‌خۆره‌کان، پێویستت به‌ یاڤا سکریپته‌ بۆ بینینی