ڕاگەیاندنی ڕۆژنامەوانی

گرتن ودیپۆرتی پەنابەران درێژەی هەیە

بالیکسیر: ڕێکەوتی: ٢٠/٨/٢٠٢٠ لە دوورگەی (یلیس ) سەر بەشاری بالیکسیر لەلایەن پۆلیسی ئێشکگری دەریاوانی تورکیاوە ( ٢٥ ) پەنابەر ڕزگارکران دوای ئەوە کە لەلایەن پۆلیسی ئێشکگری دەریاوانی یۆنانەوە دیپۆرتکرابوونەوە Read More »

پارتی بەبێ نان و ئاو ڕۆژنامەنووسێکی زیندانیکردووە و دۆخی تەندروستی مەترسیدارە

ئاسایشی پەدەکە بەردەوامە لە دەستگیرکردنی چالاکوانان و ڕۆژنامەنووسان و ڕەخنەگرانی دەسەڵات و زیاتر لە ٥٠ کەسیان تەنها لە زاخۆ دەستگیرکردووە، لە نێویاندا ڕۆژنامەنووس فاروق عومەر هەیە، دوای چواڕ ڕۆژ ئێوارەی دوێنێ سەربەستکرا، بەڵام نان و ئاوی پێنەدراوە و دۆخی تەندروستی ناجێگیرە.

فاروق عومەر دوای چوار ڕۆژ دەسگیرکردنی لە شارۆچکەی زاخۆ، بە وتەی براکەی ئاو و خواردنی پێنەدراوە، هەربۆیە هەردوو گورچیلەی وشک و سست بووەتەوە.

خەتاب عومەر برای فاروق ووتی: بەبێ هیج تۆمەتێک ماوەی چوار ڕۆژە براکەم لەلایەن ئاسایشی زاخۆ’وە دەستبەسەرکرا و چوار ڕۆژ لە ژوورێکی تاکە کەسییدا خرایە زیندانەوە، بێ ئەوەی خواردن و ئاوی پێدرابێت، لەگەڵ ئازادکردنی هەردوو گورچیلەی وشک بووە و لە بێ ئاوییدا مەترسی لەدەستدانی هەیە، ئێستا ڕەوانەی فریاکەوتنی زاخۆ کراوە.

خەتاب عومەر کە خۆی پارێزەرە دەڵێت، لەو چەند ڕۆژەدا هەوڵی داوە لە ڕێگای داگای زاخۆوە براکەی ببینێت، بەڵام بێسوود بووە، “ڕێگەیان نەدا بیبینین و هیج زانیارییشان بە داگا نەدا، براکەم هیچ تاوانی نەکردووە و خرایە زیندانەوە، کە بەپێی بەدوواداچوونەکانم وەک پارێزەر نزیکەی ٥٠ کەس بەهۆی خۆپیشاندانی زاخۆوە لە زیندانەکانی ئاسایش’دان بەبێ دادگاییکردن”.

کەمپینێک بـــۆ ئازادی سـەیران و منداڵەکانی

بەشی راگەیاندنی رێکخراوی چەپک بۆ گەشەپێدانی مرۆیی کەمپینێک رادەگەیەنیت بۆ ئازاد کردنی سەیران محەمەد، نوێنەری رێکخراوی چەپک لە پارێزگای هەولێر، کە دوێنی ڕۆژی دووشەممە رێکەوتی 24ی ئابی 2020 لە لایەن دەسەڵاتدارانی پارتی لە بازاری لەنگەی هەولێر لەگەڵ دوو منداڵەکەی دەستبەسەرکراون، هوکاری دەستبەسەر کردنەکەشی دەگەرێتەوە بۆ ئازادی رادەبرین و پۆست کردنەکانی لە تۆڕە کۆمەڵایەتی فەیسبوک.

هەروەها ئیدانەی ئەم كارە‌ قێزە‌ونە‌ دەکەین و دەستبردن بۆ ھە‌ر ئە‌ندامێكی رێكخراوە‌كە‌مان مایە‌ی قبوڵکردن نیە‌ و ھێلی سورە، ئازاد نە‌كردنی وامان لێدە‌كات زیاتر كە‌یسە‌كە‌ بە‌دونیایی دە‌رە‌وە‌ بە‌سیاسی بكە‌ین، پاشان ناتوانن بەم رێگەیەوە دەنگی چالاکوانان و ئازادیخوازان و دەنگی شەقام و ئازادی رادەبرین سەرکوت بکەن، داواش لە‌ ئاسایش و پولیسی ھە‌ولێر، وە‌زارە‌تی ناوخۆ و وە‌زارە‌تی کارو كاروباری كۆمە‌لایە‌تی دە‌كە‌ین دە‌ستبە‌جێ ( سە‌یران محەمەد و منداڵەکانی)ئازاد بكە‌ن، هەر بۆ زانیاریتان تا ئێستا ئە‌ندامی ھیج حیزب و پارتێك نیە‌و بگرە‌ باوكی شە‌ھیدە‌ لە‌پێناو خاك و نیشتیمان و ئازادی، لەگەڵ ئەوەش توشی ڤایرۆسی كۆرۆنا بووە و تازە‌ چاكبوتە‌وە‌ و ھێشتا بارگرانی نە‌خۆشیە‌كە‌ی لێنە‌بۆتە‌.

هەر کەسێک دەیەوی پاڵپشت و پشتیوانی ئەم کەمپینە بکات بۆ ئازاد کردنی سەیران محمەد، ناو و پیشەکەی بنوسێت
1_رێکخراوی چەپک بۆ گەشەپێدانی مرۆیی
2_سۆما خالید رۆژنامەنوس
3_شاخەوان ئەکرەم دوکانی رۆژنامەنوس
4_هاودەنگ سلێمانی، چالاکوان و ئازادیخواز
5_ریکخراوی شار بۆ گەشەپیدانی مرۆیی
6_ڕێکخراوی جەستە بەخشان لەکوردستان
7_سەنا محمد، باڵوێزی ئاشتی جیھانی_ئەندامی رێکخراوی چەپک
8_سيفي نهيلي، جالاك فان سويد
9_ ڕێباز سەباح، سەرۆکی ڕێکخراوی خەون و لێپرسراوی ئۆفیسی کەرکوکی ڕێکخراوی ماکۆس
10_جەبار احمد، توێژەری سیاسی
11_عزت زێباری، چالاکڤان لە ئاکرێ
12_کەژاڵ نوری، چالاکوانی ژنان لە هۆڵەندا
13_شاگوڵ خواڕەحم، چالاکوان
14_ژینۆ ڕشید، چالاکوانی ژنان
15_حەیدەر عەلی، فەرمانبەر، گەرمیان
16_گروپی ڕاستاڵ
17_مەریوان قەرەداغی، شاعیر
18_ئومێد ئەحمەد شاعیر و چالاکوان
19_تۆڕی هاوبەشی ڕێکخراوەکان
20_ئەردەڵان شێخ فاتیح بەرزنجی، پارێزەر و ڕۆژنامەنووس؍سلێمانی
21_سەنتەری باشور بۆلێکۆڵینەوەی ستراتیژی
22_سەرکەوت بابان، سەرۆکی ڕێکخراوی SYEO
23_ھێلان چیا، نوسەر
24_شێرکۆ حەمەئەمین، چالاکوانی سیاسی
25_هاوژین مەلا ئەمین، مامۆستای زانکۆ
26_ئارام هادی رۆژنامەنوس
27_خەندە ئازاد محی الدین، چالاکوان
28_ سروش هه ڵەبجەیی پارێزەر، ڕۆژنامەنوس و چالاکوانی سیاسی
29_د. کەمال سەید قادر، نوسەرو یاساناس
30_رێكخراوى قه رەداغ بؤ گه شه پيدان
31_کەژال عبدالقادر حمە شریف، بکتریۆلۆجی نەخۆشخانەی فێرکاری وەئەندامی دەستەی دامەزرێنەری پرۆژەی ژن ژیانە مەیکوژە
32_روپاک اسماعيل لاو احمد، چالاكوان و ئه ندامى كومەلەی ئافرەتانی كوردستان
33_تانیا علی، وەک چالاکوانی ئاشتی و داکۆی لە مافی ژنان
34_دیاری فەرەیدون، شاعیر و رۆژنامەنوس
35_كامل حمه شريف، ئەندازيار

کۆمیسیۆنى مافەکانى مرۆڤی عێراق: داوا لە حکومەتی هەرێم دەکەین مافە رەواکانی خۆپیشاندەران جێبەجێ بکات

کۆمیسیۆنی مافەکانی مرۆڤ لە عێراق داوای لە هێزە ئەمنییەکانی هەرێم کرد مافی خۆپیشاندەران پێشیل نەکەن و بە وریاییەوە مامەڵەیان لەگەڵدا بکەن، دەشڵێت، حکومەتی هەرێمیش پێویستە گوێڕایەڵی داواکارییەکانی خۆپیشاندەران بێت.

کۆمیسیۆنی مافەکانی مرۆڤ لە عێراق لەسەر خۆپیشاندانەکانی هەرێم راگەیەندراوێکی بڵاوکردەوە و تیایدا هاتووە، ئەوان جەخت لە مافی خۆپیشاندانی ئاشتیانە دەکەنەوە کە لە دەستوری عێراقدا باسکراوە و داواش لە حکومەتی هەرێمی کوردستان دەکەن گوێڕایەڵی داواکارییەکانی خۆپیشاندەران بێت.

ئەوەش خراوەتەڕوو، داوا لە حکومەتی هەرێم دەکەن مافە رەواکانی خۆپیشاندەران لە بنەبڕکردنی بێکاری و باشترکردنی گوزەرانی هاوڵاتیان و خەرجکردنی موچەی فەرمانبەراندا جێبەجێبکات.

ئەوەش خراوەتەڕوو، داواش لە هێزە ئەمنییەکانی هەرێمی کوردستان دەکەن بە وریاییەوە مامەڵە لەگەڵ خۆپیشاندەراندا بکەن و دانبەخۆیاندا بگرن و ژیانی خۆپیشاندەران بپارێزن و مافەکانیان پێشێل نەکەن.

رۆژى ٢٢ى ئەم مانگەدا، خۆپیشاندانی سەرتاسەریی لە هەرێمی کوردستان بەڕێوەچوو، بەڵام لە پارێزگاکانی دهۆک و هەولێر بە زەبری هێز رێگری لە خۆپیشاندانی ئاشتیانەی هاوڵاتیان کرا.

ھەرێمی کوردستان بەرزترین ژمارەی مردنی بەکۆرۆنا تۆمارکرد

بەراورد بە شەش مانگی رابردوو بۆیەکەمجار  ھەرێمی کوردستان لە یەک رۆژدا 27 مردنی بە کۆرۆنا تۆمارکرد، بەوەش کۆی گشتی مردوانی کۆرۆنا گەیشتە ٩٣٠ کەس.

لە 24 کاتژمیری رابردوودا ١٢ کەس لە هەولێر و 11 لە سلێمانی و سێ کەس لە دھۆک و کەسێک لە راپەڕین گیانیان لە دەستداوە.

رۆژی یه‌كشه‌ممه(٢٣\٨\٢٠٢٠)‌ وه‌زاره‌تی ته‌ندروستی حكومه‌تی هه‌رێم ئاماری توشبوون و گیان له‌ده‌ستدانی به‌ ڤایرۆسی كۆرۆنان لەماوەی هەفتەیەکدا (له14-8 تاوه‌كو 20-8) راگەیاند.

بەپێی راگەیاندراوەکە له‌و ماوه‌یه‌دا 27 هه‌زارو 348 پشكنینی كۆرۆنا له‌هه‌ر چوار پارێزگای (هه‌ولێر – هه‌ڵه‌بجه‌ – سلێمانی – دهۆك) ئه‌نجامدراوه‌و دەرکەوتوە ٣٧١٢ کەس توشبون‌و 163 توشبوش له‌هه‌ر چوار پارێزگاكه‌ بەهۆی کۆرۆناوە گیانیان له‌ده‌ستداوه‌.
وه‌زاره‌تی ته‌ندروستی ئاماژە بەوەش دەکات ژماره‌ی توشبووانی كۆرۆنا لەکوردستان گه‌یشتووه‌ته‌ 24 هه‌زارو 271 كه‌س، له‌و ژماره‌یه‌ش 14 هه‌زار و 28 توشبوو چاكبوونه‌ته‌وه‌ و 886 كه‌سیش به‌هۆی ڤایرۆسه‌كه‌وه‌ گیانیان له‌ده‌ستداوه‌.

فرانس پرێس: داخستنی ئێن ئاڕ تی ناوبانگی حکومەتی هەرێم وەک پەناگەیەک بۆ بیروڕای ئازاد لەکەداردەکات

ئاژانسی فرانس پرێس رایگەیاندووە، داخستنی نوسینگەکانی ئێن ئاڕ تی ناوبانگی حکومەتی هەرێم وەک پەناگەیەک بۆ بیروڕای ئازاد لەکەداردەکات.

ئاژانسی فرانس پرێس لە زاری کۆمەڵێک رۆژنامەنوس و چالاکوانی مەدەنییەوە رایگەیاندووە، “بەرپرسانی هەرێمی کوردستان هەڵمەتێکیان دژی ئەو میدیایانە دەستپێکردووە، کە خۆپیشاندانی هاوڵاتیان دژ بە حکومەت دەگوازنەوە”، دەشڵێت، “ئەو کارە ناوبانگی حکومەتی هەرێم وەکو پەناگەیەک بۆ بیروڕای ئازاد لەکەداردەکات.”

راشیگەیاندووە، “هەفتەی رابردوو هێزەئەمنیییەکانی هەرێم، بە فشار نوسینگەی دهۆکی کەناڵی ئێن ئاڕ تییان داخستووە، بەهۆی ئەوەی روماڵی خۆپیشاندان و ناڕەزایەتییەکانی شاری زاخۆی کردووە.”

هاوکات، هونەر ئیحسان جێگری بەڕێوەبەری کەناڵی ئێن ئاڕ تی بە ئاژانسی فرانس پرێسی راگەیاندووە، “دوای درەنگانی شەوی ١٩ی ئەم مانگە هێزەئەمنییەکان نوسینگەی دهۆکی کەناڵەکەمانیان داخست و دەستیشیان بەسەر سەرجەم کەلوپەلە رۆژنامەوانییەکانیشدا گرت”، دەشڵێت، “ئەحمەد زاخۆی پەیامنێری ئێن ئاڕ تی لە زاخۆ دەستگیرکراوە و تاوەکو ئێستا ئازادنەکراوە.”

ئاژانسی فرانس پرێس باسی لەوەشکردووە، “دوای چەند کاتژمێرێک لە داخستنی نوسینگەی ئێن ئاڕ تی لە دهۆک نوسینگەی کەناڵەکە لە هەولێریش داخراوە، کە لەلایەن رێکخراوە نێودەوڵەتی و ناوخۆییەکانی هەرێمەوە ئیدانەی ئەو کارەکراوە.”

لەوبارەیەوە، کۆمیتەی جیهانیی پاراستنی رۆژنامەنوسان (سی پی جەی) ئەوەی خستبووەڕوو، زیادبوونی هەراسانکردنەکانی دژ بە ئێن ئاڕ تی نادادپەروەرانە و نادیموکراتییە و ئەو پرسیارەش دەهێنێتە ئاراوە، بۆچی دەسەڵاتداران ئەوەندە لە ئێن ئاڕ تی دەترسن و نوسینگەکانی دادەخەن.

سەنتەری میترۆ بۆ داکۆکی لە مافی رۆژنامەنوسان لە نیوەی یەکەمی ئەمساڵدا، ٨٨ توندوتیژی بەرامبەر ٦٢ رۆژنامەنوس و میدیاکار تۆمارکردووە، دەشڵێت، “لە نیوەی مانگی حوزەیرانەوە توندوتیژییەکان زیادیان کردووە.”

سەنتەری میترۆ دەشڵێت، نوسینگەی ئێن ئاڕ تی دابخرێت، هاوڵاتیان هەزاران ئێن ئاڕ تی دروستدەکەن و دەبنە پەیامنێری کەناڵەکە.

ئەوەش لە کاتێکدایە، درەنگانێکی شەوی ١٩ی ئەم مانگە هێزەئەمنییەکان بە زەبری هێز و لە ژێر فشاردا نوسینگەی دهۆکی کەناڵی ئێن ئاڕ تییان داخست و ئەحمەد زاخۆی پەیامنێریشیان دەستگیرکرد.

رۆژی دواتریش، هێزەئەمنییەکان نوسینگەی هەولێری ئێن ئاڕ تییان داخست و ئەوەش لە لایەن رێکخراوە جیهانی و ناوخۆییەکانەوە کاردانەوەی لێکەوتەوە و ئیدانەی داخستنی ئۆفیسەکانی هەولێر و دهۆکی ئێن ئاڕ تییان کرد.

هێزە ئەمنییەكانی هەولێر هێرشدەكەنە سەر پەرلەمانتارێك

هاوپشتی:

رۆژی شەممە(٢٢\٨\٢٠٢٠)، لەو شوێنەی كە بۆ خۆپیشاندان لە هەولێر دیاریكرابو، هێزە ئەمنییەکان هێرشیانکردوەتە سەر کاوە عەبدولقادر، پەرلەمانتاری نەوەی نوێ لە پەرلەمانی کوردستان.

لەوبارەیەوە، کاوە عەبدولقادر، رایگەیاند، بە بەرچاوی بەڕێوەبەری پۆلیس و ئاسایشی هەولێرەوە چەکداری ئەمنی هێرشیان کردوەتە سەری.

راشیگەیاند، هێزە ئەمنییەکان بەمەبەستی رێگری لە خۆپیشاندانی هەولێر، هێرشیانکردوەتە سەری.

ئێوارەی رۆژی شەممە لە بەشێك لە شارو شارۆچكەكانی هەرێمی كوردستان خۆپیشاندان دەستی پێكرد.

بەپێی قسەی چالاكوانان و خەڵکی شاری هەولێر، له‌پاشنیوه‌ڕۆە هێزێكى زۆرى ئه‌منى له‌شوێنه‌ گشتییه‌كانى شاری هه‌ولێرو دھۆک به‌تایبه‌ت ناوبازاڕى ھەر دو شارەکە بڵاوه‌یانپێكراوه‌، هاوكات به‌شێك له‌و هێزه‌ ئه‌منییانە‌ به‌جلى مه‌ده‌نییه‌وه‌ رێگریی ده‌كه‌ن له‌گردبونه‌وه‌و خۆپیشاندان، رێگه‌ناده‌ن هیچ كه‌س كۆببێته‌وه‌، له‌چه‌ند شوێنێكیش كاسبكاران ناچاركراون دوكانه‌كانیان دابخه‌ن و بڕۆنه‌ ماڵه‌وه.

هێزێکی ئەمنی لەشاری دهۆک هه‌ڵده‌كوتنه‌ سەر ماڵی چالاكوانێكی‌ مه‌ده‌نی‌‌و کوڕێکی دەستگیر ده‌كه‌ن

ئاسایشی دهۆک هەڵیان کوتاوەتە سەر ماڵی مامۆستا بەدەل بەرواریی، لەگەڵ ئەوەی خۆی لەماڵەوە نەبووە، ئەشکەنجەی کوڕێکیان داوە و کوڕێکی دیکەشیان دەستگیرکردووە و لەگەڵ خۆیان بردوویانە.

ماوەی چەند ڕۆژێکە، مامۆستا بەدەل بەرواریی چالاکوانی شاری دهۆک، بانگەوازیی بۆ ئەنجامدانی خۆپیشاندان کردووە دژی دواکەوتن و لێبڕینی موچە.

 ئێوارەی رۆژی سێ شەممە(١٨\٨\٢٠٢٠)بە مەبەستی دەستگیرکردنی بەدەل بەرواریی، ئاسایشی دهۆک هەڵیان کوتاوەتە سەر ماڵەکەی لە شاری دهۆک، هەرچەند خانەوادەکەی دەڵێن، کە لەماڵەوە نییە، بەڵام بەزۆر دەچنە ژورەوە و بەهۆیەوە ئاڵۆزیی لەنێوان کوڕەکانی بەدەل بەرواریی و هێزەکەی ئاسایشی دهۆک دروست دەبێت و ئاسایشەکان ئەشکەنجەی کوڕێکی بەدەل بەرواریی دەدەن و قۆڵێکی بە سەختی بریندار دەکەن، کوڕە گەورەکەشی دەستگیر دەکەن و لەگەڵ خۆیاندا دەیبەن.

ئومێد بەروشکی، چالاکوان و ڕۆژنامەنووس لە دهۆک بە ڕۆژنیوزی ڕاگەیاند: ئێمە لەگەڵ گروپی مامۆستایانی دهۆک چەند ڕۆژێکە لە هەوڵی ئەوەداین، کە جارێکی دیکە خۆپیشاندان ئەنجام بدەین و داوای مافەکانی مامۆستایان و فەرمانبەران بکەین، بەڵام لەلایە ئاسایشەوە بە ڕاستەوخۆ و ناراستەوخۆ هەڕەشەمان لێدەکرێت، کە نابێت خۆپیشاندان ئەنجام بدەین، ئەمڕۆش هەڵیان کوتاوەتە سەر ماڵی بەدەل بەرواریی، بەڵام لەماڵەوە نەبووە.

لەژێر فشاردا پێشنیازەیاسای ڕێکخستنەوەی میدیای ئەلکترۆنی هەڵوەشێنرایەوە

هاوپشتی:

لیژنەی رۆشنبیری و کۆمەڵگەی مەدەنی لە پەرلەمانی کوردستان رایگەیاند، ناوەڕۆکی پێشنیازەیاسای ڕێکخستنەوەی میدیای ئەلکترۆنی هەڵوەشێنرایەوە.

لە دوای بڵاوبونەوەی ناوەڕۆکی پێشنیازی یاسای ڕێکخستنەوەی میدیای ئەلکترۆنی، لە ژێر فشاری میدیا و چالاکوانانی مەدەنی و بە٣کارهێنەرانی تۆڕە کۆمەڵایەتیەکان و خەڵکی ناڕازی، ناوەڕۆکی پێشنیازەیاسای رێکخستنی میدیای ئەلکترۆنی ڕەتکرایەوە.

بەپێی ناوەڕۆکی پێشنیازەیاساکە لەسەر نوسینی کۆمێنتێک کە سکاڵای یاسایی لەسەر بێت، دەکرا ئەو کەسەی کۆمێنتەکەی نوسیوە ١٥ ساڵ سزای زیندانی بەسەردا بسەپێنرێت.

پێشنیازەیاسای رێکخستنی میدیای ئەلکترۆنی بەدەر لە رۆژنامەنووسان بەکارهێنەرانی تۆڕە کۆمەڵایەتیەکانیشی کۆت و بەند دەکرد لە نوسینی هەر رەخنە و کۆمێنتێک دژی دەسەڵات.

لەدوای ئەوەی فراکسیۆنی یەکێتی پێشنیازە یاسایەکی بەناوی رێکخستنی میدیای ئەلکترۆنی پێشکەشی پەرلەمان کرد و دەنگی ٥٣ ئەندامی پەرلەمانی لە فراکسیۆنە جیاوازەکانی بۆ کۆکردەوە پێشنیازەیاساکە خوێندنەوەی یەکەمی بۆ کرا، ناڕەزایەتی زۆری لێکەوتەوە، لە ١٧ی ئابدا لیژنەی رۆشنبیری و کۆمەڵگەی مەدەنی لە پەرلەمان بڕیاریاندا ناوەڕۆکی پێشنیازەیاساکە ڕەتبکەنەوە .

(رێکخستنی میدیای ئەلیکترۆنی) یان داخستنی هەموو دەرگاکان؟

لەئێستادا خەڵکی کوردستان لە سایەی دەسەڵاتێکی شکستخواردوو و بێ باکدا، لەگەڵ دەیان کێشە و گرفت و قەیراندا ڕووبەڕوون و ئەوەشی ناویان لێناوە (حکومەت) شانی لەهەموو بەرپرسیارەتیەک خاڵی کردۆتەوە. خەڵک لەبێ ئوکسجینی گیانلەدەست دەدەن و نەخۆشخانەکان سەرەتاترین پێداویستی پزیشکی تیا نیە. هەزاران کرێکار و کاسبکار بێکار ماونەتەوە و باسێک لە مووچەی فەرمانبەرانیش نیە،لەسەر بچوکترین نارەزایەتی لەشەو و رۆژێکدا سەدان گەنج و لاو دەرفێندرێن و بەدوای زیندانی و زیندانی و سوکایەتی و ئازار و ئەشکەنجەدانی بێڕەحمانە ئازاد دەکرێن. رێک لەم بارودۆخەدا زیاتر لە نیوەی ئەندامانی پەرلەمان لەهەموو پێکهاتە و فراکسیۆنە جۆراوجۆرەکان، بەسەر هەموو ئەمانە باز دەدەن و پرۆژەیەکیان ئامادەکردووە بەناوی ( ریكخستنی میدیای ئەلیکترۆنی ).

 ناوەڕۆک و زۆرێک لە برگەکانی پرۆژە یاساکە کە خوێندنەوەی یەکەمی بۆکراوە ئامانج لێی بەرتەسککردنەوەی ئازادییەکان و بێدەنگ کردنی خەڵک و سنووردارکردنی بەکارهێنەرانی تۆڕە کۆمەڵایەتیەکانە. لە نێو قەرەبالغی میدیای زەرد و سەوز و بێڕەنگی ئەمڕۆی کوردستاندا، میدیای ئەلکترۆنی و سۆسیال میدیا تاکە دەروازەی دەربڕینی بیروڕا  و گەیاندنی پەیامی نارەزایەتی خەڵکە لە کێشە و دیاردە ناخۆش و ناشیرینەکانی کۆمەڵگادا. لەکاتێکدا لە پارەی دزراو و داهاتی خەڵک بۆ بەرگری لە دەسەڵاتە شکستخواردووەکەیان دەیان دەزگای گەورەی میدیاییان دامەزراندووە و رۆژانە یاری بەهەست و نەستی خەڵک دەکەن،بەڵام ئەکاوەنتی تایبەتی کەسەکان بە زۆر دەبینن بۆ نووسین و بڵاوکردنەوە. ئەمە تەنها لە مێژووی رژێم و دەسەڵاتە هەرە دکتاتۆر و ستەمکار و گەندەڵەکانی دنیا جێگای دەبێتەوە.

هەر پارت و رێکخراوێکی سیاسی،دامودەزگایەکی راگەیاندن و پارێزەران و یاساناسان و رۆژنامەنوسان و نوسەران و هونەرمەندان و مامۆستایان و فەرمانبەران و خەڵکی ئازادیخوازی کوردستان،دەبێت لە ڕاستایی ئەو پرۆژە یاسایەدا نارەزایەتیەکانیان فراوانتر بکەن و پرۆژە یاساکە بکێشرێتەوە. ئێمە لەرێکخراوی سەردەشت عوسمان بۆ داکۆکی لەئازادی،لەبەرامبەر هەر هەوڵێکی لەم شێوەیە دەوەستینەوە و هەموو هەوڵیکی خۆمان دەخەینەگەڕ بۆ ئەوەی لەوە زیاتر دەسەڵاتی ئەمنی و پۆلیسی دەستکراوە نەبن لە بێدەنگگکردنی خەڵکی ناڕازی کوردستان و یاسا و دەسەڵاتی قەزائیش لەوە زیاتر هەیمەنەی نەکەوێتە ژێر پرسیارەوە .

بژی ئازادی ڕادەربرین و دەنگی ئازاد

رێکخراوی سەردەشت عوسمان بۆ داکۆکی لە ئازادی

١٧\٨\٢٠٢٠