ئەم سیستەم و حکومەتە دەبێ بڕۆن.. ئیتر نۆرەی دەسەڵاتدارێتی جەماوەریە!

ئەم سیستەم و حکومەتە دەبێ بڕۆن.. ئیتر نۆرەی دەسەڵاتدارێتی جەماوەریە!

نەخشەڕێگای حزبی کۆمۆنیستی کرێکاری بەرامبەر بە بنبەستی حکومەت و دۆخی ئێستای کوردستان

ووتاری چەند ڕۆژ لەمەوبەری سەرۆک وەزیرانی کابینەی نۆهەم، مەسروربەرزانی، بەوەی کە بێتوانایە لەوەڵامدانەوە بەژیان و گوزەرانی هاوڵاتیان و دابینکردنی مووچەی کرێکاران و فەرمانبەران، جارێکی تر فەشەل و بنبەستی حکومەت و ئەو سیستەمە دەسەڵاتدارێتیەی ئاشکراکردەوە، کەئەحزابی بۆرژوازی کورد، نزیک بەسێ دەیەیە بەسەر خەڵکی کوردستاندا دایان سەپاندووە.

بەڵام ئەم بنبەست و فەشەلەی حکومەت، ڕیشەی لەقەیرانێکی هەمەلایەنەی ئەو سیستەمە ئابوری و سیاسیەدایە کەلەسەر بنەمای قازانجهێنەری سەرمایەداران و دزینی بەری ڕەنجی کرێکاران و خەڵکی زەحمەتکێش و دەسەلاتدارێتی ئەحزابی میلیشیایی و ناوچەیی دامەزراوە. سیستەمێک لە حوکمڕانی کە لەگەڵ هاتنی ڤایرۆسی کۆرۆنا و قوڵبوونەوەی قەیرانی جیهانی سەرمایەداری و کاریگەریەکانی بۆسەر ناوچەکەو عێراق، بەیەکجاری چەقی و لەئاست درێژەدان بەڕەوتی ئاسایی بەرهەمهێنانی سەرمایەداری و وەلامدانەوە بەژیان و سەلامەتی تەندروستی هاوڵاتیانی کوردستاندا، بێتوانا ماوەتەوە. ئەم دۆخەش لەلایەک ناکۆکی و درزێکی خستۆتە نێوان حزبە پێکهینەرەکانی حکومەتەوە و هاوکات دەمی گلەیی و گازندەو ناڕەزایەتی حزبە بەناو ئۆپۆزسیۆنەکانی ناو پەرلەمانی لەبەرامبەر دەسەڵاتدا کردۆتەوە. لەلایەکی تریشەوە ڕق و توڕەیی خەڵکی کرێکارو زەحمەتکێشی بەرامبەر گشت سیستەمی حوکمڕانی بەوپەڕی خۆی گەیاندووە و ئەوانی لەبەردەم ئەگەری شەپۆلیکی تر لەهاتنەمەیدان و ناڕەزایەتی بەرینی جەماوەریدا ڕاگرتووە. بەمجۆرەش مەسەلەی دەسەڵاتی سیاسی و ئایندەی کۆمەڵگای کوردستانی وەک یەکێک لە مەسەلە هەرە سەرەکیەکانی بەردەم خەباتی چینایەتی کرێکاران و جەماوەری زەحمەتکێش و گشت چینی بۆرژوازی کوردو حزبەکانی، بەقەومی و ئیسلامیەوە داناوەتەوە.

لەڕیزی پێشەوەی حزبە بۆرژوازیەکاندا، پارتی دیموکراتی کوردستان، هەموو هەوڵ و تەقەلایەکی خۆی خستۆتەگەڕ، تەنانەت بەسوود وەرگرتن لەپەتای کۆڕۆنا، تا بەهەر نرخێک بووە هەژمونی و باڵادەستی خۆی بەسەر دۆخەکەدا بپارێزی. لەم ئاراستەیەشدا، دەستبردن بۆ ڕاکێشانی هێزی میلیشیا و توندکردنەوەی فەزای سەرکوت و بەرتەسکردنەوەی ئازادیەکان، تائەو شوێنە زەرورەتی بۆ پەیدابووە، کە ئامادەیە ئەو ڕیکەوتنە سیاسی و حکومی و پەرلەمانیەی لەگەڵ حزبەکاندا پێکیهیناوە، بخاتەژێر پێیەوە.

یەکێتی نیشتمانی، بەسوود وەرگرتن لە مایەپووچی حکومەت و ئەو تەنگانەیەی ڕووبەرووی پارتی بۆتەوە، کەوتۆتە پۆزی “ئەنتی پارتی”یەوە. لەلایەک بەراکێشانی حزبەکانی تر بۆ ژێر چەتری خۆی و لەلایەکی تر بەهێنانەگۆڕی “لامەرکەزیەت”، کەوتۆتە شوێن ئامانجی هەستانەوەی هاوسەنگی هێزی خۆی لەبەرامبەر پارتیدا تا ناچاری بکات مل بدات بەچارەسەری کێشە کۆنەکانی نیوانیان و لێڕەشەوە ئیمتیازاتی زیاتری سیاسی و ئابوری لێوەربگرێ. باسی لامەرکەزیش کە لەلایەن یەکیتیەوە وەک ڕێگاچارەیەک بۆ دەرباز بوون لەقەیرانی ئێستا دەخرێتەڕوو، جگەلەوەی تاکتیکێکی سیاسیە بۆ ڕاکێشانی بزوتنەوەی گۆڕان و حزبە ئیسلامیەکان، هاوکات ڕاگرتنی شمشێرێکە بەسەر سەری پارتیەوە. ئەمە لەکاتیکدایە کە لامەرکەزیەت لەژێر سێبەری هێزی میلیشیا و دژە تیرۆردا، نەک هەر فەزای سەرکوت و ئەگەری پەلاماردانی چەکداری لەکۆمەڵگادا ناڕەوێنێتەوە، بگرە لەرووی ئابوریەوە دەستی سەرمایەداران و کۆمپانیاکانی بازرگانی و پڕۆژە ئابوریەکانی ناوچەی سەوز ئاوەڵادەکات تا ڕاستەوخۆ لەگەڵ حکومەتی عێراق و دەرەوەدا بکەونە مفاوەزات و ڕێکەوتنە بازرگانی و ئابوریەکانەوە، لێرەشەوە ژیان و بژێوی خەڵکی کرێکارو زەحمەتکێش لەژێر ڕەحمەتی کۆمپانیا مۆنۆپۆلەکانی ناوچەی سەوزدا رابگرێ.

بزوتنەوەی گۆڕان، لەگەڵ ئەوەدا کە لەژێر کاریگەری توندبونەوەی ناکۆکیەکانی نیوان پارتی و یەکێتیدا، تا دێت جێگاوڕێگای خۆی لەدەست دەدا و ڕووبەڕووی هەرچی زیاتری ناکۆکی ناوخۆیی حزبی و لێکترازانی ڕیزەکانی دەبێتەوە، هاوکات هێشتا مانەوە لە حکومەتێکی مایەپووچدا، بەرێگای گەیشتن بە”حکومەتێکی نیشتمانی” دەزانێت کەبەهۆیەوە “چاکسازی لەدۆخی ژیان و گوزەرانی هاوڵاتیان”دا بەدیبهێنێت و بەپێی “بەرژەوەندیە نەتەوەییەکان” لەگەڵ بەغدادا بسازێت. سیاسەت و بەدیلێکی ئاواش بەناچاری خاوەنەکەی لەبازنەی هێزێکی تەواوکەری سیاسەتەکانی پارتیدا، دادەنێتەوە.

حزبە ئیسلامیەکان، کە ئیدعای ئۆپۆزسیۆن دەکەن، دەیانەوێت بەدیفاعکردن لە”موئەسەساتی قانونی”، کە زیاتر مەبەستیان دەستگرتنە بە پەرلەمان و کاری پەرلەمانیەوە، تا بەرنامەی چاکسازی لەحکومەت و داهاتەکان و نەهێشتنی گەندەڵیدا بکەن و “بەدیدێکی نێستمانی و نەتەوەییەوە” لەگەڵ بەغدا بسازێن، ئەمەش وەک ڕێگاچارەیەک بۆ دەربازبون لەقەیرانی ئێستا باس بکەن. جوڵانەوەی نەوەی نوێ کە لەبەرگی “ئۆپۆزسیۆنێکی پەڕگر”دا خۆی هەڵخستوەو بەشیعاری “بڕۆن بڕۆن”ەوە، هانی خەڵک دەدات تا بڕژێنە سەرشەقام، هەموو هەوڵی بۆ ئەوەیە دەموچاوە بەرپرسەکانی ئەم سیستەمە لە ئابوری و کۆمپانیاکان و حوکمڕانی حزبەکان، بگۆڕێ بەکەسانێکی تر لەخۆیان. بەتایبەتی کە ناوەڕۆکی بەدیلەکەی شتێکی جیاواز نییە لە پێداگریکردن لە هەڵبژاردنێکی تر و مانەوەی پەرلەمان و “ڕێکەوتنێکی شەفاف” لەگەڵ عێراقدا.

ڕۆڵ وکارکردی ئەم حزبانە، لەگەڵ ئەوەدا ناکۆکی و جیاوازییان هەبێت لەگەڵ یەکتردا، بەڵام وەک نوێنەرانی ڕەنگاو ڕەنگی چینی سەرمایەدارو بۆرژوازی کورد، هەر هەموویان لەسەر ئەو ستراتیژە هاوڕا و یەکگرتوون کە لەلایەک ئەو قەیرانە ئابوری و حکومەتیەی بەرۆکی بەئەزمونەکەیان گرتوە، لەسەر بنەمای چاکسازی لەحکومەت و سیستەمی ئیستا و ڕێکەوتنیان لەگەڵ حکومەتی عێراقدا، چارەسەر بکەن و لەلایەکی ترەوە، ڕێگەبگرن لەگۆڕینی ئەم قەیرانە بەقەیرانێکی شۆڕشگیرانە، بەجۆرێک کە دەورو دەخاڵەتی چینی کرێکار و زەحمەتکێش، ناکام بکەنەوە. ئەوەشی کەئەم حزبانە چ لە ڕابردووداو چ لەئیستادا، لەژێر پەردەی پشتیوانی لەخەڵک و خواستەکانیان، خۆیان هەڵدەخەن، هەر بۆ ئەوەیە کە سواری شەپۆلی ناڕەزایەتی بەرهەقی خەڵک ببن و بۆ یەکلاکردنەوەی کێشەی کۆنەپەرستانەی ناوخۆی خۆیان و دوبارە سازدانەوەی بازاڕی سەرمایە و دەسەڵاتدارێتی بۆرژوازی کورد، و بەردەوامیدان بە دۆخێک کەنزیک بەسێ دەیەیە درێژەی هەیە، بەکاریان بهێنن.

لەجەمسەرێکی تردا، بارودۆخی قەیرانگرتووی ئێستا و مایەپووچبوونی حکومەت، مەسەلەی وەلانانی دەسەڵاتی ئێستا و کۆتاییهێنان بەسیستەمێکی حوکمڕانی کەبۆرژواژی کورد بۆ چەندین دەیەیە دایسەپاندوە بەسەر کۆمەڵگای کوردستاندا، بۆتە ئەرکێکی خێرای سەرشانی چینی کرێکار و بێبەشانی کۆمەلگاوە. توڕەیی و ناڕەزایەتی ئێستای خەڵکی کرێکارو زەحمەتکێش، لەگەڵ ئەوەدا کە لەدژی بێکاری و هەژاری و نەبوونی خزمەتگوزاری و نەدانی مووچە و تاڵانوبڕۆی ئەحزابی دەسەلاتداردا خۆی دەنوێنێ، بەلام لە ناوەرۆکدا بزوتنەوەیەکی حەشارداوە کە لەدژی سەرتاپای ئەو سیستەمە حوکمڕانیە و ئەو دۆخە ئابوریەیە کەسێ دەیەیە ژیانی ئەوانی لەنایەکسانی و ستەم و دەیان دەردو مەینەتیدا ڕاگرتووە، بزوتنەوەیەک کە وەلانانی ئەم حکومەت و دەسەلاتەی کردۆتە خواست و داوای جەماوەرێکی بەرفراوان. بێگومان جوڵانەوەیەکی ئاوا ئەو تواناو قابیلیەتەی هەیە کە بەشیوازێکی شۆڕشگێرانە نەک هەر کۆتایی بە دەسەلاتدارێتی ئێستای حزبە بۆرژوا ناسیونالیستەکان بێهنێ، بەڵکو کۆمەلگای کوردستان بەرەو ئاڵوگۆرێکی ڕیشەیی بەرێت. هاوکات خوپێشاندان و ناڕەزایەتیە جەماوەریەکان لەشارەکانی عێراق و ئیران کەڕاستەوخۆ یەخەی بەدەسەڵاتداران لەم دوو ولاتەدا گرتووە، فاکتۆرێکی کاریگەرە بەقازانجی یەکلاکردنەوەی خیرا و شۆڕشگێرانەی دەسەڵات لەکوردستاندا..

حزبی کۆمۆنیستی کرێکاریی کوردستان، لەگەڵ ئەوەدا کە دامەزراندنی سۆشیالیزم و حکومەتی کرێکاری، لەڕیگای پەرپاکردنی شۆڕشی کۆمەڵایەتی چینی کرێکارەوە وەک تەنها ئاڵتەرناتیڤیک بەرامبەر بەسەرمایەداری و قەیرانەکەی دەزانێ، هاوکات پێیوایە کە گەیشتن بەم شۆڕشەو بەم ئاڵتەرناتیڤە لەدڵی هەلومەرجی ئێستاو بزوتنەوەیەکی شۆڕشگێڕانەی جەماوەریەوە دەگیرسێ کە لەیەکەمین هەنگاوەکانیدا، بۆ خواستی وەلانانی ئەم دەسەلاتە پێدەنێتە مەیدانەوە.

حزبی کۆمۆنیستی کرێکاریی کوردستان لەئێستادا کە کۆمەڵگا لەگەڵ فەشەل و بێتوانایی حکومەت بەرەوڕووە ئەم خاڵانەی خوارەوە وەک سەرخەتی نەخشەڕێگای دەربازکردنی کۆمەڵگای کوردستان و تێپەڕ کردنی ئەم دۆخەی ئێستا دەخاتەڕوو:

یەکەم: ئەم دەسەڵاتەو ئەم سیستمە چاکسازی هەڵناگرن. ئەزمونی چەندین ساڵەی خەڵکی کوردستان چەندینجار ئەوەی سەلماندووە کە خولانەوە لە بازنەی ئەو سیستەمە سیاسیانەی کە ئەحزابی بورژوازی لە ژێرناوی چاکسازی و فیدڕالیزم و دەسەڵاتی قەومی و نیشتمانی و گەل و دیموکراسی و پەرلەمانتاریزمدا، بە بریکاری خەڵک حوکمرانیان کردووە، جگەلە دوبارەکردنەوەی ئەزمونی شکستخواردوی دەسەڵاتی بیروکراتیک و سەرو خەڵکی و راپێچکردنی کۆمەڵگا بۆ ناو کارەسات و بێدەرەتانی و بێمافی هیچی تر نەبوە. لەبەرامبەردا دەسەڵاتدارێتی ڕاستەوخۆی جەماوەری و حکومەتی شورایی، زامنی ئازادی و دیموکراسی ڕاستەخۆ و بەڕیوەبردنی کۆمەلگایە لەلایەن نوێنەرانی هەڵبژێردراوی خەڵک خۆیانەوە.

دووەم: هەرجۆرە بەدیلێک کە لەسەرو ئیرادەو بڕیاری جەماوەری نارازی خەڵکی کوردستانەوە، لەجۆری، “حکومەتی ڕزگاری نیشتمانی”، “حکومەتی کاربەڕێکەر”، “حکومەتی فراوان بەبەشداری حزبەکان”، “هەڵبژاردنی پێشوەختە” .. کە لەلایەن حزبەکان و ڕێکەوتنی نێوانیانەوە وەک جێنشێنی حکومەتی ئیستا، بڕیاری لێدەدرێ، جگە لە کودەتایەک بەسەر خواست و ئیرادەی جەماوەری ناڕازی و دوبارە داسەپاندنەوەی سیستەمی شکستخواردوی ئیستا بەسەر کۆمەلگاوە، شتێکی ترنیە و لەلایەن ئێمە و کرێکاران و خەلکی زەحمەتکێشەوە مەرفوزو ڕەتکراوەیە.

سێهەم: وەلانان و کۆتاییهێنان بە حکومەتی ئێستا بەڕێگایەکی شۆڕشگێرانە، لەڕێگای هەستان و ڕاپەڕینێکی جەماوەریەوە دەبێت کە لەجەرگەی هاتنەمەیدانی فراوانی خەڵکی ناڕازیەوە بۆ خواستی وەلانانی دەسەلات پێیناوەتە مەیدانەوە. واتای کۆتاییهێنان بەدەسەڵاتی ئێستا لەڕیگای راپەڕینێکی جەماوەری شۆڕشگێرانە و سەرکەوتوانەوە لەوەدایە کە هەموو دامودەزگاکانی سیستەمی حکومرانی ئێستا، لەوانە حکومەت و پەرلەمان، سەرۆکایەتی هەرێم و هێزی چەکداری حزبەکان و هەر ئۆرگانێکی دیکە هەڵوەشێتەوە و ڕێگابکرێتەوە بۆ دەخاڵەتی جەماوەری لە بەڕێوەبردنی ولات و بڕیاردانی ئازادانە لەسەر سیستەمی حوکمڕانی داهاتوو. ئەزمونی خۆپیشاندانەکانی ١٧ی شوبات، ڕاپەڕینی شارەکانی عێراق و جوڵانەوە شۆڕشگێڕیەکان لە لوبنان ومیسر و.. سەلماندویەتی کەخۆپیشاندانی زنجیرەیی، مانگرتنە گشتیەکان، مانەوە لەناوەندی شارەکان، بەتەنها و بەبێ راپەرینێکی لەمجۆرەو بەم ناوەڕۆکەوە، ناتوانێ دەسەلات بەقازانجی جەماوەری نارازی یەکلابکاتەوە و بگرە بۆرژوازی و هێزەکانی توانیویانە بەخستنەرێی سیناریۆی جۆراو جۆر هەمان سیستەمی دەسەلاتدارێتی خۆیان دوبارە سازبدەنەوە.

چوارەم؛ دامەزراندنی حکومەتێکی کاتیی شۆڕشگێر لەنوێنەرانی جەماوەری ڕاپەڕیو، لەڕێکخراوەو ئۆرگان و شوراو ئەنجومەنەکان و ئەو حزبانەی کەپشتیوانی ڕاپەرینن پێکدێ و وەک بەرئەنجامێک لەهاتنەمەیدان و ڕاپەڕینی جەماوەری فراوانی کرێکاران و زەحمەتکێشان و خەڵکی ئازادیخواز، دەبێتە بەدیل و شوێنگرەوەی حکومەتی ئێستا.

پێنجەم: پێویستە بەوپەڕی هوشیاری و هەست بە بەرپرسیارێتیەوە هەموو هەوڵێک بخرێتەگەر بۆئەوەی پرۆسەی گوێزانەوەی دەسەلات بۆ حکومەتی کاتی دوور لە توندوتیژی و پێکدادان برواتە پێشەوە. دەبێ هەوڵی تەواو بدرێت بۆ داخستنی دەرگاکان بەڕووی پەلامارو سەرکوتی حزبە ناسیۆنالیستە چەکدارەکان و دەسەڵاتی شکستخواردوودا. پێویستە لێبڕاوانە هێزی پێشمەرگەو پۆلیس و هێزە چەکدارەکان بانگەواز بکرێن و بەرچاویان رۆشنبکرێتەوە کە ئەوان بەشێکن لە جەماوەری برسی و ستەمدیدە و رۆڵەکانی کرێکاران و خەڵکی ئازادیخواز، نابێ بە فروفیشاڵی کوردایەتی فریوبخۆن و لولەی چەکەکانیان بۆ بەرگری لە تاقمێک تاڵانچی و گەندەڵ و مشەخۆر ئاراستەی سنگی هاوچین و هاوچارەنوسەکانی خۆیان بکەن کە لە دژی برسێتی و نانبڕین و لە پێناو ئازادی هاتوونەمەیدان.

شەشەم: پێویستە بزوتنەوەی ناڕەزایەتی جەماوەری ئێستای کرێکاران و کارمەندان و زەحمەتکێشان و مامۆستایان و ژنان و لاوان و بێکاران و سەرجەم ئازادیخوازان.. لەدەوری داخوازیە دەستبەجێیەکان و سوربون بۆ سەپاندنی بەسەر ئەوانەی داهاتی کۆمەڵگایان بەتاڵان بردوە، پێبنینە مەیدانەوە، هاوکات لەسەرجەم ناوەندەکانی کار و گەرەکو زانکۆ و بەڕیوەبەرایەتیەکان، کۆبوونەوە گشتیەکان سازبدەن و بە هەڵبژاردنی نوێنەرانی خۆیان لەشورا و هەرجۆرە ڕێکخراوەیەکی جەماوەری تردا بەرپابکەن. لەم نێوەدا هاتنەمەیدانی کرێکارانی نەوت و کارگە پیشەسازیەکان و دەستبردن بۆ شوراکانی خۆیان و کۆنترۆڵی کرێکاری فاکتۆرێکی یەکجار گرنگی یەکلاکردنەوەی ڕاپەڕینە بەقازانجی جەماوەر.

حکومەتی کاتیی شۆڕشگێر دەستبەجێ ئەم هەنگاوانەی خوارەوە جێبەجێ دەکات:

یەکەم: هەڵوەشاندنەوەی هەموو دامودەزگا بیروکراسی و گەندەڵەکانی ئێستا، حکومەت و پەرلەمان، سەرۆکایەتی هەرێم و .. هەروەها هەڵوەشانەوەی سەرجەم هێزە چەکدارە میلیشیاییە حزبیەکان. هەموو کەرەسەو دارایی و مومتەلەکاتی ئەم دەزگاو میلیشیایانە لەلایەن نوێنەرانی جەماوەرەوە تەرخان دەکرێن بۆ چەکدارکردنی گشتی جەماوەری رێکخراو لە شورا و ڕێکخراوە جەماوەریەکانی خۆیاندا. هەروەها بانگەوازی هێزە چەکدارەکانی ئێستا (پێشمەرگە و پۆلیس و …) دەکرێن کە ئازادانە بە هاوچارەنوسەکانی خۆیان‌ و هێزی چەکداری شوراکانەوە پەیوەست بن بۆ پاراستی ئازادی‌و ئاسایشی کۆمەڵگا.

دووەم: ئەم هەنگاوانەی خوارەوە وەکو سەرخەت و ئەرکە سەرەکیەکانی حکومەتی کاتی شۆڕشگێڕ رادەگەیەنرێن؛

١/ گرتنەبەری هەنگاوی بەپەلەو کارساز بۆ گێرانەوەی هەموو ئەو موڵک و سامانەی کە لەم چەند ساڵەدا لەلایەن ئەحزاب و سەران و دەست و پێوەندەکانیانەوە بەتاڵان براوە. ئەوانە لەگەڵ داهاتی نەوت و داهاتەکانی دیکە، تەرخان دەکرێن بۆ باشکردنی ژیان وگوزەران و خزمەتگوزاریە گشتیەکان.
٢/ دەستبەجێ لەو داهاتانە هەموو کرێ و مووچە نەدراوەکانی سەرجەم کرێکاران و کارمەندان و پێشمەرگە و پۆلیس و مامۆستا و خانەنشین و کەم ئەندامان و بیمەکانی تر..بەسەریەکەوە دابین و دابەش دەکرێن. هەروەها سەرجەم کرێ و موچەکان بەپێی ئاستی گرانی زیاد دەکرێن.
٣/ خۆڕایی کردنی خزمەتگوزاریەکانی وەک ئاو و کارەبا، خویندن و تەندروستی. هەروەها دابینکردنی هەموو ئەو پێداویستیە تەندروستیانەی کەبۆ خۆپارێزی و سەلامەتی تەندروستی بەرامبەر بەپەتای کۆڕۆنا پێویستە، بەخۆرایی.
٤/ بیمەی بێکاری تەسەل بۆ هەموو بێکارانی ئامادە بەکار دابین دەکرێت.
٥/ هەموو بانکەکان لە یەک بانکی گشتی ژێردەسەلاتی حکومەتی کاتیدا یەکدەخرێن و داهاتی نەوت. سەرجەم داهاتەکان، هەروەها خەرج و بودجەبەندی وڵات بەشێوەیەکی شەفاف دەخرێتە بەرچاوی جەماوەرو لەژێر کۆنترۆلی راستەوخۆی نوێنەرانی جەماوەردا دەبێت.
٦/ هەڵوەشاندنەوەی ئەو پەیماننامەو گرێبەستە ئابوری و سیاسیانەی کە حکومەتی هەرێم لەگەڵ دەوڵەت و کۆمپانیاکاندا بەستویانەو دژ بە بەرژەوەندی خەڵکی کوردستانن.
٧/ لێپرسینەوەو دادگاییکردنی تەواوی ئەو بەرپرسانەی بەشدارن لە تاوانی کوشتن و فراندن و تیرۆرو هاوکاریکردنی تیرۆرستاندا.
٨/ دین لە دەولەت و پەروەدەو فێرکردن جیادەکرێتەوە، هەموو ئەو یاساو رێسایانەی کە سەرچاوەی دینییان هەیە هەڵدەوەشێنەوە، هەرکەس ئازادە هەر دینێکی هەبێت یان هیچ دینێکی نەبێت.
٩/ ئازادیی بیروباوەر، رادەربرین، چاپەمەنی، مانگرتن و خۆپیشاندان و کۆبونەوەو رێکخراوبون و پێکهێنانی ئەحزابی سیاسی بەبێ هیچ قەیدو بەندێک.
١٠/ یەکسانی هەمەلایەنەی ژن و پیاو لە هەموو مافێکدا وە هەڵوەشانەوەی هەموو ئەو یاساو ریسایانەی کە ناکۆک بێت لەگەڵ ئەمەدا.
١١/ مافی هاوڵاتی یەکسان بۆ هەموو دانیشتوانی کوردستان بەدەر لە رەگەز و دین و ئەتنیک و….
١٢/ هەڵوەشاندنەوەی سزای لە سێدارەدان.
١٣/ گرتنەبەری هەنگاوی بە پەلە و پێویست بۆ دابینکردن و رێکخستنی گوزەرانێکی گونجاو بۆ ئاوارەکان.

سێهەم: حکومەتی کاتی شۆڕشگێڕ ماوەی ٦ مانگ بۆ ساڵیک دیاری دەکات بۆ هەمو هێزە سیاسیەکان تا بەشیوەیەکی ئازادانە بانگەشە بۆ ئالتەرناتیڤی سیاسی و ئابوری خۆیان بکەن و سەرەنجام هاوڵاتیانی کوردستان بڕیار لەسەر نیزامی سیاسی و سیستەمی بەڕیوەبردنی ئایندەی وڵات بە شێوەیەکی ئازادانە بدەن. ئەویش لەڕیگای سازدانی ڕیفراندۆمێکەوە بۆ دەنگدان لەسەر دەستوری هەرێمی کوردستان.

چوارەم: حکومەتی کاتی شۆڕشگێر لەبارەی پەیوەندی نێوان هەرێمی کوردستان بە دەوڵەتی عێراقەوە، پرسی جیابوونەوە و سەربەخۆیی کوردستان بەشیوەیەکی سیاسی و گونجاو یەکلادەکاتەوە، بەجۆرێک کەلە بەرژەوەندی گشتی خەڵکی کریکار و زەحمەتکێشی ناوچەکەدا بێت.
* * *
حزبی کۆمۆنیستی کرێکاری بانگەوازی هەموو جەماوەری نارازی و ئازادیخواز دەکات کە لەپێناو ئەم ئامانجانەو تێپەڕاندنی دۆخی پرمەترسی ئێستاو بەرپاکردنی دەسەڵاتێکی راستەوخۆی جەماوەری و شۆرشگێرانە، لە پشتی ئەم ئەلتەرناتیڤە رابوەستن و بۆ بەرپاکردنی شوراکان دەست بەکاربن. هەروەها بانگەوازی هەموو هەڵسوراوانی کرێکاری و کۆمۆنیست و ئازادیخواز دەکات بۆ نواندنی رۆڵی دەستپێشخەری و پێشڕەوانە لەم رێگایەدا.

هاوکات حزبی کۆمۆنیستی کرێکاری پێداگری لەسەر ئەوە دەکات کە پێویستە هەموو حزبە سیاسیەکان پابەندبن بە خواست و ئیرادەی شۆرشگیرانەی جەماوری کرێکارو ئازادیخوازی بەمەیدان هاتو و خۆیان نەخەنە بەرامبەر ئەم ئیرادەیەوە. ئەمە تەنها رێگای دەرهێنانی کۆمەڵگایە لە قەیران و بنبەستی ئێستا و دوور راگرتنیەیەتی لە توندوتیژی و پێکدادانی خوێناوی. سیستەمی شورایی لەگەل ئەوەی تەنها شێوازی دەسەلاتدارێتی راستەوخۆی جەماوەرە، لە هەمانکاتدا بالاترین جۆری دیموکراسی و ئازادی سیاسی مسۆگەر دەکات. هەموو حزبە سیاسیەکان دەرفەتی ئەوەیان هەیە بەرێزگرتن لە ئیرادەی شۆرشگێرانەی جەماوەر و بەشداریەکی سیاسی لەم پرۆسە دیمکراتیک و ئازادانەیەدا رۆڵی خۆیان بگێڕن و پێگەی خۆیان بەدەست بهێنن.

حزبی کۆمۆنیستی کڕیکاری کوردستان
سەرەتای حوزەیرانی ٢٠٢٠

Leave a Reply

Your email address will not be published. Required fields are marked *

*

%d bloggers like this: