هەڵبژاردن تەوا بوو, بەڵام کێشەی نیوان خەڵکی ناڕازی و دەسەڵات نەبڕاوەیە!

بەدوای دەورەیەک لەپڕوپاگەندەکردن و هەوڵی هاوبەشی هەموو حزبە بەشدارەکان بۆ فریودانی جەماوەری نارازی و بەدوای بەخشینەوەی کێوێك لەبەڵێنی درۆ و ڕیاکاری و پاڕانەوە لەخەڵک و لاواندنەوەی کوردایەتی، کەگوایە دەنگی خەڵک “پێگەی کورد لەبەغدا بەهێزدەکات و مافە دەستوریەکانی کورد دەگێڕێتەوە”. پاش ئەوەی کەحزبە دەسەڵاتدارەکان بەئاشکراو نەهێنی ئەندامان و لایەنگرانی خۆیان لەژێر فشارو ترسدا راگرت و پەنجەی هەڕەشەی بڕینی موچەو لەسەرکار دەرکردنیان بەڕووی فەرمانبەران و موچەخۆراندا هەڵبڕی و دەستیان برد بۆ جۆرەها فرتوفێلی تر، تا بتوانن خەڵکی کرێکارو زەحمەتکێش لەسیناریۆیەکی گاڵتەجاریدا، کەناویان لێنابوو “هەڵبژرادن”، بەشدار پێبکەن و جارێکیتر بیانکێشنەوە سەر سندوقەکانی دەنگدان، بەڵام هەموو ئەم هەوڵەیان لەبەرامبەر بڕیارو هوشیاری و ئیرادەی بەکۆمەڵی خەڵکی نارازیدا شکستی خوارد. خاڵی بوونی بەردەم بنکەو بازنەکانی دەنگدان و بەشداری نەکردنی زوربەی هەرەزۆری هاوڵاتیان، لەکەنار چۆڵکردنی بازاڕ و ناوەندەکانی شارو گەرەکەکان و ڕاوەستانی جوڵەو مانەوە لەماڵدا، کەسیمای مانگرتنێکی گشتی ڕانەگەیندراوی بەخۆیەوەگرت، نەک تەنها “نا”یەکی گەورەبوو بۆ رەتکردنەوەی سیناریۆی گاڵتەجارانەی هەڵبژاردن، بەڵکو رەتکردنەوەی گشت پڕۆسەی سیاسی و دەسەڵاتێکە، کەچینی بۆرژوازی کوردو سەرجەم حزبە ڕەنگاوڕەنگەکانی لەسەری دەلەوەڕن و داهات وسەرمایە کۆدەکەنەوە.
جەماوەری بێبەش و بێمافکراو و نارازی بەسەرکوت و نابەرابەری، بێ ئەوەی ڕیکەوتنێکی ئیمزاکراویان لە نێواندا بێت، بەهۆی خاڵە هاوبەشەکانیانەوە، لەوانە پەرەسەندنی قڵشتی چینایەتی، گرانی و بیکاری و نەبوونی خزمەتگوازرییەکان و پایماڵکردنی مافە سەرەتاییەکانیان و نەفرەتیان لەدەسەڵاتی سەرکوتگەر و میلیشیایی وتاڵانچی لە نمایشێکی پێچەوانەدا ئامانجی بۆرژوازی ودەسەڵاتدارانیان لە سەرتاسەری عێراقدا، رووبەڕووی نابودی کردەوە و پەیامی دریژەدان بە بزوتنەوەی نارەزایەتی رەوای خۆیان ڕاگەیاندەوە. بەم هەڵوێستەشیان ئەزموونێکی تریان بۆسەر خەرمانەی راپەرینی ئۆکتۆبەر و خرۆشان و خۆپیشاندانە زنجیرەیەکانی خەڵکی زحمەتکێش چ لەعێراق کوردستان زیادکرد و پێداگریان لەسەر خواستی وەلانانی ئەم دەسەلات و سیستەمە کردەوە. ئەمەش هەنگاوێکی گرنگە لەڕاستای بردنەپێشەوەی خەباتی چینی کرێکارو جەماوەری زەحمەتکێش بۆ گەیشتن بەکۆمەڵگایەکی ئازاد یەکسان وخۆشگوزەران.
پێاهەڵدانی میدیاکانی دەسەڵات بەم هەڵبژاردنە و درۆسازی وبڵاوکردنەوەی ئاماری ساختە، تا گلەیی و گازندەی حزبە شکستخواردوەکان و تەنانەت پەیامەکانی ئەمریکاو نەتەوەیەکگرتوەکان، کەگوایە پڕۆسەیەکی سەرکەوتوویان تێپەڕکردووە، تەنهاو تەنها بۆ شاردنەوەی ئەو شکست و ئابروچونەیە کەجەماوەری ناڕازی بەهەڵویستی خۆیان هوشیارانە ڕووبەڕویان کردنەوە. هەربۆیە پیویستە خەڵکی ناڕازی پیرۆزبایی لەخۆیان بکەن و بە دەستخستنە ناو دەستی یەک و بەیەکگرتوکردنی هێزی چینایەتی و خەباتکارانەیان ئەم سەرکەوتنەیان بکەنە دەستمایەیەک بۆ دریژەدان و بەرین کردنەوەی بەناڕەزایەتیەکانیان تا یەکلاکردنەوەی چارەنوسی خۆیان لەگەڵ ئەو دەسەڵاتە ستەمکارەدا کەژیانی ئەوانی هاڕیوە.
کرێکاران، زەحمەتکێشان، ژنان و لاوانی پڕ ئومێد!
هەڵبژاردن تەوا بوو.. بەڵام کێشەی نیوان ئێمە خەڵکی ناڕازی و ئەم دەسەڵاتە تاڵانچیە نەبڕاوەیە. سینارێۆیەکی گاڵتەجاڕی کەبەفشاری ئەمریکاو دەوڵەتانی ڕۆژائاواو نەتەوەیەکگرتوەکان، داسەپێندرا، لەبنەرەتەوە بۆ ئەوە بوو کەدەسەلاتە داتەپیو وگەندەڵەکەی عێراق، کەلەبەرئەنجامی راپەڕینی خەڵکی برسیو نەداردا، دارماوە، سازبدەنەوەو بۆ چوارساڵی تر دەستی تیرۆریستان و ئینسانکوژانی ئیسلامی و قەومی و تایەفەگەری و هێزی میلیشییان بەسەر سەری کۆمەڵگادا رابگرنەوەو دەستبەرنەوە بۆ دەورەیەکی تر لەستەمگەری و دزی و تاڵانچێتی و ژیانی ئێمە جەماوەری ناڕازی و زەحمەتکێش لەژێرباری گرانی و هەژاریو بێکاری و نەبوونی خزمەتگوزاری هەرچی زیاتردا بخنکێنن.
لەکوردستانیش چینی بۆرژوازی کوردو حزبەکانی، هەم هەڵبژاردنەیان لەسەرحسابی ژێرپێنانی بڕیارو ویست و ئیرادەی خەڵکی کوردستان، کردۆتە دەستمایەیەک بۆ قایمکردنی پێگەی خۆیان لەبەغداو رازیکردنی ئەمریکاو دەوڵەتانی کۆنەپەرستی ناوچەکە، تا پۆست و پلە وەربگرن و لەداهاتو بۆدجەدا شەریک بن و دەرگاش لەبەردەم کۆمپانیاکانیاندا ئاوەڵابکەن، لەبازارەکانی عیراقدا سەرمایەو قازانج کۆبکەنەوە. ئەوان دەیانەوێت خەڵکی کوردستان بکەنە وەسیلەی بەدیهێنانی ئەم ئامانجە گڵاوانەی خۆیان و هیچ باکیشیان لەوە نییە کەژیان وچارەنوسی خەڵکی کوردستان بەنرخی قوربانیدانی گەورەو گران، بەدیار گێژواێکی سیاسی و کێشمەکێشی چەندیدن دەستەوتاقمی ئینسانکوژی ئیسلامی و تیرەگەری و هیزی میلیشیایانەوە بۆ چەند ساڵی تر رابگرنەوە. کەوایە ئیتر کاتی ئەوە هاتوە کۆتایی بەم یاریە چەپەڵەی حزبەکانی بزوتنەوەی کوردایەتی بهێنرێ و سنورێک بۆ دەسەڵات و تاڵانچێتیان دابنرێ.
ئەگەر ئێمە جەماوەری ناڕازی توانیمان بەخەباتی یەکدەستانەمان، هەڵبژاردنەکەی ئەوان ڕێسوا و ڕەتبکەینەوە، ئەوادەبێ هەنگاوی دواترمان ڕوو لەخۆ کۆکردنەوەو ئامادەکردنی هێزی چینایەتیمان بێت بەئاڕاستەی وەلانانی ئەم دەسەڵاتەو گەیشتن بەدەسەڵاتدارێتی جەماوەریمان. دەبێ بەدرێژەدان و بەرینکردنەوەی ناڕەزایەتیە بەرهەقەکانی خۆمان و بەکۆبوونەوە لەدەوری خواستەکانمان، ناوەندەکانی کار وژیان، کارگەو گەڕەکو زانکۆکان وناوەندی شارەکان بکەینە سەنگەری خەبات بۆ کۆتاییهێنان بەم دەسەلات و سیستەمە تاڵانچیە. دەبێ بەسازدانی کۆبوونەوە گشتیە جەماوەریەکانمان و بەهەڵبژاردنی نوێنەران و خۆڕێکخراوکردنمان لەشوراو ئەنجومەنەکاندا، هەنگاو بەرەو بەڕیوەبردنی کۆمەڵگا هەڵگرین و بناغەکانی دەسەڵاتدارێتیمان دامەزرێنین. بێگومان خۆجیاکردنەوە لە ئاسۆی بزوتنەوە بۆرژوازییەکان و کۆبونەوە لەژێر ئاڵای خەباتی سۆشیالیستانەی چینی کریکار و شۆڕشەکەی، مەرجی زامنکردنی سەرکەوتن و گەیشتنە بەکۆمەڵگایەکی ئازادو یەکسان و خۆشگوزەران. حزبی کۆمۆنیستی کریکاریی کوردستان ئاڵاهەڵگری راماڵینی هوشیارانەی دەسەڵات و ئەم خەباتەی چینی کرێکار و جەماوەری زەحمەتکێشی کوردستانە. کەوایە وەرن با پێکەوە داهاتووی خۆمان لەدەست بگرین.

حزبی کۆمۆنیستی کرێکاریی کوردستان

١٣/١٠/٢٠٢١

Leave a Reply

Your email address will not be published. Required fields are marked *

*

%d bloggers like this: