دادگای دهۆك ئازادكردنی “بەدەل بەرواری” بەكەفالەت رەتكردەوە

بەپێی قسەی یەكێك لە پارێزەرە خۆبەخشەكانی، ئەمڕۆ یەكشەممە، دادگای دهۆك داوای ئازادكردنی بەدەل بەرواری، چالاكوانی ئەو شارەی بە كەفالەت رەتكردۆتەوە لە یەكێك لە كەیسەكانیشیدا بە دو ملیۆن دینار سزای ناوبراوی داوە.

خەتاب عومەر، پارێزەری خۆبەخشی بەدەل بەرواری، لە راگەیەندراوێكدا ئاشكرایكرد: ئەمڕۆ یەكشەممە، دادگای دهۆك لە كەیسێكدا بەتۆمەتی خراپ بەكارهێنانی ئامێرەكانی پەیوەندی، سزای دو ملیۆن دینار غەرامەی بەسەر ناوبراودا سەپاندوە.

هێمای بۆ ئەوەش كرد كە ئێمە بە هیچ شێوەیەك وەك پارێزەری بەدەل بەرواری بڕیارەكە بە یاسایی نازانین و بڕیارەكەش تەمیز دەكەینەوە.

خەتاب عومەر ئاماژەی بەوەشداوە كە هەروەها دادگا داواكارییەكی ئێمەی بۆ ئازادكردنی بەدەل  بەرواری بەكەفالەت رەتكردەوە كە سكاڵایەكی دیكەی لەسەرە بە هەمان تۆمەت.

ئەو پارێزەرە وتوشیەتی”من وەك بۆچونی خۆم پێموایە ئەو جۆرە بڕیارانە بەناوی یاساوە هەڕەشەن لەسەر مافەكانی مرۆڤ و دیموكراسی و كاریگەری راستەوخۆیشیان لەسەر هەیبەتی دادگا هەیەو بە یاسا، رەوایەتی دەدەنە كارە ناڕەواكان.”

لەناوەڕاستی مانگی رابردودا، بەدەل بەرواری، مامۆستاو چالاكوانی مەدەنی لە شاری دهۆك لەپەیوەند بەخۆپیشاندانەكانی ناوچەكەوە، لەلایەن ئاسایشەوە دەستگیركراو وێڕای داواكارییەكی زۆری رێكخراوەكان و چالاكوانان بۆ ئازادكردنی بەڵام تاوەكو ئێستا لە زیندان هێڵراوەتەوە.

 

Leave a Reply

Your email address will not be published. Required fields are marked *

*

%d bloggers like this: