پێش ئه‌وه‌ی مه‌یسوون شه‌هید بێ

فله‌یحه‌ حه‌سه‌ن:

و : نه‌ژاد عزیز سورمێ:

 

پێش ئه‌وه‌ی مه‌یسوون(1) شه‌هید بێ

ئاسمان به‌ ڕاستی شین بوو

شه‌قامه‌كان فراوانتر

ژنان ئێواران له‌ به‌ر ده‌رگا  داده‌نیشتن

حیكایه‌تیان ده‌هۆنییه‌وه‌

چایخانه‌كانیش به‌ پێكه‌نینی پیاوان شلۆغ ..

باوكم ده‌گڕژییه‌وه‌ كه‌ ڕایده‌سپارد :

( فله‌یحه‌) بۆ ساڵۆنی جوانكاری

له‌گه‌ڵ خۆت مه‌به‌

ڕه‌نگی خۆر له‌ قژت بده‌

لێ با شه‌وقی شه‌و

به‌ قژی منداڵه‌كه‌ بمێنێته‌وه‌ ..

وه‌ڵام ده‌داته‌وه‌ :

ئه‌م (ناو)ـه‌ت قورسه‌ ،

ئه‌و شیعره‌ی لێ ناتكێ له‌ ڕۆحت دایه‌

له‌باتی تۆبم ده‌یگۆڕم ..

هه‌موومان پێده‌كه‌نین ..

……….

دایكم له‌ گشتمان گه‌رم و گوڕتر بوو

  • باوكم ده‌یگوت ،

بۆ ئه‌وه‌ی سۆزتان له‌بیر نه‌كه‌ن

له‌سه‌ر یه‌ك سێنی كۆ ببنه‌وه‌

ئێمه‌ش وامان ده‌كرد ..

……….

دوای كۆچی تۆ

دونیا كراسی خۆڵی پۆشی

بای شه‌ڕ

شۆسته‌ی شه‌قامه‌كانمانی ماڵی

ئێستا ژنان هه‌میشه‌

ڕه‌ش و خه‌م ده‌پۆشن

چایخانه‌ی گه‌ڕه‌كه‌كان

به‌ ده‌نگی

به‌یاننامه‌ درۆینه‌كانی سه‌ركه‌وتن

شلۆغن

كه‌ پێشكه‌شكارێك ده‌یخوێنێته‌وه‌

به‌ نهێنی

به‌ خه‌ڵك پێده‌كه‌نێ ..

ده‌نگی پیاوانی گه‌ڕه‌كێ

به‌ جگه‌ره‌ و

هه‌ڵدانی پیاڵه‌ی شكست كه‌رخ بووه‌ .

كۆچی تۆ

ڕه‌نگی به‌فری به‌سه‌ر قژمدا  پرژاند

كه‌ من هێشتا خۆشه‌ویستی تۆم

له‌ چه‌ند ساڵێكی كه‌م تێنه‌په‌ڕاندووه‌ .

قۆناخی به‌رایێ بوو

ڕۆح به‌به‌ر خوێنبه‌ره‌كانتدا بدرێ

تا بزانم

ئه‌وه‌ی تێیدا دێ و ده‌چێ خوێنه‌

یا خواوه‌ند

له‌ دره‌خت هاشه‌ی گه‌ڵاكانی و

له‌ هه‌ور ساوی په‌مۆیی و

بنچینه‌ی شه‌ونمی به‌یانیان

كه‌ تۆ له‌وی

هه‌ڵێنجاوه‌ ؟

گه‌ر نه‌ختێ خۆت گرتبا

ده‌تبینی چۆن ( به‌ختیارترین مرۆڤ له‌ دونیا) (2)ده‌نووسرێ

پێشكێش كردنی دیوان بۆ :

  • فله‌یحه‌ ، ئه‌و ناوه‌ی فریشته‌ی شیعر خۆشی ده‌وێ ،

ته‌نانه‌ت خواوه‌ندیش بۆی ده‌مرێ ..

ناوه‌كه‌ سه‌ركه‌وت

لێ تۆ به‌ مه‌رگ

ناپاكیت له‌گه‌ڵ كردم

دایكیشم به‌ جێهێشتنم خیانیتی لێ كردم

باوكیشم

ئه‌ویش لێمان جیا بووه‌وه‌ و

فه‌وتا ..

هه‌موو ئامۆژگارییه‌كانی

له‌ گوێی به‌ردین دایه‌

نانمان

له‌سه‌ر كۆمه‌ڵێك خوان دا  خوارد

تێر بووین

له‌ شه‌ڕ و ئابلووقه‌ و نه‌بوونی و

لێك جودایی و ده‌ربه‌ده‌ریی

وام لێ هات

كه‌ هاوارم ده‌كرد برا

(ئه‌لیف) لێ ده‌چووه‌وه‌ و

منیش له‌ په‌شیمانییان

دڵی خۆم ده‌گه‌سته‌وه‌..

مه‌یسوون ، ئاخر چۆن بڕوا بكه‌م

ڕۆكێتێكی ئێرانی

به‌سه‌ر ماڵێتدا بكه‌وێت و

تۆ به‌و خێراییه‌ بتوێیه‌وه‌ ..؟

چۆن باوه‌ڕ بكه‌م

تۆ شتێك

به‌ده‌ر له‌ عه‌باكه‌ی خۆت

بۆ كفنت نه‌دۆزییه‌وه‌

گۆڕێكت نه‌بێ له‌ باخچه‌ی خۆتان زیاتر ؟

چۆن ؟

سوودی ده‌بێ نه‌فره‌ت له‌ یه‌كیان بكه‌م

تا بگه‌ڕێیه‌وه‌ ؟

به‌سه‌ ،

به‌س  سه‌ما له‌ یاداوه‌ریم بكه‌

ته‌نیا ده‌ خووله‌كم پێ بده‌

به‌ ئارامی بنووم .. تكایه‌

ده‌ خووله‌ك ، زیاتر  نا

من زۆر ماندووم

به‌ ژماردنی  كوژراوه‌ بێ گوناهه‌كان .

 

ئاماژه‌

  • مه‌یسوون حه‌سه‌ن كه‌موونه‌ ، تاكه‌ ده‌سته‌خوشكی مناڵیم

كه ‌له‌ ڕۆكێت بارانێكدا شه‌هید بوو سه‌رده‌می شه‌ڕی ئێران – ئێراق .

  • – به‌ختیارترین مرۆڤ له‌ دونیا – كۆشیعرێكی شاعیری كۆچكردوو

( كزار حه‌نتووش)ـه‌ كه‌ به‌ ده‌ستی خۆی ئه‌وه‌ی له‌سه‌ر نووسیبوو .

 

(*) له‌ ( الحوار المتمدن)ـه‌وه‌ ژماره‌ 4605

بڕوانه‌ :

 

https://www.ahewar.org/debat/show.art.asp?aid=437491

 

 

 

 

 

 

 

 

Leave a Reply

Your email address will not be published. Required fields are marked *

*

%d bloggers like this: