ڕەوەندی سیاسی پاش هەڵبژاردن لە عێراقدا

موئەیەد ئەحمەد:     

هەڵبژاردن و ڕاپەرین
هەڵبژاردنەکانی ئەم دوایـیەی پەرلەمانی عیراق، هەڵبژاردنێکی هێزەکانی دژە شۆرش بوو، ئەمەش بەسادەیی لەبەرئەوەی هەڵبژاردن کاتیک توانرا بخرێتەڕوو و سازبدرێت کە بەهێزترین هەڵچوونی شۆڕشگێرانەی جەماوەریی کرێکاران و زەحمەتکێشان و نەداران و لاوانی کچ و کوڕی ئەم چین و تۆێژانە، سەرکوتکران و بەلێشاو نوقمی خۆین کران. لە ئاکامی ئەم تاوانکاری و خوێنڕێژییـەی ڕژێمی بورژوا ئیسلامی و قەومی و میلیشیاکانی، زیاتر لە (٨٠٠) خۆپێشاندەر کوژران و هەزارانیشیان لێگیرا و تیڕۆر و بێ سەروشوێن کران، و دەیان هەزاریشیان بریندار کران. لە هەرێمی کوردستان و بەدیاریکراوی لە دێسێمبەری (٢٠٢٠)دا ژمارەیەک خۆپیشاندەریان خەڵتانی خۆین کرد و بە زەبروزەنگ و گرتن و ڕاوەدوونان توانیان بەشێوەیەکی کاتی کۆنترۆلی بارودۆخەکە بکەن، و لەم دوایانەشدا ڕاپەرینی خوێندکاران و گەنجان لە زۆربەی شارەکانی کوردستان بۆ چەندین ڕۆژ بەردەوام بوو.
گەر لە شوێن و پێگەی ڕاپەرینی ئۆکتۆبەر لە عێراق و نارەزایەتیەکانی خەڵک لەهەرێمی کوردستانەوە، و لە هیوا و ئامانجە ئازادیخوازەکانیانەوە، ورد بـبـینەوە لەوەی کە گوزەراوە و ئەگوزەرێ، تابلۆی خۆینتکان ئەبینین لەسەرجەم جەستەی ئەم هەڵبژاردنەدا، و ئازار ئەشکەنجەکانی هەزاران بێسەروشۆینکراوان و گیراوان و برینداران و ناڵەی کەسوکاریان ئەخۆێنـینەوە، و ڕیسوایی هەموو ئەو لایەن و کەسانە ئەبینین کە بەناوی ڕاپەرینەوە بەشداری ئەم هەڵبژاردنەیان کرد. ئەم تابلۆیە واقع و مانای ئەم هەڵبژاردنە دژە شۆڕشەیە بۆ جەماوەری نەداری ئەم کۆمەڵگەیە کە بە (١٨٠) پلە بە پێچەوانەی پیاهەڵخۆیندنەکانی دەسەڵاتداران و هێز و حزبەکانیانە.
کارکتەری سیاسی جیاکەرەوەی هەڵبژاردنی ئەم جارە، بۆ پەرلەمانی عێراق، لەوانەی پێشووتر، ئەم پەیوەندیـیەی هەڵبژاردن بوو بە سەرکوتی ڕاپەرینەوە. جەوهەری ‌هەڵبژاردن، وەک کردەوەیەکی سیاسی و ئامڕازێکی دەستی هێزەکانی دژە شۆرش، بریتی بوو لەم پەیوەندیـیە و لەم سەرکوتە، و مەبەست لێی بە پلەی سەرەکی چنینەوەی بەرهەمەکانی سەرکوتی ڕاپەرین بوو لە بەرژەوەندی بورژوازی ئیسلامی و قەومی و نیولیبرالی دەسەڵاتدار نەک جێبەجێکردنی ئامانج و داوکاریەکانی ڕاپەڕین.
بۆ هێزەکانی دەسەڵات هەڵبژاردن ئامرازێکی سیاسی “نەرم”ی تەواوکەری پڕۆسەی سەرکوتی خۆێناوی ڕاپەرین بوو. لیڵکردن و شێواندنی ئامانج و داواکاریەکانی ڕاپەرین بەوەی کە هەڵبژاردنی پێشوەخت جێبەجێکردنی داواکاری ڕپەراینی ئۆکتۆبەرە و بەقسەی موستەفا کازمی بۆ فەراهەمهێنانی “دەوڵەت و ڕیفورم و ڕەفزی گەندەڵی” بوو، بە ئاشکرا ئەم تەواوکاریەی پرۆسەی سەرکۆت دەرئەخات. کازمی لەم گوتەیەیدا لە تیوتەر نە قسەیک لەسەر ئەوە ئەکات کە ڕاپەرین بە دژی سیستم و نایەکسانی و هەژاری و بیکاری بوو و نە ئەچێتە سەر ئەوەی کە ئامانج و دروشمی ڕاپەرین ڕوخاندنی سەرجەم ڕژێمەکە و دەسەڵاتی حزبەکان بوو، وە نە باسی ئەوەش ئەکات کە جەماوەری شۆرشگێر ئەیەویست گەندەڵی لە مێخەوە هەڵکێشێ و وەک سیستم دایڕمێنی.
هەروەک ئاماژەم پێدا، هەڵبژاردن، وەک نەخشە و سیاسەتی بورژوازی دەسەڵاتدار، لە پەیوەندیدا بە ڕاپەرینەوە، بۆ چنینەوەی بەرهەمەکانی سەرکوتی ڕاپەرین و سەقامگیرکردنی ڕژێم خرایەڕوو، و لەم ڕاستایەشدا بۆ کەمکردنەوەی ئاسەوارەکانی ئەو کوتەکە گەورەیەی کە ڕاپەرین سرەواندیـیە پەیکەرەی سیاسی و ئایدیۆلۆژی ئیسلامی سیاسی و تایفەگەریەتی لە عیراقدا. ستراتیژێک کە ‌هێزەکانی ڕژێم لەم بوارەدا بەڕێوەیان برد و ئیستاش بەڕێوەی ئەبەن چەناڵیزەکردنی ئەو گۆڕانکاریە سیاسی و فیکریانەیە کە ڕاپەرین فەراهەمیهیناوە تا بەئارامی هەرس ببن لە جەستەی سەرخانی سیاسی و فیکری سیستمی زاڵی سەرمایەداری و ببنە هۆی سەقامگیرکردنی ڕژێمی سیاسی حاکم.
حزب و هێز و ڕەوتە فکری و سیاسیەکانی بورژوازی هەم لەناو دەسەڵاتدا و هەم ئەوانەشیان کە لە ئۆپۆزسیۆندان وە یا لە بەرەی بایکۆت دان، و هەندێک لەوانەش کە لەناو ڕاپەریندا بوون، و بەناوی “تشرینەوە”، واتە ئۆکتۆبەرەوە، ئەدوێن، هەموو ئەمانە بەکردەوە خەریک بوون و ئیستاش بەردەوامن کە بەربەستی ئەو زەڕبەیە بکەن کە ڕاپەرین داویەتی لە پەیکەرەی رەوتی ئێسلامی سیاسی و نیزامی سیاسی بورژوازی لە عێراقدا. هەڵبژاردنی پەرلەمانیش ساتێک بوو لە ساتەکانی ئەم پرۆسەیە، و یەکانگیرکردنەوەی ئەم هەوڵوتەقەلا کۆنەپەرستانەیەی هەموو ئەم لایەنانە و چەنەڵایزەکردنی بوو بە مەبەستی جێگیرکردنی نیزامی سیاسی دەسەڵاتدار و تواندنەوەی هێواش و لەسەرخۆی دەستکەوتە فیکری و سیاسیەکانی ڕاپەرین لەناو سیستم و ڕژێمدا.
میکانیزمی سەرلەنۆێ بەرهەمهێنانەوەی دەسەڵاتداریەتی هێزە ئیسلامی و قەومیەکان، و دینامیزمی سیاسی ناو کۆمەڵگەی بورژوازی لە عێراقدا، بە بەردەوام و بەشیوەی جۆراوجۆر خەڵکی کرێکار و نەداری ئەو کۆمەڵگەیە و ڕیزی بەرینی بێکاران و ژنانی ستمەدیدە و لاوانی شۆرشگیر ئەخاتە ژێر باری قورسی ئەم هێرشە ئایدیۆلۆژی و تیۆری و سیاسیـیەی ڕەوت و لایەنەکانی بۆرژوازی و سیاسەتە دوژمنکاریەکانی هێزەکانی دژە شۆڕش. ئەمەش بەمەبەستی ئەوەی کە نەهێڵرێت خەباتی سەربەخۆی ئەم چین و تۆیژە نەدار و چەوساوانە بەرەوپێش بچێت و ئاکامەکانی هەڵچوونی شۆڕشگێڕانەی خۆیان بچننەوە و دەستکەوتە شۆڕشگێرانەکانیان ببێتە هۆکاری بەرزکردنەوەی زیاتری هوشیاری سیاسی و فیکری سەربەخۆیان و جێگیرتر ببێت لە ئاستێکی کۆمەڵایەتی بەریندا.
هەر لەم ڕاستایەشدا، هێزەکانی بۆرژوازی دەسەڵاتدار و پاڵپشتە نێودەوڵەتەکانیان و بە مەبەستی ملنەدان بەهیچ داواکاریەکی ئابوری و کۆمەڵایەتی و سیاسی ئازادیخوازانەی جەماوەری نەدار و شۆرشگێڕ و هێزە کۆمەڵایەتی و چینایەتیە پرۆلیتاریەکەی ڕاپەرین، هەڵبژاردنیان لە جێگەیدا دانا کە بۆخۆی لە بەرژەوەندی جێگیرکردنی سیستمی زاڵی بورژوازیە. دیارە ئەوان باش ئەزانن کە داسەپاندنی سادەترین داواکاری ئابوری و کۆمەڵایەتی و سیاسی ئازادیخوازانەی ئەو جەماوەرە نەدار و شۆڕشگێڕە بەسەر بورژوازی و ڕژیمەکەیدا ئەبێتە دەسکەوتی جێگیر نەک هەر بۆ ئەنجامدانی باشبژێوی لە ژیانی چین و تۆیژە نەدارەکان بەڵکو بۆ گۆڕینی پارسەنگی هیزی چینایەتی بەلای ئەم چین و تۆیژانەدا و بەرزکردنەوەی ئاستی سیاسی و فیکریان و لە دواشیکردنەوەدا بەهیزترکردنی پرۆسەی خەباتی شۆڕشگێڕانە لە کۆمەڵگەدا.
بەڵام لەگەڵ هەموو ئەو هەوڵ و تەقەلا کۆنەپەرستانەیەی بەرەی دژە شۆرش، کەس ناتوانی ئەوە ڕەت بکاتەوە کە ڕیزی بەرینی جەماوەری زەحمەتکێش و نەدار و بیکارانی کچ و کوڕ لەوپەڕی بێزاریدان و ناڕەزایەتیەکان لەناو دەروونی کۆمەڵگەدا جمەی دێت و هەمەلایەنەتر بووە، و ڕێژەی بەرزی بایکۆت و دەنگنەدان بەگۆیرەی راپۆرتەکان نزیکەی (%٨٠)ی دەنگدەران بوو و هەموو هیزە سەرەکیەکانی دەسەڵات ژمارەی دەنگەکانیان کەمتر بوەتەوە. هەموو ئەمانەش دیاردەی قەیرانیکی قوڵ و بەرینە کە نیزامی سیاسی و ئابوری و کۆمەڵایەتی زاڵ لە عیراقدا دەرگیریەتی، و هەردەم ئەبێتە هۆی بەردەوامیی ناڕەزایەتی و هەوڵوتەقەلاکانی نەداران و کرێکاران و بێکاران و گەنجان بۆ گۆرینی دۆخی زاڵ. لە ئیستادا ئەبینین خۆپێشاندانەکانی خوێندکاران و لاوان لە کوردستاندا بەردەوامە و پێشبینی ئەوە ئەکرێت کە دەورەیەکی نوێ لە ناڕەزایەتیە جەماوەریەکان لەئاستی هەموو عیراقدا دەستپێبکاتەوە لە سەر زەمینەیەکی بەهێزتر و هەمەلایەنەتر.
دۆخی دوای هەڵبژاردن و سەقامگیکردنی ڕژێمی سیاسی بورژوازی
ڕژێمی سیاسی لە پێش هەڵبژاردن و لە دوای هەڵبژاردندا لەسەر بنەمای سیستمی تایفی و قەومی و هێزی میلیشیایی دامەزراوە و درێژەی پێئەدرێ، و هەڵبژاردن نەک دەستکاری ئەم سیستمە ناکات، بەڵکو چاکسازیەکانیش کە بە فۆڕماڵیستی باسی لێوە ئەکری بۆ سەرلەنوێ بەرهەمهینانەوە و جێگیرکردنی زیاتری ئەم سیستمەیە. بەڵام ئەوەی کە گرنگە ئەوەیە کە ئەم سیستمە خۆی دەرگیری قەیرانە و زۆربەی زۆری جەماوەر سەنگەریان لێگرتووە.
خاسیەتی سەرەکی ئەم دەورەیەی پاش هەڵبژاردن قوڵتربوونەوە و بەرینتربونەوەی قەیرانی دەسەڵاتداریەتی بورژوا ئیسلامیزم و ناسیۆنالیزمە لە عێراق و کوردستاندا و سەرچاوەکەشی، بە پلەی سەرەکی، قوڵتربونەوەی قەیرانێکی کۆمەڵایەتیی بەرینە کە هەڵقوڵاوی توندوتیژبوونەوەی ناکۆکیـیەکانی سیستمی ئابوری زاڵی سەرمایەداری نیولیبرالیزم و دینامیزمی ژیانی کۆمەڵایەتیـیە لە چوارچێوەیدا، و هەروەها لەقبوون و لێکترازانی هیژمۆنی ئایدیۆلۆژیا و ئاسۆی سیاسی و فیکری ئیسلامی سیاسی و قەومیـیە بەسەر زەینی جەماوەری بەرینی نەداران و کرێکاران و لاوانی كچ و کوڕی ئەم کۆمەڵگەیە. بۆیە ئەم قەیرانە سیاسیەی ڕژێم و ئەم جەمسەرگیریەی جەماوەر لە بەرامبەر دەسەڵاتدا هەردەم تەشەنە ئەکات و قوڵتر ئەبێتەوە و کار بەئاستێک گەیشتۆتە کە بەناچاری ئەبێ ئاڵوگۆڕیـیەک، لە بەرژەوەندی جەماوەر یا بە دژی، بێتە ئاراوە و ئەوەی ئیستا هەیە و زاڵە تێپەڕێنرێ.
پرسیاری سەرەکی ئەوەیە کە بۆ فەراهەمهێنانی ئەو ئاڵوگۆڕیـیە، هەم هێزە چینایەتی و کۆمەڵایەتیـیەکانی کریکاران و نەداران و گەنجانی كچ و کوڕی ناڕازی و سۆشیالیست و ئازادیخواز لە کێشمەکێشدان لە بەرامبەر چینی بۆرژوازی باڵادەست و ڕەوت و حزب و هیزە سیاسیەکانی، لەناو دەسەڵات وە یا لە ناو ئۆپۆزسیون، وە هەم ئەم حزب و هێزانەی بۆرژوازیش کەوتونەتە گیانی یەکتری و لە ململانێدان و لە هەمانکاتیشدا یەکدەستن بە دژی پرۆلیتاریا و بەرەی شۆرش.
تا ئەو شوێنەی باسەکەمان لەسەر دەسەڵات و دەوڵەتە لە عێراقدا، کێشمەکێشی نیوان هێز و باڵەکانی دەسەڵات تەنها لایەنێک و بەشێک لە کارەکتەری دەوڵەت و نیزامی سیاسی لە عێراقدا پێک ئە‌هێنی، بەڵام مەسەلەی بناغەیی لەم بوارەدا ئەوەیە کە هێزە سەرەکیـیەکانی دەسەڵات و گەورە سەرمایەداران و تۆێژە دەستڕۆیشتووەکانی بورژوازی ناوخۆیی و هەروها بۆرژوا ئیمپریالیزمی ڕۆژئاوا و هاوپەیمانە نیودەوڵەتیەکانی و تەنانەت ‌هێزە ناوچەیەکانیش، لەوانە ئیران، چوونیەکن و یەکدەستن لەسەر سەقامگیرکردنی دەسەڵاتی دەوڵەتی بورژوازی لە ڕیگەی ئەم فۆرمە سیاسیـیە ئیسلامی و قەومیە پشکپشکێنەیەی کە هەیە لە عیراقدا.
هەموو ئەم هێزانەی بورژازی نەک هەر کێشەیەکیان نیـیە لەسەر ئەوەی کە پاراستنی نیزامی سەرمایەداری و کارکردی جوڵە و کەڵەکەی سەرمایە، کە بەشێکە لەجوڵەی سەرمایەی جیهانی، بەم ڕژێمە گەندڵ و سەرکوتگەرە دابین بکەن، بەڵکو وەک زەرورەتێک مامەڵەی لەگەڵ ئەکەن و لە هەوڵی سەقامگیرکردنیدان. هەروەها کار لەسەر ئەوە ئەکەن ڕژیم سەقامگیر بکەن و ئیحتوای هەر هەوڵوتەقەلایەکی شۆڕشگێڕانەی پرۆلیتاریا و نەدارن و ئازادیخوازن و سۆشیالیستەکان بکەن، و نەهێڵن لە سەروسیمادان بەو ئاڵگۆریەی کە بوەتە ناچاری ڕۆلیان هەبێ و هەر لەم ڕاستایەشدا قەیرانەکەیان بەجۆرێک چارەسەربکەن کە بـبـێـتە هۆی جێگیرترکردنی دەسەڵاتداریەتی بورژوازی ئیسلامی و قەومی و پایەکانی دەوڵەت و دکتاتۆریەتی بورژوازی.
بۆ ئەمریکا و بورژوازی نێودەوڵەتی هاوپەیمانانی، گرنگ ئەوەیە کە ئەم هێزانە بتوانن ڕژێمەکە درێژە پێبدەن و دەور و کارکردی هێزەکانی سەر بە جمهوری ئیسلامی ئێران کەم بکەنەوە و هەنگاو بنێن بۆ سەقامگیرکردنی ڕژێمی سیاسی بورژوازی لە وڵاتدا. ئیتر ئەوە نەک هەر گرنگ نیە بۆیان کە کۆنەپەرسترین هیزی وەک (سەدر)یـیەکان و (پارتی)یەکان و (حەلبوسی)یەکان و هاوپەیمانەکانی تریان بتوانن حکومەتی زۆرینە دامەزرێنن و پایەکانی ڕژیمی سیاسی بورژوازی بەم شێوەیە سەقامگیر بکەن، بەڵکو جێگەی دەستخۆشانە و پشتگیریانە. (سەدر)یـیەکان چۆن سەرکوتی هاوڵاتیان ئەکەن و چ بێمافی و دیلیەتیک بەسەر ژناندا ئەسەپێنن، و (پارتی) چی بەسەر جەماوەری کوردستاندا ئەهێنی و حوکمی بەعس ئاسای چۆن لە کوردستاندا بەهێزتر ئەکا، و (حەلبوسی)یەکان و هاوپەیمانانی چ سەودایەک بە چارەنوسی دانیشتوانی ناوچەکانی ڕۆژئاوای “غەربیە”ی عێراقەوە ئەکەن، ئەمانە هیچیان نیگەرانیەکانی ئەوان نین و هێنانەدی بەرژەوەندیە ئابوری و سیاسی و جیۆسیاسیەکانیان مەشغەڵەتیانە.
چەڵێنجی سەرەکی بەردەم پرۆلیتاریا
لەگەڵ سەرکوتکردنی ڕاپەرین، هێزە کۆمەڵایەتیـیە پرۆلیتاریەکەی کەوتە ئەو دۆخەی کە ناچار بێت لە فۆرمی تردا بەردەوامی بەخەباتی بدات تا دەرەویەکی تازەی هەڵچوونی جەماوەری. گەندەڵکاری سیاسی بەشێک لە چالاکەوانانی ئۆپۆرتیونیستی ناو ڕاپەرین کە بەحوسن و ڕەزای خۆیان بونەتە پاشکۆی ڕژێم و بەشێکیان بونەتە هەڵمات بەدەست لایەنەکانی ئۆپۆزسیۆنی بورژوازی، سەر بەم دەوڵەوت ئەو دەوڵەتی جیهانی و ناوچەیی، تەنها دیاردەی داڕوخانی ئەم بەشەیە لە چالاکەوانانی ڕاپەرین و هیچی تر، و بەشێکە لە پرۆسەی بەرەوپیشچوونی جەمسەرگیری زیاتری هیزەکانی شۆرش و دژە شۆرش، هێزەکانی گۆرانکاری و کۆمەڵگەی نوێ و هێزەکانی کۆنەپارێزی و ئیستبداد.
جەماوەری کریکار و زەحمەتکێشی لە عێراق و لە کوردستانیش بەشێوەی دیاریکراوی خۆی، لەبەردەم چەڵینجێکی گەورەدایە لە بارودۆخی پاش ئەنجامدانی هەڵبژاردن. سەقامگیربوونی ڕژیمی بورژوازی و دەوڵەتی بورژوازی ئیسلامی و قەومی لە عێراقدا کە ڕێک بێتەوە لەگەڵ بەرژەوەندیەکانی بورژوازی نێودەوڵەتی و کەمپی ئەمریکا و هاوپەیمانەکانی، لە بارودۆخی ئیستادا بە شیوەیەکی ئاڵۆز و ڵێکهەڵپیکراو لە ئارادایە، و ئەوەی کە پێشیلی ئەکەن بەرژەوەندیەکانی جەماوەری نەداری عێراقە بۆ فەراهمهێنانی ئاڵوگۆریی سیاسی شۆرشگێرانە و ڕیشەیی.
هەر بۆیە لەم دەورەیەدا بوار بۆ تەمومژی سیاسی نەماوەتەوە و ڕەوەندی کێشمەکێشی سیاسی چینایەتی نێو کۆمەڵگە جەمسەرگیری ڕۆشنتری بە خۆیەوە دیوە و بۆرژوازی دەسەڵاتدار و هاوپەیمانە نێودەوڵەتیـیەکانیان ئەیانەوێت دەوڵەتی بورژوازی لە عێراقدا بەم فورمە سیاسیە ئیسلامی و قەومیەیەوە بچەسپێنن و سەقامگیری بکەن و نایانەوێت بە ئاسانی ئەوەی بەدەستیان هیناوە لە دەستی بدەن. هەر بەم پێیەش دەوری ئەو بەشە لە ڕابەران و چالاکەوانانی ڕاپەرین، کە کەوتونەتە ژێر کاریگەریەکانی ئەم ستراتیژەی بورژوازی، بەسەرچووە، و دیاردەی پاشکۆبونیان بۆ ڕژێم و بۆ هێزە ئۆپۆزسیونەکانی بۆرژوازی، لە نێوانیاندا گەشەیکردووە و ئۆپۆرتیۆنیزمی سیاسیان بووە بە پراتیکێکی ڕیسوابوو.
دیارە تەیفی تازەی ڕاپەرینکاران و پرۆلیتاریا لە ناو کۆمەڵگەدا لە جمووجوڵدایە، بەڵام ئەوەی گرنگە سیاسەتی ئۆپۆرتۆنیستی لافلێدەرانی ڕیفۆڕم و چالاکەوانانی گەندەڵکار و دژە حزبی و دژە سیاسی پێشوو، ناتوانن کاریگەری جارانیان هەبێ لەسەر ئەو جموجۆڵەی کە لە دەرونی کۆمەڵگەدا لە پێشکەوتندایە.
گەشەدان بە بڵاوکردنەوەی خوڕافاتی قەومی و دینی و تایفەگەری کارکتەری سەرکی سیاسەت و ڕەفتاری باڵەکانی بورژوازیە، کە بەپلەی سەرەکی وەزیفەی دژە شۆرش بوونیان بەرجەستە ئەکاتەوە و بریتیـیە لە هەوڵەکانیان بۆ تێپەڕاندنی ئەم دۆخە بە بێهیزکردنی پۆتینسی شۆڕشگێڕانەی جەماوەری نەدار و زەحمەتکێش و کولکردنی هەر ئایدیایەکی سۆشیالیستی و شۆرشگێرانە. ئەمە سەرباری ئەوەی لەژێر کوتەکی شۆرش و بەرەوپێشجوونی پڕۆسەی شۆرشگێریدا ئەگەری ئەوە هەیە پەنا بەرنە بەر بەهێزکردنی دڕندانەترین ڕەوتی فاشیستی و میلیتاریزەکردن دۆخەکە و بەرپاکردنی جەنگی پرۆکسی و تیرۆر و تەنانەت داگیرکردنی سەربازی.
تاکە زەمانەت لە بەرامبەر هەموو ئەم ئەگەرانەدا یەکخستنی ڕیزی سەربەخۆی کرێکاران و نەدارن و زەحمەتکێشانە لە دەوری ئاسۆی سیاسی سەربەخۆی خۆیان و ئەڵتەرناتیڤی سۆشیالیستیان. ئەزمونی ڕاپەرینی ئۆکتوبەر و هەموو ئەزمونە شۆڕشگیریە جەماوەریەکانی تری ناوچەکە ئەمەمان بۆ ئەسەلمێنی.
بەدیلی سۆشیالیستی
خاڵی دەستپیکردنی ناسینی خودی ئەو قەیران و كێشمەكێشە هەمەلایەنەیەی کە ئەگوزەرێ لە عیراقدا ناسینیەتی وەک کولـلیـیەتێک و پرۆسەیەکی نەوەستاو و لێکهە‌ڵپێکراو. مەسەلەی سەرەکی ئەوەیە کە بەدیلی شۆرشگیرانە و سۆشیالیستی و ئازادیخوازی چۆن بتوانی ئەم کێشمەكێشە سیاسی و کۆمەڵایەتیـیە بە ئاراستەیکدا بەرەوەپێش بەرێت کە هەردەم سەربەخۆیی سیاسی و چینایەتی سۆشیالیستی پرۆلیتاریا زامن بکات و فەراهەمی بهێـنێـتەوە لە هەموو وەرچەرخانە سیاسیەکاندا.
هەموو هیزەکانی بورژوازی بە هەموو ئەوانەی کە لەناو دەسەڵاتدان و ئەوانەشی کە لە ئۆپۆزسیۆندان مۆدیل و بەدیلێکی ئابوریان نیە بۆ کۆمەڵگە و ڕێکخستنی ژیانی کۆمەڵایەتی و ئابوریـیەکەی جگە لە کەپیتالیزمی نیولیبرالیی هاوچەرخ، و هێچ ئاسۆیکی ئابوری لە ئەجندەیاندا نیـیە کە خۆشگوزەرانی بۆ جەماوەر دابین بکات. ئەمەش بۆخۆی خاڵی لاوازیانە و زەمینەی ئەو قەیرانە کۆمەڵایەتیـیـەیە کە هەردەم قەیرانی سیاسیان توندوتیژتر ئەکاتەوە. هەربۆیە بەپیجەوانەی بانگەشەکانی دوژمنانی سۆشیالیزم و کۆمۆنیزم کە هەردەم باسی کۆتاییهاتنی بەدیلی سۆشیالیستی و کۆمۆنیستی ئەکەن، ئەوە سەرمایەداری نیولیبرالیزم و ناکۆکیە کارەساتبارەکانیەتی کە کۆتایی پێهاتووە، و بە زەبروزەنگ و بە هۆکاری پارسەنگی هیزی سیاسی چینایەتی لە بەرژەوەندی بورژوازی بەڕێوە ئەبرێ.
خولانەوە لە بازنەی فەراهەمهێنانی ڕیفورم لە سەرخانی سیاسی نیزامی سەرمایە و خولانەوە لەناو کایەی سیاسەتی بورژوازی بەبێ گرتنەبەری ئاسۆی گۆڕانکاری ئابوری و سۆشیالیزم و چارەسەری کولـلیـیەتی ئەم بارودۆخە هیچ دەردێکی پرۆلیتاریا دەرمان ناکات. كێشە و مەسەلەکانی جەماوەری نەدار و زەحمەتکێش نە لە بازنەی هەڵبژاردن و بایکۆتدا وەڵام وەرئەگرنەوە، وە نە لە بازنەی گۆڕینی سیستمی سیاسی بە گۆێرەی مۆدێلەکانی بورژوازی و ڕیفۆرمیان.
بۆ پرۆلیتاریای سۆشیالیست چوونەپای خەباتی چینایەتی و كێشمەکێشی سیاسی چینایەتی سەربەخۆی خۆی مانایەکی نیـیە بەبی بەرزکردنەوەی ئاڵای سۆشیالیزم و ئاسۆی گۆرانکاری شۆرشگیرانەی ئابوری و ڕزگاربوون لە کۆتوبەندی سەرمایە و سەرمایەداری. ئەو تەنها بە ئاسۆی سۆشیالیستی ئینتەرناسیۆنالیستیەوە ئەتوانێ بەهیز و تواناوە بەرەو ڕووی ئەم دەورەیە لە گۆرانکاریە سیاسی و کۆمەڵایەتیەکان ببێتەوە و لە بەرژەوەندی نەداران و زەحمەتکێشان بیانشکێنێتەوە، و تەنانەت ڕیفورمێش لە پرۆسەی ئەم خەباتەیدا بەدستبهێنێ بۆ ئەوەی شۆرش بەرپا بکات بەسەر هەموو ئەو سەرخانە سیاسیەی کە بورژوازی قەومی و دینی و لیبرالی لە عێراقدا کردویانە بە قەڵای کۆنەپەرستی و درێژەدانی دیلیەتی ملیونەها ئینسان و ژیانی کارەساتباریان.

٢٩ نوڤەمبەری ٢٠٢١

Leave a Reply

Your email address will not be published. Required fields are marked *

*

%d bloggers like this: