ئێمەش بڕیارمانداوە سیخوڕە جۆراوجۆرەکان و دەستەکانیان لە کوردستان وەدەربنێین، بەڵام ئەو بڕیارە لە دادگەی گەل دەدرێ نەک لە پشت بڵندگۆی سەرۆکایەتیی هەرێم!

بە داخەوە وەک دەیبینین رۆژ لە دوای رۆژ ئازادییەکان بەرتەسک دەکرێنەوە لە کوردستان، تەنانەت کار بەوە گەیشتوە کەسوکاری گیراوانیش رێگەیان پێنادرێ گردببنەوە و بۆ رای گشتیی روونبکەنەوە کە گیراوەکانیان بێسەروشوێن کراون و زۆر بە کەمیی ئاگاداری رەوشی ژیانیانن لە نێو زیندانەکاندا!

ئەوە ئاشکرایە کە لە ژێر سایەی ھەر دەسەڵاتێکدا گیراوی رامیاریی ھەبوون یان چالاکوانان و رۆژنامەنووسان تەنیا بە ھۆی پیشەکانیان و ئازادیی دەربڕینەوە لە زیندانەکان ئاخنران.. ئەوە بێ سێ و دوو ئەو دەسەڵاتە سەرکوتگەر و دیکتاتۆرە، ئێستا لە ھەرێمی کوردستان نەک هەر رۆژنامەنووسان و چالاکوانان بەڵکە کەسوکارەکانیشیان دەگیرێن و زیندانیی دەکرێن، ئەوە راستە کە دەسەڵاتە دیکتاتۆرەکانی پێشان بە دڕندانەترین شێواز دژ بە ئازادییخوازان وەستاونەتەوە.. بەڵام ئەو جۆرە پێشێلکارییە بۆ ئەمڕۆ لە لایەن دەسەڵاتدارانی کوردستانەوە داهێنانێکی تازەیە و بێجگە لە هەنگاونان بەرەوە فاشیزم هیچی دیکە نییە.. کەچی دەسەڵاتدارانی ئەمەریکا و ئەوروپای بە ناو شارستانیەت و پێشکەوتنخواز تەپڵی دیموکراسیی و مافی مرۆڤیان بۆ دەکوتن.. ئێستا هەر کەسێک کە لە کوردستانەوە لە ژێر جەور و ستەمی دەسەڵاتداران و پارتیەکان بەرەو ئەو وڵاتانە ئاوارە دەبێ ئەوە یەکسەر پێیدەڵێن لە کوردستان ئاسایش و ئارامیی هەیە و هەموو کێشە و گرفتەکان لە رێگەی پۆلیس و سەروەریی یاسا و دادوەرییەوە چارەسەردەکرێن!!!

کەواتە ئێستا بارودۆخی ئازادییخوازان زۆر قورستر بووە .. چونکێ جاران تەنیا چالاکیی و هەڵمەتەکانیان بۆ ئەوە دەکردن کە دەسەڵاتداران ناچار بکەن و ملبدەن بەوەی کە گیراوەکان مافی هەبوونی پارێزەریان هەبێ و بە پێی یاسایە پەیوەنددارەکان دادگایی بکرێن و لەسەر ئازادیی دەربڕین زیندانیی نەکرێن.. بەڵام ئێستا دەبێ هاواری ئازادکردن و پاراستنی کەسوکارەکانیشیان بکەن.

هەڵبەتە ئەو گوشارە نوێیەش لە لایەکەوە بۆ ئەوەیە کە گیراوان و بێسەروشێنکراون دان بەو درۆیە هەڵبەستروانەدا بنێن کە پێیانەوە سووچبار کراون و دوور و نزیک هیچ پەیوەندییەکیان بە کار و چالاکییەکانی ئەوانەوە نییە و تەنیا لە لایەن دەزگە سیخوڕییە داپڵۆسێنەرەکانی دەسەڵاتەوە دروستکراون.. لە لایەکی دیکەش بۆ ئەوەیە کار و چالاکیی هەموو ئەو کەس و رێکخراو و لایەنانە قورستر بکەن یان هەر بە بنبەستیان بگەیەنن کە بەرگریی لە گیراوەکان و کەسوکارەکانین دەکەن و بە شێوەیەکی گشتیی بە دوای ماف و ئازادییەکانی خەڵکەوەن، هەر بۆیە هیچ نامۆ نییە کە سەرۆکی حکومەت لە نوێترین دەرکەوتنیدا کە هێشتا گیراوەکان لە ژێر لێکۆڵینەوەی دەزگە سیخوڕییەکانی خۆیاندان و دادگەیی نەکراون هەر لە پشت مێزە شاهانەییەکەی خۆیەوە خۆی لێدەبێتە دادوەر و قەرەقۆشییانە لەجیاتی دادگە و دادوەران بڕیار دەدا و دەڵێ: ”ئەوانە نە چالاکوان بوون نە رۆژنامەنووس، هەندێک لەوانە سیخوڕ و تێکدەر و چەکدار و بوون هەوڵی تەقاندنەوەی باڵەخانە و کوشتن و بڕین و رفاندن و تێکدانی باروخەکەیان کردوە”! سەرنج بدەن ئەوە بە هیچ شێوەیەک سووچبارکردن نییە بەڵکە بڕیاردانە لەسەر تاوان بە بێ دادگەییکردن، واتە تەنیا ئەوە بۆ دادوەران و دادگە رووکەشەکەیان دەمێنێتەوە کە لە سیناریۆیەکی رامیاربازیی و بە ملکەچیی بڕیارەکەی سەرۆکی فەرماندە (خوا بیپارێزێ!) وەک خۆی جێبەجێ بکەن! ئەوەش بۆ خۆی یەکێکە لە ئاکاری دەسەڵاتی دیکتاتۆریی کە تێیدا ئازادییخوازان رەشبگیر دەکرێن و بە تاوانگەلێک سووچبار دەکرێن کە پەیوەستدار نین بەوانەوە و بەر لە دادگەییکردنیشیان دەسەڵاتداران بڕیار لەسەر تاوان و تەنانەت سزایەکانیش دەدەن.. واتە کاری دادوەران تەنیا جێبەجێکردنە وەک پۆلیس!

بێ گومان رەنگە ئەو بارودۆخە تۆقێنەرە چالاکوانان و رۆژنامەنووسان و بەرگرییکاران لە ماف و ئازادییەکان بە جۆرێک لە جۆرەکان سارد بکاتەوە و تووشی رەشبینییان بکا، بەڵام پێویستە ئەوەش بەبیر خۆمان بهێنینەوە کە ئەو دەسەڵاتدار و پارتییانە بێجگە لەوەی دەستیان سوورە بە خوێنی سەرجەم گیانبەختکردووانی شەڕە نێوخۆیەکانیان و ململانێیەکانیان لەسەر دەسەڵات.. هەر دوێنێش بوو بە سەدان و بە هەزاران کەسیان لە رۆژنامەنووسان و چالاکوانان و ژنانی ئازادییخواز و رەوت و لایەنە چەپ و یەکسانییخوازەکان و بەرهەڵستکارانی پارچەکانی دیکەی کوردستان تیرۆرکردن، بەڵام هەر خەبات و تێکۆشانی ئازادییخوازانیش بوو توانی ئاساتێکیان بۆ دابنێن کە نەتوانن چیدی شەڕی نێوخۆ هەڵبگیرسێن و راستەوخۆ خەڵک تیرۆر بکەن، هەرچەندە ئەو دیاردەیە زۆر مەترسییدارە کە ئێستا بە ناو بەرپرسانی هەرێم رێک وەک دەسەڵاتە سەرکوتگەر و دیکتاتۆرەکان کاتێک کە ناتوانن راستەوخۆ خەڵک تیرۆر بکەن ئیدی تاکتیکەکەیان دەگۆڕن.. ئەوانیش بە هەمان شێوە دەستیانکردوە بە گرتن و زیندانییکردنی ئازادییخوازان و هاوکاتیش بە سیخوڕ و تێکدەر و دەستی دەرەکیی سووچباریان دەکەن – ئەوە لە کاتێکدا خۆیان لە ماوەی ٦٠ ساڵی رەبەقی مێژووە قێزەونەکەیان بە ئێستاکەشیانەوە هەمیشە سیخوڕ و فەرمانبەر و داردەستی بەعس، موساد، سی ئای ئەی، ساواك، ئیتلاعات و میتی تورکی بوونە.. دەستیان لەگەڵ داعش و رێکخراو و لایەنە تیرۆریستە دینییەکانی دیکە و حەشدی شەعبی هەبووە.. وەک مافیاگەلێکی بەکرێگیراو لەگەڵ کۆمپانیایە جۆراوجۆرەکانی بازرگانان و سەرمایەدارە چاوچنۆکەکە دەرەکیی و نێوخۆییەکان و بەرژەوەندییەکانی بانکی جیهانیی و سندوقی دراوی نێودەوڵەتیی لە هەڵلووشینی سامانی سەر زەوی و ژێر زەوی کاریانکردوە و کوردستانیان بەو تاریکستانەی ئێستا گەیاندوە – بە کورتییەکەی بۆ ماوەیەکی زۆر گیراوەکان بێسەروشوێن دەکەن و کەسوکارەکانیشیان ئازار و ئەشکەنجە دەدەن و دەستبەسەریان دەکەن ئەگەر سادەترین هەڵوێست و ناڕەزایی بنوێنن.. سەرئەنجامیش ئەگەر نەتوانن لەنێویانببەن ئەوە راپێچی ئەو دادگە کارتۆنییانەیان دەکەن کە تەنیا یاسایان تێدا جێبەجێ ناکرێ و سزاگەلێکی هێندە نابەجێ و دژەمرۆییانەیان بەسەردا دەسەپێنن کە ناکۆک بن لەگەڵ سادەترین و سەرەتاییترین مافەکانی مرۆڤ! بەڵام دیسان هیچ چار نییە و هەر دەبێ ئەو ئازادییخوازانەی ئێستا بە تایبەتییش هی نەوە تازە و چاوکراوەکان وەک چۆن ئێستا مرۆڤایەتی خەریکە ڤایرۆسی کۆرۆنا تێدەپەڕێنن ئەوانیش پێویستە بە یەکگرتوویی خۆیان ئەو ڤایرۆسەی دەسەڵاتداران تێبپەڕێنن!

ئێمە وەک ”ناوەندی کاری ئازادیی دەربڕین” زۆر بە توندیی ئەو رەفتار و رێکارە دژە ئازادییانەی دەسەڵاتداران لە بەرانبەر سەرجەم گیراوان سەرکۆنە و ریسوا دەکەین.. هۆشدارییان دەدەینێ کە ئەو بارودۆخەی ناڕەزایەتی دەربڕینی هاوڵاتییان لە بەرانبەر سەرکوتکردن و برسییکردنیان سەرئەنجامی ملهوڕیی و گەندەڵکارییەکانی ئەوانە.. هەر ئەوانیش بەرپرسن لە گیان و مانی ئەو گیراوانە و دەبێ هەر ئێستا و دەمودەست ئازادییان بکەن و قەربووی هەموو زیانەکانیشیان بکەنەوە. هەڵبەتە ئێمە رووی دەممان تەنیا لە پارتی (کە دەسەڵاتداری دەڤەری هەولێر و بادینانە) نییە کە ئاشکرایە ئەو گیراوانە لە لایەن پاراستن و ئاسایشی ئەوانەوە بەندکراون و ئەو سیناریۆیەی دادگەییکردنیان بۆ دروستکردوون.. بەڵکە هەموو ئەو پارتی و لایەنانەش بە بەرپرسیار دەزانین کە لە دەسەڵات بەشدارن یان لە دەرەوەی دەسەڵاتن و بە پێی خۆیان لە ئافەریدەکردنی ئەو رەوشە مەترسییدار و سەرکوتگەرییەی ئازادییەکانی دەربڕین و گەڕاندنەوەی کۆنەپەرستیی و دروستکردنی بێکاریی و بێ مووچەکردن و بەشمەینەتییەکانی خەڵکی کوردستان بەشدارن.

جا ئێمە پەیگیریی لە ئازادیی بێ بەند و مەرجی رێکخراوبوون و هەر جۆرە کار و چالاکییەکی رامیاریی و فەرهەنگیی و کۆمەڵایەتیی ٩٩٪ی خەڵکی کوردستان دەکەین.. هەموو ئەو پارتی و لایەنانەش شەرمەزار دەکەین کە دەبنە لەمپەر و دەیانەوێ لە رێگەی گرتن و دادگە رووکەش و نایاسییەکان و ئەشکەنجەدان و کوشتن و بڕینەوە بەریان پێبگرن.

ئیدی ئازادییەکان لێرە لەسەر زەوین و هەر کە رێڕەوی ئاسایی خۆیان وەرگرت
هیچ دەسەڵاتدارێک هەرچەندەی ستەمگەریش بێ ناتوانێ خۆی لەبەریان رابگرێ.

نێوەندی کاری ئازادیی دەربڕین
١٢\٢\٢٠٢١
rojnamen@yahoo.com