راپۆرتێکى ئەمریکی: مەیلی هەولێر بەرەو دیکتاتۆرییەت و دەمکوتکردنی بەرهەڵستکاران هۆکاری کۆچی گەنجانە

ئاژانسی بلوومبێرگی ئەمەریکی راپۆرتێکی لەسەر هۆکارەکانی کۆچکردنی هاوڵاتیانی هەرێمی کوردستان بۆ ئەوروپا لەژێر ناوی ” بۆچی کوردەکانی عێراق خاکی خۆیان جێدەهێڵن” بڵاوکردۆتەوە و تێیدا باسی لەوەکردووە کە هەرچەندە ناوچەکە لەڕووی ئەمنییەوە سەقامگیرە، بەڵام بڵاوبوونەوەی گەندەڵیی لەسەرانسەری عێراق و مەیلی هەولێر بەرەو دیکتارتۆر بوون و دەمکوتکردنی بەرهەڵستکاران و رۆژنامەنووسان وایانکردووە خەڵک بیر لە کۆچکردن بکەنەوە.

بلوومبێرگ لە راپۆرتەکەیدا دەڵێت”بارودۆخی کۆچبەران لەسەرسنووری پۆڵەندا و بیلارووسیا زۆر خراپە، لەگەڵ ئەوەشدا ئەوە ڕێگر نییە لەوەی هاوڵاتیانی هەرێمی کوردستان بەدوای دەرفەتێکدا بگەڕێن بۆئەوەی خاکی خۆیان جێبهێڵن و بەختی خۆیان لە ئەوروپا تاقی بکەنەوە”.

ئاژانسەکە ئاماژەى بەوەشکردوە، زۆرێک لە ئەوروپی و ئەمەریکییەکان بەلایانەوە سەیرە کە هەزاران هاوڵاتی کوردی عێراق سەری خۆیان هەڵدەگرن و روو لە سنوورەکانی پۆڵەندا و بیلارووسیا دەکەن، بەڵام پێدراوەکانی بڵاوبوونەوەی گەندەڵی لەسەرانسەری عێراقدا هۆکارەکانی ئەو کۆچکردنە رووندەکاتەوە.

ئەوەش هاتووە: زیادبوونی ژمارەی ئەو کوردانەی عێراق دەیانەوێت لە وڵاتەکەیان رابکەن، ئەو ئومێدە  لەبارەی بوونی دەرفەتی ئابووریی و سیاسیی  لەهەرێمەکە لەدوای ساڵی 2003 بەبا دەدات و ڕاستییەکەی ئێستا ئەوەیە کە هەرێمی کوردستان لە نێوان دۆخێکی ئابوریی ناڕوون و لە نەبوونی چاکسازی سیاسیدا بووەتە پەناگەیەک بۆ هەڵاتووەکانی وڵاتانی نزیک، بەتایبەت کە دوو سەرۆک هۆز دەستیان بەسەر ژیانی سیاسیی هەرێمەکەدا گرتووە و حکومەتی هەولێریش زیاتر مەیلی بەرەو دیکتاتۆرییەت و زیندانیکردنی بەرهەڵستکاران و دەمکوتکردنی رۆژنامەنووسان هەیە، خۆپیشاندان و نارەزایەتییەکانی ساڵی رابردووش هیچ کاریگەرییەکیان لەسەر کەمکردنەوەی گەندەڵیی لەهەرێمەکەدا نەبووە.

بلوومبێرگ روونیکردەوە، حکومەتی عێراق بەدرەنگەوە هەوڵەکانی بۆ گێرانەوەی عێراقییە کۆچبەرەکان دەستپێکردووە، بەڵام ئەو راپۆرتانەی لەسەر سنووری پۆڵەندا و بیلارووسیاوە دێن ئەوەیە کە کۆچبەرەکان پێیان باشترە بەرگەی سەرما و سۆڵەی زستانی ئەوێ بگرن لەوەی بگەڕێنەوە بۆ وڵاتەکەی خۆیان.

ئامادەکردن: ئاکۆ ئاڵی

Leave a Reply

Your email address will not be published. Required fields are marked *

*

%d bloggers like this: