Author Archives: Hawpshti Media

واقعی دادگاکان….

بۆخۆم ٣ ساڵە ھاتووچۆی دادگای ھەولێر دەکەم بە ھۆی ئەوەی مانگی ٣ ی ٢٠١٨ بەشداری خۆپشاندانم کرد لە ھەولێر!!!!
ئەمڕۆش لە دادگا بووم، بڕوا دەکەن کێشەی دادگامان بە تایبەتی کێشە سیاسیەکان، تەنھا بە گۆڕینی وێنەو لۆگۆی پرۆفایلتان چار نابێ!!؟؟، بەڵکو بە کردەوەی مەدەنی فشاری زیاتر دروست دەبێ و ڕەنگە بڕیارەکان بگۆڕێن.
٣ ساڵە جگە لە ژمارەیەکی کەم کە بە پەنجەی دەست دەژمێردرێن کەس لەگەڵم نەھاتووە بۆ دادگا، تەنانەت خزم ھەبووە شایەدی رۆژی خۆپشاندانەکە بوو نەھات بۆ دادگا شایەدی بە ھەق بدات!!!
ڕەنگە ھاتن بۆ دادگا ڕای دادوەر نەگۆڕێ بەڵام پاڵپشتیە بۆ خاوەنی کەیسەکە بۆ ئەوەی ھەست بە تەنیایی نەکات، ھەمان شت ڕاستە بۆ دەسگیرکراو و زیندانی کراوانی بادینان…، ھەر جۆرە جم و جۆڵێکی مەدەنی پێویستە بۆ ئەوەی تەنیا نەمێننەوە…
زۆربەی کەس تەنھا تەمەشاکارن، وا دەزانن ئەوەی دەگوزەرێ پەیوەندی بە ئەوانەوە نیە، گەر شتێکی خراپیش ھەبێت چاوەڕێ دەکات ئەم و ئەو بۆی چاک کات بەڵام خۆی یەک تاڵ مووی سەری ھەڵنەوەرێت!
حوکمی ٦ ساڵ زیندانی بەسەر زیندانی کراوانی بادینان بە گۆڕینی وێنەو دانانی لۆگۆ کەم ناکرێتەوە، بەڵکو گردبوونەوەی مەدەنی لەبەردەم دادگا کاریگەری خۆی دەبێت، تا ژمارەمان زیاتر بێت باشترە، ئەوە کاریگەری لەسەر حوکمی زیندانی کراوەکانی تریش دەبێت.
ھەردووکی بکەین لۆگۆش دانێن و گردبوونەوەش بکەین…

د.شایان عسکری- ئەندامی پەرلەمانی کوردستان

هەنگاو :مانگى رابردوو(63) حاڵەتى پێشێلکارى مافەکانى مرۆڤ لە رۆژهەڵاتى کوردستان تۆمارکراوە

رێکخراوێكی مافەكانی مرۆڤ رایدەگەیەنێت تەنها لە مانگى رابردودا بە پشتبەستن بە ئاماری تۆمارکراو لە ناوەندی ئامار و بەڵگەنامەکانی رێکخراوەکەمان، لانیکەم (63) حاڵەتى پێشلکاری مافەکانی مرۆڤ لە رۆژهەلاتى کوردستان تۆمارکراوە. دەشڵێت لەناو پێشێلکارییەکاندا (20) کۆڵبەر بونەتە قوربانى.

لەمبارەیەوە رێکخراوى مافى مرۆڤى هەنگاو کە کار لەسەر تۆمارکردنى پێشێلکارییەکانى رۆژهەڵاتى کوردستان دەکات، لە نوێترین راپۆرتیدا سەبارەت بە پێشێلکارییەکان رایگەیاند: لەمانگى رابردود توانیویانە لانیکەم (63) حاڵەتى پێشێلکارى مافەکانى مرۆڤ لە رۆژهەڵاتى کوردستان تۆمار بکەن. بەم شێوەیە:

یەکەم/ کۆڵبەران ( 20 حاڵەت)

لەماوەی مانگی رابردوودا (20) کۆڵبەر و کاسبکار لە سنوورەکانی کوردستان بوونەتە قوربانی کە شەش کەسیان گیانیان لە دەستداوە. لەو شەش کەسە پێنج کەسیان بە تەقەی هێزە چەکدارەکانی ئێران و تورکیا و کەسێکیان بە هۆی جەڵتەی دڵەوە گیانیان لە دەست داوە.

هەوەها، (14) کۆڵبەر بریندار بوون کە هەر هەموویان بە تەقەی راستەوخۆى هێزەکانی ئێران بریندار بوون.

دووەم/ سێدارە و گیانلەدەست دان لە بەندیخانە (3 حاڵەت)

لە مانگی بانەمەڕی ئەمساڵ لانیکەم سزای سێدارەی هاووڵاتییەکی خەڵکی سەڵماس کە بە تۆمەتی کوشتنی ئەنقەست ئەو سزایەی بە سەردا سەپابوو لە بەندیخانەی ئەو شارە جێبەجێ کراوە.

هەروەها، لەو ماوەیەدا دوو بەندکراوی خەڵکی بۆکان و ئورمیە لە بەندیخانەکانی ئەو دوو شارەدا بە هۆی پێڕانەگەیشتنی پزیشكییەوە گیانیان لە دەست داوە.

سێیەم/ کوژان و بریندار بوونی هاووڵاتیانی مەدەنی و تەقینەوەی مین (5 حاڵەت)

لە ماوەی مانگی رابردوودا دوو هاووڵاتی لە سنوورەکانی بانە و سەردەشت بە هۆی تەقینەوەی مینەوە بوونەتە قوربانی کە یەکێکیان گیانیلەدەست داوە.

هەروەها دوو هاووڵاتیی مەدەنی کورد لە شارەکانی شنۆ و کەرەج بە تەقەی هێزە چەکدارەکانی ئێران کوژراون و هاووڵاتییەکیش لە سنە بریندار کراوە.

چوارەم/ دەستبەسەر کران و سەپاندنی حوکم (27 حاڵەت)

بە پشتبەستن بە ئامارەکانی هەنگاو، لەماوەی مانگی رابردوودا لانیکەم (22) هاووڵاتیی کورد لەلایەن ناوەندە ئەمنییەکانی حکوومەتی ئێرانەوە بە تۆمەتی چالاکی سیاسی و مەدەنییەوە دەستبەسەر کراون.

هەروەها، پێنج هاووڵاتیی کورد بە تۆمەتی چالاکی سیاسی، مەزهەبی و مەدەنی سەرجەم سزای (45)ساڵ و (9) مانگ بەندکرانیان بە سەردا سەپاوە.

پێنجەم/ کرێکاری (8 حاڵەت)

لەو ماوەیەدا لانیکەم هەشت کرێکاری خەڵکی شارەکانی کەڵاتەرزان، ئیلام، مەریوان، کرماشان، سەردەشت (2 حاڵەت)، سنە و سەقز  لە کاتی کار کردن و بە هۆی رووداوی کارەوە گیانیانلەدەستداوە.

گەنجێکی رانیە: بە کرێکاری پارەم پەیداکردووە، قەرزیش دەکەم و دەچم بۆ ئەوروپا

سەرەتای ڤیدیۆکە سێ گەنجی دانیشتووی رانیە دەبینن کە پاسپۆرتەکانیان بە دەستەوەیە و نیازیانە ڤیزای تورکیا وەربگرن و بەرەو ئەوروپا کۆچ بکەن. ئەوان چاوەڕوانی نۆرەن لە بەردەم نووسینگەکانی ڤیزەدا، تەمەنیان لە نێوان 18 بۆ 21 ساڵیدایە. دووانیان کرێکار و یەکێکیشیان بێکارە، سەرەڕای ئەوەی بەشی پەرستاری خوێندووە.
شۆڕش شوان، پیشەی کرێکارە و باس لەوە دەکات، “حەوت هەشت ساڵە کار دەکەم، بە کرێکاری و دینار دینار بڕی حەوت هەزار و 500 دۆلارم کۆکردووەتەوە و باقی پارەکەی دیکە ناچارم قەرزی بکەم بۆ ئەوەی بگەمە شوێنی مەبەست.”
رەسوول موتەلیبیش بەهەمان شێوە کرێکارە، ئەویش دەڵێت، بۆ دابینکردنی پارەی رێگەی ئەوروپا، کرێکاری کردووە و زەویشی فرۆشتووە تاوەکو 15 هەزار دۆلاری کۆکردووەتەوە. “ئەوەی دیکەیشی قەرز دەکەم و پشت بەخوا دەڕۆم.”
حەمە شوان تەمەنی 45 ساڵانە و فۆتۆگرافەرە لە رانیە، ئەو ماوەی سێ مانگە کوڕێکی ناردووەتە ئەوروپا. دەڵێت، “سێ کوڕم ماون، ئەوانیش بەڕێدەکەم، دوو کچیشم هەن، بۆیە وەستاوم، خۆیشم ئەگەر ئێستاش دەرفەت بڕەخسێت و رێگەیێکی ئارامم دەستبکەوێت، هەموومان دەڕۆین. چیبکەین لەم وڵاتە؟”
لە پارکی شار لە دەروازەی راپەڕینیش، ئێواران قاچاخچی و ئەو گەنجانەی نیازیانە کۆچ بکەن، بە ئاشکرا مامەڵەی رۆیشتن دەکەن.
بەکر عەلی، سەرۆکی کۆمەڵەی پەنابەرە گەڕاوەکانی ئەوروپایە لە هەرێمی کوردستان و دەڵێت، لە ساڵی 2021 لە شەش مانگی سەرەتایدا زیاتر لە شەش هەزار هاووڵاتیی دەڤەری راپەڕین رۆیشتوون و گەیشتوونەتە تورکیا، بەڵام بە کۆی گشتیی هەرێمی کوردستان زیاتر لە 25 هەزار کەس لەو شەش مانگەدا کۆچیان کردووە بۆ تورکیا. تورکیا ئێستا بە مەبەست سنوورە ئاوییەکانی شل کردوون و بۆیە لەم 10 رۆژەدا 800 هاووڵاتیی هەرێمی کوردستان گەیشتوونەتە کەناراوەکانی یۆنان و ئیتاڵیا. لە کۆی گشتیی ئەو کۆچبەرانەی گەیشتوونەتە هەردوو وڵاتی یۆنان و ئیتاڵیا تەنیا دوو یەخت گەڕاونەتەوە کە ژمارەی سەرنشینانیان 157 کەس بوونە و گەڕێندراونەتەوە تورکیا.”
لە ئیدارەی راپەڕین نزیکەی 30 نووسینگەی ڤیزا و فڕۆکەوانی هەن، بەپێی ئاماری نووسینگەکان، رۆژانە زیاتر لە 500 گەنج داوای ڤیزای تورکیا دەکەن، لەو نووسینگانە جگە لە ڤیزا و تیکتی فڕۆکە، کارئاسانیش لەنێوان قاچاخچییەکان و گەنجاندا دەکرێت.
عەبدوڵڵا عومەر، خاوەن نووسینگەی ڤیزایە و دەڵێت، “ئێمە زیاتر ئەو قاچاخچییانەیان پێ دەناسێنین کە خەڵکی مەنتیقەن و متمانەپێکراون، پارەی خەڵکی ناخۆن، چونکە بەداخەوە کۆمەڵێک خەڵکی زۆر لەم رێگەیەدا دەستی بڕاوە و هەم ماڵی هەم سەری رۆیشتووە، زۆربەی قاچاخچییەکانیش خەڵکی ئیدارەی راپەڕینن و ئەگەر خەڵکی ئێرەش نەبن، ئێمە کارێک دەکەین گەنجەکان بە قاچاخچی جێگەی متمانە بناسێنین.”
بەپێی ئاماری کۆمەڵەی پەنابەرە گەڕاوەکانی ئەوروپا لە هەرێمی کوردستان، ساڵی رابردوو 27 هەزار کەس لە هەرێمی کوردستانەوە گەیشتوونەتە وڵاتانی ئەوروپا، هەشت هەزار کەسیان دانیشتووی ئیدارەی راپەڕین بوونە، لەوانەش 32 کەسیان لە ئاودا خنکاون کە دیسان چوار کەسیان خەڵکی رانیە بوون.

https://www.rudaw.net/sorani/kurdistan/2406202125

وەجاخی شۆڕش

پەیكار عوسمان:

یەکێ لە ماناکانی حوکمڕانی، قۆرخکردنی چەكە. ئەوەی کە کۆمەڵگا لە چەك داماڵرێ و چەك تەنیا بەدەست دەوڵەتەوەبێت. کەچی حوکمڕان و دەوڵەتمەدارەکانی ئێمە، خۆیان کۆمەڵگایان پڕکردوە لە چەك و میلیشیا!  
لێرەشدا ئەو پرسیارە دێتە پێش، ئەرێ بەڕاست، حیزبەکانی ئێمە چییان ئەوێت؟ ئەگەر حوکمیان ئەوێ، دەی ئەلف و بێ ی حوکمڕانیی، دۆخی چەك و میلیشیا قبوڵناکا، ئەگەر خراپترین جۆری حوکمڕانییش بێت. ئێ باشە ئەمەی ئێمە، بۆچی ئەو ئەلف و بێ و سەرەتایەی نیەو خۆی بەرهەمهێنەری چەكدارو میلیشیایە؟ وەڵامەکەی زۆر ئاسانەو هەر ئەوەیە کە لە ئەساسەوە ئەمەی ئێمە، حوکمڕانیی نیە. حوکمڕانیی نیە لە ئاستە زۆر نزم و خراپەکەشیدا، بەڵکو هەر تەنیا دەسەڵاتدارییەکی ڕووت و قووتەو هیچی تر. 
سەدام و قەزافی، خۆیان خێڵەکانیان چەکدار ئەکرد، بەڵام لە هەمان کاتیشا، کەس بۆی نەبوو چەقۆیەك لە گیرفانیدابێ و میلیشیا سەرنەکەوتبوو بەسەر دەوڵەتداو هێز سەرنەکەوتبوو بەسەر یاسادا. ئاخر ئەو دوو دەعبایە، بە هەموو ناشرینییەکانیانەوە حوکمیان ئەکرد، بەڵام ئەمەی ئێمە، تەنیا سوڵتەیەو هێشتا نەبووە بە حوکم. ئا لێرەشەوەیە کە دەسەڵاتدارەکانی ئێمە، چەکیان بەرەڵاکردوە، چونکە چەك، هێزو دەسەڵاتیان ئەداتێ و بێ سنوریان ئەکات، بەڵام حوکم سنورداریان ئەکات! 
تەنانەت مافیاکانیش سڵ لە چەکی بەرەڵا ئەکەنەوەو حەز ئەکەن چەك هەر لای خۆیان بێت. تەنانەت دیکتاتۆرو ملهوڕەکانیش لەناو کۆنترۆڵدا چەك ئەبەخشنەوە نەك لەناو بەرەڵاییدا. لەڕاستیدا ئەوەی ئێمە لە هیچیان ناچێ. مافیاگەرییەو لە مافیاگەرییش ناچێ. ملهوڕییەو لە هی ملهوڕەکانیش جیاوازە. ئەوەی ئێمە شتێکی زۆر سەرەتاییەو هەر غەریزەی زاڵێتی ناو نەفسی ئینسانە، لە بەرگی حیزب و حکومەت و سیاسەت و “شتە گشتییەکاندا” خۆی نمایش ئەکاو هێشتا نەگەیشتۆتە قۆناغی حوکم، کە بڕێك هۆشیاریی گشتی تێدایەو شتێکە لە سەرو غەریزەی هێزو سوڵتەوە!  
لە عێراقدا سونەکان، عەقڵی حوکمدارییان هەبوو، بۆیە توانییان سەدەیەك حوکمی عێراق بکەن، ئەگەر بە شیوازە هەرە ڕەق و خراپەکەشی بێت. بەڵام کوردو شیعە، عەقڵی حوکمیان نیەو تەنیا حەزێکی سەرەتایی هێزو زاڵێتییان هەیە، بۆیە ئەوەی کە ئەیکەن، تەنانەت ناچێتە خانەی حوکمداریی خراپیشەوە! 
سی ساڵ تەجروبەی هەرێم و بیست ساڵیش تەجروبەی عێراقی نوێ، لەڕاستیدا تەجروبەی دەسەڵاتە نەك حوکم، بۆیە میلیشیاکان هەر زیائەکەن و بەهێز ئەبن، دامودەزگاو سوپاش هەر لاوازو بچوك ئەبنەوە. “حوکم” بەو مانایەی کە لە خراپترین دۆخیشیدا، ڕەهەندی گشتی تێدایەو “سوڵتە” بەو مانایەی کە تەنیا حەزی زاڵبوونی ناو دەروونی تاکەکانە، بووە بە پەرت و گروپ و هاتۆتە ناو فەزای گشتی، بەڵام لەڕاستیدا ڕەهەندە گشتییەکەی موزەییەفەو ڕاستەقینە نیەو هێشتا دروستنەبووە! 
“سوڵتە” بە مانای حەزی شەخسی ئینسان بۆ تەسەڵوت و خۆسەپاندن و زاڵێتی. حوکم بە مانای، تۆزێ زیاتر لە حەزو غەریزە تایبەتەکان و پەڕینەوە بۆ ڕەهەندە گشتییەکان. غەریزەی سوڵتە، ئەوەیە کە نایەڵێ هاوبەشی دروستببێ و عەقڵی حوکم ئەوەیە، کە ئەگەر لە ئاستێکی نزمیشدابێت، بڕێك هاوبەشی دروستئەکاو تۆزێ دەوڵەتییانە کار ئەکات. تەنانەت لە فۆڕمە هەرە ناشرین و قێزەونەکەی بەعسیشدا، تۆ حوکمت هەیە نەك سوڵتە، چونکە دامودەزگات هەیە نەك هێزێکی ڕووت و قووت. بەڵام ئەوەی ئێمە هەر غەریزەیەکی ڕووت و قووتی هێزە، بۆیە سەرکردەکان، لەبری سوپایەك بۆ وڵات، هەر یەکەو سوپایەکی بۆ خۆی دروستکردوە!
سوڵتە غەریزەیەکی سەرەتایی و گرێیەکی دەروونی ئینسانەکانە، بۆیە هەر لە چوارچێوەی (خۆم و خوێن و خێڵ) دەرناچێ و ناپەڕێتەوە بۆ ناوچەی ڕەهەندە گشتییەکان. ئا لێرەوەیە کە سەرکردەیەکی هەرە خوێنەواری ئێمەو سەرکردەیەکی هەرە نەخوێنەواری ئێمە، هەردوکیان دواجار هەر ئەبنەوە بە باوکی مناڵەکانی خۆیان و میراتی کەسییان لێ بەجێ ئەمێنێ، نەك کولتوری دەوڵەتی و دامەزراوەیی و حوکمداریی!
ئێمە مەزڵوم و داگیرکراوی چوار دەوڵەتی ستەمکارین، بەڵام هەرکات لە یەکێکیان نەجاتمان ئەبێت، لە ڕووی بەڕێوەبردنەوە دۆخمان خراپتر ئەبێت نەك باشتر. چونکە لەڕاستیدا لەم ڕەهەندەوە پاشەکشێ ئەکەین و ئێمە لە حوکمەوە دێینەوە بۆ سوڵتە. هەر بۆیە کورد تا شۆڕشی هۆشیاریی نەکات، تەقوتۆقەکانی هەر زەرەرە تەنانەت لە کاتی سەرکەوتنیشیدا! 
شۆڕشی هۆشیاریی بەو مانایەی کە هیچ شتێك لە دەرەوەی بازنەی ڕەخنەو پرسیاردا نەبێت، تەنانەت خودی شۆڕشیش.
واز لەوە بێنە، ئەرێ بەڕاست ئەوە هەر میلیشیاو خێڵ و حیزبەکانن کە زوو زوو بەر ئەبنە یەکتر، یان منو تۆی هاوڵاتیش؟ ئەوە هەر مناڵە مەسولە، لەسەر هۆڕنێکی سەیارە خەڵك ئەکوژێ، یان دوو سایەقی ئاساییش؟ 
لەڕاستیدا ئینسانی کورد، لە سەرۆکێکەوە تاكو بەقاڵێك، هەمووی پێویستی بە پەروەردەبوونە لەسەر عەقڵیەتی یاساو دەوڵەتداری و هەموومان هێشتا غەریزە کەسییەکانمان زاڵە بەسەر هۆشیارییە گشتییەکانماندا. خۆ ئەو دوو بنەماڵەیەی لەسەر دەسکە کەرەوزێ یەکتریان بڕییەوە، مناڵە مەسول نەبوون! 
ڕاستە ئەوە دەسەڵاتە کە فەزای هێزو کەڵبەو جەنگەڵی خولقاندوەو فەزای یاساو حوکمڕانیی فەراهەم نەکردوە، بەڵام تازە قوڕەکە گشتییەو لەوە گەورەترە کە تەنیا لە مەسول و مناڵە مەسولا کورتیکەینەوە. 
کورد لە عەقڵەوە لە کێشەکانی ڕزگاری ئەبێت. یەکێ لە کێشەکانی کوردیش چەکە. چەك لە هەموو فۆڕمەکانیدا. لە چەکی شۆڕشەوە تاکو چەکی جاش و چەکی حیزب و چەکی خێڵ و چەکی حکومەت و چەکی هاوڵاتی.. هەمووی پێویستی بە تێگەیشتنێکی ترو ڕێکخستنەوەیەکی ترەو کورد تاکو چەك نەخاتە ژێر پرسیارەوە، دنیاکەی ناکەوێتە ناو گۆڕانەوە.
“هێز” غەریزەیەو قۆناغی پێش عەقڵ و هۆشیارییە. کوردیش یەکسەر لە چەکەوە دەسپێئەکاو چەکیش یەعنی هێز، هێزیش یەعنی ناعەقڵ و کە لە چەکەوە دەستتپێکرد، ئیتر ناتوانی بچیتە سەر عەقڵ. بەڵام کە لە عەقڵەوە دەستتپێکرد، دواتر هەر ئەچیتە سەر چەك و هێز، چونکە ئەوەش بەشێکە لە هاوسەنگی و ڕێکخستنی دنیاکە، بەڵام ئەوکات ئەچیتە سەر چەك و هێز لە شوێنی خۆیدا، نەك لەوێدا کە ببێتە بەدیلی عەقڵ و مەکینەی گەمژەیی!
دڵسۆزترینی ئێمەو جاشترینی ئێمە، لە گرێ ی چەکدا فەرقییان نیەو هەردوکیان بۆیان ناکرێتەوە. خێڵ و حیزب و سەرکردەو کەسێکی ئاسایی، هیچیان لەوسەرەوە ناچنە سەر هێز، بەڵکو هەر لەمسەرەوە لە هێزەوە دەستپێئەکەن و ئیتر هەموویان ئەبنە بکوژی عەقڵ و هاوبەشی گەمژەیی. لەخۆڕا نیە کە شتێکی زەبەلاحمان هەیە بە ناوی ئەدەبی بەرگری، بەڵام دوو دەقی ڕەخنەیی گەورەمان نیە لەسەر چەك و شۆڕش! چونکە هێشتا بەگشتی لە غەریزەی هێزو مانەوەداین، کە غەریزەیەکی سەرەتایی و ئاژەڵییەو نەپەڕیوینەتەوە بۆ قۆناغی هۆشیاریی گشتی و دەزگایی، کە ناوچەی عەقڵی مرۆییە. 
یەعنی شتەکە گشتییەو سەقافەتی ئێمە، هێشتا سەقافەتێکی هێز سەنتەرەو هێشتا عەقڵ سەنتەرنیە. لەوێشدا ئیتر ئەوە تەنیا حیزبەکان نین، کە دایمە لەسەر پێن بۆ شەڕێکی ناوخۆ. بەڵکو دوو کەسی ئاساییش، لەسەر سادەترین شت، ڕەنگە یەکتر بکوژن و منو تۆش لە فەیسبوکەوە، هەر بەر ئەبینە یەكترو هەر لە دۆخی شەڕداین. دۆخی شەڕیش ئەوەیە کە بوارێکی بۆ گفتوگۆ تێدانیە، چونکە لە عەقڵەوە دەستی پێنەکردوەو یەکسەر لە هێزەوە دەستی پێکردوە!
مەسەلەی نەخۆشخانەی هیوا، تەنیا ساتێکی ئیحساسیی نەبوو، بەڵکو ساتێکی هۆشیارییش بوو. چونکە ئەو ساتە دەگمەنەبوو کە نەیکردین بە دوو بەرەوە وەکو هەموو شتەکانی تر. بەڵکو هاوبەشییەك خولقا، کە جیاوازەکانی کۆکردەوەو ئەمەش ساتی  هۆشیارییەو تەنیا هۆشیاریی ئەتوانێ “ئازادانە” جیاوازەکان، لە بازنە بچوکەکەی خۆیان دەرکاو بیانباتە ناو بازنەیەکی گەورەو گشتییەوە. 
چەکیش پێویستی بە ساتێکی هاوشێوەیەو تۆ کە لە تەنیشت میلیشیایەکەوە قسە بە میلیشیایەکی تر ئەڵێ ی، لەڕاستیدا ئەوە ڕەخنەو هەڵوێست نیەو ئەوە عەقڵ نیە کە قسە ئەکات، ئەوە هەر غەریزەی هێزە قسە ئەکاو ئەیەوێ هێزەکەی تر ببەزێنێ. ئەوە هەر بەرامبەرکێ و بازنە بچوکەکەیەو نامانباتە ناو هاوبەشییەکی گشتیی. 
یاخود ناکرێ خۆم لەماڵەوە چەکم هەبێ و قسە لەسەر چەکی حیزب و فەوجی فڵان بکەم. بەڵکو قسە لەوێدا جێئەگرێ، کە من خۆم لە چەك داماڵیبێ ئینجا قسە لەسەر دەرەوەی خۆم بکەم. ئینسان سوڵتانی خۆیەتی و کردنی ئەوەی کە ئەتوانیت بیکەیت، پێشئەکەوێ بەسەر قسەکردن لەبارەی ئەوەوە کە ناتوانیت بیکەیت و  دەسەڵاتت نیە بەسەریدا. ئەگەریش هەریەك بە پاساوی خۆپارێزی شەرعیەت بدا بە چەکەکەی ماڵەوەی خۆی، ئەمە ئەچێتە خزمەت دۆخی میلیشیاگەریی و ئارگۆمێنتەکەی مافیاکان بەهێز ئەکات. دەی خۆ حیزبەکان و مەسولەکان و خێڵەکانیش، هەر بە پاساوی خۆپارێزی، دەستیان لە میلیشیاکانیان بەرنابێ!
دواجار ئەگەر پێتوایە لە مەسول ناشرینتر بوونی نیە، لە هەڵەدایت. چونکە هەیەو لە مەسول ناشرینتر مناڵی مەسولە. دۆخی ئێمەش خراپ نیە، بەڵکو زۆرخراپە. خراپ سەردەمی باوکەکانبوو، زۆر خراپ ئێستایەو سەردەمی مناڵەکانە. سەردەمی باشیش سەردەمی هۆشیاری و بەتاڵکردنەوەی سیحری چەك و شۆڕشە، بۆئەوەی هەر لە سەرچاوەوە سیحری “باوك و مناڵ” پێکەوە هەڵوەشێتەوەو عەقڵ سەرکەوێ بەسەر هێزدا. بەجۆرێك کە ئیتر لەملاوە سەرە نەگیرێ بۆ سێڵفی گرتن لەگەڵ کوڕی فڵان و لەولاشەوە لەسەر کچی فڵان جەنگی واترلۆ هەڵنەگیرسێ!

بەیاننامەی تیمی کوردستانی عێراقی CPT، سەبارەت بە بڕیاری سزادانی ڕۆژنامەوان ئومێد بەروشکی

‎ئومێد بەروشكی ڕۆژنامەوانێكە كە چەندین جار بەھۆی ڕێكخستنی خۆپیشاندان و تیشكخستنە سەر گەندەڵیەكانی حكومەتی هەرێم دەستگیرکراوە ساڵی پار لە ١٨ی ئابی ٢٠٢٠دا ئومێد دەستگیرا كە ھاوشانی مامۆستایان و ڕۆژنامەوانان داوای لە حكومەت دەکرد کە مووچەی فەرمانبەرەكانی بدات، لەو كاتەوە ئومێد زیندانیکراوە و لە چاوەڕوانی دادگاییکردنی دابووە.
پڕۆسەی دادگاییكردنەكەی ئومێد ئەمڕۆ دەستیپێكرد. ئومێد بە ناڕەوا لەلایەن دادگاوە ٦جار تۆمەتباركراوە. یەکێک لە تۆمەتەکان، خراپ بەكارهێنانی ئامێری تەكنەلۆجیا بووە كە بە ٢٤٠،٠٠٠ دینار غەرامەكراوە.
‎وەک تیمی کوردستانی عێراقی CPT، داوا لە حكومەتی هەرێمی كوردستان دەكەین كە دەستبەجێ ئومێد بەروشكی ئازاد بكات و ئەو تۆمەتانە بكشێنێتەوە. ئومێد نابێت وەك تاوانبار بناسرێنرێت لەبەر ئەوەی پراكتیزەی ئازادی ڕادەربڕینی كردووە.
‎ئێمە پشتیوانی لە ئومێد بەروشكی دەكەین و هیوامان وایە بەزووترین کات ئازادبكرێت.

چالاکوانان بەشەو هەڵکوتراوەتە سەر ماڵەکەی و لەبەرچاوی مناڵەکانی دەمانچە لەسەر سەری راگیراوە

کۆڵبەرێکی کورد بە تەقەی پاسەوانانی سنوری ئێران کوژرا

تۆڕی مافەکانی مرۆڤی کوردستان رایگەیاند، لە ئەنجامی تەقەی راستەوخۆی پاسەوانانی سەر سنوری ئێران لە کۆمەڵێک کۆڵبەری کورد لە ناوچە سنورییەکانی هەوراماندا، کۆڵبەرێک کوژراوە و کۆڵبەرێکی دیکەش بریندار بووە.

لەراگەیەندراوێکدا، تۆڕی مافەکانی مرۆڤی کوردستان باسی لەوەکردووە، کۆڵبەرێکی کورد بە ناوی فەهمین رۆستەم زادە خەڵکی ناوچەی هەورامانی تەخت، دوای تەقەکردنی راستەوخۆی هێزەکانی سەر سنور بریندار دەبێت و دەگوازرێتەوە بۆ نەخۆشخانەی شاری مەریوان و دواتریش بەهۆی سەختی برینەکەیەوە گیانی لەدەستداوە، هاوکات کۆڵبەرێکی دیکەش برینداربووە.

لەسەرەتای ئەم هەفتەیەشدا، چەند کۆڵبەرێکی دیکەی کورد بە هۆی تەقەی راستەوخۆی هێزەکانی ئێران و تورکیا گیانیان لەدەستداوە، لەوانە بەسیر ئەحمەدزادەی تەمەن ٢٧ ساڵی خەڵکی شاری پاوە و سەعدون ئەحمەدی تەمەن ٢٧ ساڵ و خەڵکی بانە و عەزیز محەمەزادە، تەمەن ٢٣ ساڵ و خەڵکی ماکۆ، کە بەتەقەی هێزەکانی سەرسنوری تورکیا گیانی لەدەستدا.

لە ساڵانی رابردوودا دەیان کۆڵبەری کورد کە بە هۆی کێشەی ئابوریەوە ناچار بوون کۆڵبەری بکەن، لە خاڵە سنورییەکانی ئێران و تورکیادا و بوون بە ئامانجی تەقەی هیزەکانی ئێران و تورکیا و گیانیان لە دەستداوە.

ئەوەش لەکاتێکدایە، پێشتر دەسەڵاتدارانی ئێران رایانگەیاندبوو، کە قەبارەی ئەو کاڵا قاچاغەی لەلایەن کۆڵبەرانەوە هاوردە دەکرێت، بە بەراورد بە قاچاغ لە رێگاکانی ترەوە، بایەخێکی ئۆتۆ و بەرچاوی نییە.

حکومەتی ھەرێمی کوردستان، شەرمەزاری بێباک

١- مووچە بە لێبڕینەوە ٤٠ بۆ ٤٥ ڕۆژ جارێک دابەش دەکات، ئەوە جگە لەو پاشەکەوتەی خۆشیان نازانن چارەنووسی چی لێ دێتەوە.
٢-پەرلەمان دانیشتن ناکات، ئەوەی ڕاگەیاندنەکان نەیانزانی و، ھیچ کام لە ئەندام پەرلەمانەکان ڤیدیۆمان نەکرد( تا نەڵێن موزایەدە دەکەن)، و پەرلەمان پەخشی ڕاگرت لە دانیشتنی ٢٠٢١/٥/٢٥، ژمارەیەکی زۆری پەرلەمانتاران لە ھۆڵی دانیشتنی پەرلەمان و لە کاتی دانیشتنی فەرمی چووینە ناوەڕاستی ھۆڵەکە و دانیشتنمان ڕاگرت، و لەوێ یاداشتێکمان نووسی کە لە دانیشتنی داھاتوو پێویستە پەرلەمان بڕیارێک دەرکات کۆتایی بە لێبڕینی مووچە بھێنێ، لەدوای ئەو ڕۆژەوە دانیشتنی پەرلەمان ڕانەگەیەنراوە، سەری مانگیش دەبێتە پشووی دانیشتنی پەرلەمان!!!
٣- پارەی سندوقی نەخۆشانی شێرپەنجەیان بە تاڵان بردووە، ئەمەش بۆتە ھۆی کەم بوونەوە و نەمانی بەشێک لە دەرمانی شێرپەنجە ، و ٦ مانگە کارمەندانی تەندروستی و پزیشکانی لە بری نۆڕینگەی سەنتەرەکانی شێرپەنجەی سێ پارێزگا شایستەی دارایی خۆیان وەرنەگرن و بە خۆبەخش دەوام بکەن چونکە سندوق پارەی تێدا نیە.
٤-حزبەمافیاکان داھاتی سنوور و نەوت ناگەڕێننەوە خەزێنەی دەوڵەت، بە ھۆی بە قاچاغ ھێنانی شت و مەک گومرگ نادەن، بەشێکی پارەی سندوقی شێرپەنجە داھاتەکەی ھی جگەرە و مەشروب و نەوتە، ئێستا بە ھۆی قاچاغەوە نە داھاتی وەکو پێشتر تێ دەچێ و گەر تێشی بچێ حکومەت تاڵانی دەکات.
٥-بەشێکی گەڕەکەکانی پارێزگاکانی ھەرێم ئاو دەکڕن.
٦-بەو گەرمایە حاڵی کارەبا خراپە.
٧-نرخی شت و مەک و بەنزین دووھێندە بووە.
٨-نرخی دۆلار گران بووە.
٩-مافیا چەکدارەکانی ھەردوولا ھاووڵاتیانیان ھەراسان کردووە.
١٠- لەسەرووی ھەموو ئەوانەشەوە دەلێ دەبێ ھەموو ڕۆژەکانی ھەفتە دەوام بکەی، ئەمە پێی دەگوترێ استعباد( بە کۆیلە کردن).
١١-شەرمەزاریەکی گەورەیە حکومەتی ھەرێم داوای قەرز بکات لە بەغدا، لە کاتێکا خۆمان داھات و نەوتی خۆمان ھەیە و (بە قسەی حکومەتی ھەرێم ڕێککەوتنێکی سەرکەوتوومان کردووە لە گەڵ بەغدا)!!!
کە مافیا حزب بەڕێوە ببا و سەرکردەی حزبەمافیاکان حکومەت بگرنە دەست، میللەتی داماوی بێ دەنگ ھەر ئەوە حاڵی دەبێ…….
د.شایەن عسکری

ئەمنستی ئینتەرناشناڵ: پێویستە دەسەڵاتدارانی هەرێم كۆتایی بە سەركوتكاریی و تۆقاندن بهێنن

رێكخراوی ئەمنیستی ئینتەرناشناڵ،سێشەممە(15\6\2021)، رایگەیاند، پێویستە دەسەڵاتدارانی هەرێمی كوردستان كۆتایی بە سەركوتكردن و تۆقاندن بهێنن لە پەیوەست بە خۆپیشاندان و ناڕەزایەتییەكان و ئەو دەستگیركراوانەش ئازادبكەن كە لەلایەن دەزگای ئاسایش و ئاژانسی پاراستنی سەربە پارتی دیموكراتی كوردستانەوە دەستگیركراون لەگەڵ ئازادكردنی ئەو چالاكوان و رۆژنامەنوسانەی كە لە دادگاییەكی نادادپەروەرانەدا سزای زیندانیان بەسەردا سەپێنراوە. Read More »

ئەو دادوەرەی فەرمانی دەستگیرکردنی بۆ بەرپرسان دەردەکرد لە دادگای دەستپاکی لابرا

لە ماوەی رابردوودا دادوەرێک لە دادگای دەستپاکی گەرمیان چەند دۆسیەیەکی گەندەڵی جوڵاند، کە چەند بەرپرسێکی ئەو ناوچەیە تێوەگلابوون و ژمارەیەکیشیان دەستگیرکران و لێکۆڵینەوەیان لەگەڵدا کرا، بەڵام ئەمڕۆ ئەو دادوەرە لە دادگای دەستپاکی لابرا.

عەبدولئەمیر جومعە، دادوەری لێكۆڵینەوەی دەستپاكی گەرمیان، كە چەند كەیسێكی لەدژی بەرپرسان جوڵاندوە، گۆڕدراو دادوەرێكی دیكە لە شوێنەكەی دانراوە.

 بەپێی زانیارییەکانی رادیۆی دەنگ كە روماڵی روداوەكانی ناوچەی گەرمیان دەكات، لە سەرەتای ئەم ھەفتەیەوە دادوەری دادگای لێکۆڵینەوەی دەستپاکی گەرمیان، عەبدولئەمیر جومعە، مەلەفی لێکۆڵینەوەی دەستپاکی لێوەرگیراوەتەوە و گۆڕدراوە بە دادوەر عەباس محەمەد ئەمین.

ئەم گۆڕانکارییانە لە دادگای دەستپاکی گەرمیان، دوای ئەوەھاتوە کە دادوەر عەبدولئەمیر جومعە لەماوەکانی رابردوداو لەسەر سکاڵایەکی ئەندامێکی ئەنجومەنی پارێزگای سلێمانی، سەرۆکی شارەوانی ناحیەی رزگاری راگرت و فەرمانی دەستگیرکردنیشی بۆ بەڕێوبەری گشتی شارەوانیەکانی گەرمیان دەرکرد کە تائێستا دەستگیرنەکراوە، ئەمەش لە دۆسیەیەکدا لەبارەی پرۆژەی ناوچەی نوێی پیشەسازیی ناحیەی رزگاری کە بەپێی سکاڵاکە، ئەو دو بەرپرسە بەبێ وەرگرتن و تەواوبونی مۆڵەت و  رێکارەکان، ھەستاون بە کارکردن لەو پرۆژەیەدا، ئەمەش تۆمەتێکە کە ھەردو بەرپرسەکە رەتیدەکەنەوە.

دادوەری نوێی دادگای لێکۆڵینەوەی دەستپاکی، دادوەر عەباس محەمەدئەمین، ھاوکات دادوەری دۆسیەکانی ئاسایشی گەرمیان و دادوەری بەرایی و کەتنی دادگای ناحیەی رزگارییشە.

پێشتریش لە دو بەیاننامەی جیادا، ژمارەیەک پەرلەمانتار و سیاسی و چالاکوان و مافناس و پارێزەر، ھۆشدارییان دابو لە بونی ھەوڵێک بۆ گۆڕینی دادوەری دادگای دەستپاکی.

دادوەر عەبدولئەمیر جومعە، پێش دەستبەکاربونی وەک دادوەری دادگای دەستپاکی، دادوەری دادگای لێکۆڵینەوەی خانەقین/قۆرەتو بو و لەو ماوەیەدا ژمارەیەک دۆسیەی ‘گەندەڵی و خراپ بەکارھێنانی دەسەڵات و کەمتەرخەمی’ دادبینی کردو بەھۆیەوە ژمارەیەک بەرپرسی راگرت.