Author Archives: Hawpshti Media

لەهەر چوار پرۆسەی هاوسەرگیرییەك یەكێكیان بە جیابونەوە كۆتایی دێت

لە هەرێمی كوردستان لە هەر 4 پرۆسەی هاوسەرگیری یەكێكیان بە جیابونەوە كۆتایی دێت و لە پارێزگای سلێمانیش لەهەر 3 پرۆسەی هاوسەرگیرییەك یەكێكیان بە جیابوونەوە كۆتایی دێت.
بەڕێوەبەرایەتیی پلان و ئاماری ئەنجوومەنی دادوەریی هەرێمی كوردستان ئاماری مامەڵەی ئەنجامدراوی دادگاكانی بۆ ساڵی 2019 بڵاوكردەوە، لە كۆی ( 32 هەزار و 432 ) پرۆسەی هاوسەرگیری (8 هەزارو 381) پرۆسەیان بە جیابونەوە كۆتاییان هاتووە بەرێژەی (25.8%) بەمشێوەیە:
🔹 پارێزگای هەولێر لە ( 11 هەزارو 144) پرۆسەی هاوسەرگیری ( 3 هەزارو 115) پرۆسەیان بە جیابوونەوە كۆتایی دێت بەرێژەی ( 28%).
🔹 پارێزگای سلێمانی لە ( 11 هەزارو 33) پرۆسەی هاوسەرگیری ( 3 هەزارو 448) پرۆسەیان بە جیابوونەوە كۆتایی دێت بەرێژەی ( 31.3%).
🔹 پارێزگای دهۆك لە ( 8 هەزارو 322) پرۆسەی هاوسەرگیری (هەزارو 129) پرۆسەیان بە جیابوونەوە كۆتایی دێت بەرێژەی ( 13.6%).
🔹 گەرمیان لە (هەزارو 933) پرۆسەی هاوسەرگیری (689) پرۆسەیان بە جیابوونەوە كۆتایی دێت بەرێژەی ( 28%).

كۆمارەكەی بەهادین نووری

لە كتێبی بیرەوەرییەكانی (بەهادین نووری) سكرتێری پێشووی حزبی شیوعی عێراق، چیرۆكێكی راستەقینەی سەرنجڕاكێشی تێدایە كە دەڵێی چیرۆكخوانەكانی كۆن دایانڕشتووە بۆ ئەو نیمچە دەوڵەتەی پەنجا ساڵ دواتر لە هەرێمی كوردستان دەڕەخسێ.

ناواخنی چیرۆكەكەیش ئەمەیە: ساڵی 1954 لە گرتووخانەی نوگرە سەلمان لە باشووری عێراق، كە تاقانە بینایەكی زۆر گەورەیە لە چەقی بیابانی نێوان عێراق و سعودییە، ژمارەیەكی زۆر ئەندام و سەركردەی حیزبی شیوعی حوكمدرابوون. لەناو ئەو بینایەدا شیوعییەكان كۆمارێكی میللیان دروستكردبوو، ئاڵایەكی رەنگ سووریان هەڵدابوو، بە پلێت و چینكۆ كە هی تەنكیی سەربان بوون، چەندین شمشێریان لێ دروسكردبوو. سەرۆكی ئەو كۆمارە میللییە كوردێكە بەناوی ( حەمید عوسمان) هەموو بەیانییەك شیوعییەكانی سەر بەو كۆمارە دەچنە بەردەمی ئاڵا و سروود دەخوێنن كە شیعری سروودەكە دەڵێ:

ئەی كۆمەڵانی برسی
لە گوزەرانی ژێردەستی زۆردران بێزاربوون
ئەمە دوا ڕۆژانی ململانێیە
چۆك بە مردن دا بدەن تا ژیان بدرەوشێتەوە
بۆخەبات.. بۆ پێشەوە… بۆ چەك… بۆ تۆڵە سەندنەوە

دانیشتووانی گرتووخانەكە بەوانەی سەر بە كۆماری شیوعییەكان و ئەوانەیشی لە دەرەوەی كۆماربوون، ڕۆژانە بە سەیارەی پۆلیس، خواردن و ئاویان بە تانكەر بۆ دەهات. خۆ ئەگەر یەك ڕۆژ خواردن و ئاویان بۆ نەچووایە، پەشێو و شپرزە دەبوون.

بەهادین نووری دەڵێ، ئەو ڕۆژانە، بەرپرسانی كرتووخانەكە لەگەڵ زیندانییەكان زۆر پشوودرێژ و لەسەرخۆبوون، هاوكارییان دەكردن و تاڕادەیەك چاوپۆشییان دەكرد لە هەڵسوكەوتی زیندانییەكان بەتایبەت شیوعییەكان كە زۆرینەی زیندانییەكانیان پێك دەهێنا.

بەهادین نووری دەیگێڕێتەوە سەرۆك و ئەندامانی ئەم كۆمارە میللییەی ناو گرتووخانەی نوگرە سەلمان زۆر توندوتیژبوون. دەیانویست بچنەوە بەگژ دەوڵەتدا، دەیانوت ئەم كۆمارە سەرەتایەك و ئەزموونێكە بۆ ئەو كۆمارەی لە داهاتوودا ڕایدەگەیەنین. منیش عەقڵم ئەو هەڵسوكەوت و جرپنییەی قبوڵ نەدەكرد پێموتن، ناكرێ لەم زیندانەدا كە هیچی لە دەستی ئێمەدا نییە ئاوا پێداگربن. ئێمە خاوەنی سنووری ئەودیو دەرگاكەمان نین، بەرپرسانی زیندان ئەگەر دەست بۆ تفەنگ و زۆرداریش نەبەن، تەنیا بە گرتنەوەی ئاو و نان لێمان، ئێمە تێك دەشكێین و ئەوەی هەمانە لە دەستی دەدەین. تكایە ئارام ببنەوەو هەڕەشە مەكەن. بۆ ئەوەی كۆمارە میللییەكە و ئاڵا و شمشێرەكەتان بمێنێتەوە، واز لەو كەلـلـەڕەقیی و هەڕەشە و گوڕەشەیە بێنن.

لە درێژەی چیرۆكەكەدا بەهادین نووری ئەوەی نیشانداوە، كە تاڕادەیەك سەرۆك و ئەندامانی كۆمارە میللییەكە بە نابەدڵیی رازی بوون واز لەو هەڵسوكەوتە هەرزەكارانە بێنن، بەڵام لە كۆتاییدا سەربازەكان بەهۆی كەلـلەڕەقیی حەمید عوسمانی سەرۆكەوە، رۆژێك لە كاتی گواستنەوەی زیندانییەكاندا، شیوعییەكان داركاریی دەكەن و زۆربەی زۆریان خەڵتانی خوێن دەكەن.

دوای نیو سەدە لە تێپەڕینی ئەم رووداوە، كتومت دەڵێی بۆ ئەم بارودۆخەی هەرێمی كوردستان داڕێژراوە. حكومەتەكە دەڵێی تاقانە بیناكەی نوگرە سەلمانە لەو بیابانەدا، پشوودرێژیی و چاوپۆشیی بەرپرسانی گرتووخانە دەڵێی ئەو دەرفەتەیە ئەمریكییەكان رەخساندوویانە بۆ كورد، تورك و عەرەب و فارسیش بەناچاری قبوڵیانكردووە.

سوپا و كەرەستە سادەكانی سوپای ئەو كۆمارە كەشمشێری لەتەنەكە دروستكراوبووە، ڕێك دەڵێی چەكی كۆنی بەردەست هێزە پەرت و نانیزامییەكەی پێشمەرگەیە. هێنانی رۆژانەی نان و ئاو لە دەرەوە هەمان هاوردنی هەموو شتێكە لە دەرەوە!

كەلـلەڕەقیی حەمید عوسمانی سەركۆماری شیوعییەكانی نوگرەسەلمان و حساب نەكردن بۆ ئەو واقیعە تاڵەی زاڵە بەسەر ئامانج و هیواو خەونی لەمێژینەت، هەمان كەلـلـەڕەقیی و ناواقیعبینی سەركردەكانی هەرێمی كوردستان بوون لە بیابانێكی پڕ لە تەڵە و تەنگ و چەڵەمەدا.

تائێرە، ئەزموونی هەرێمی كوردستان زیاتر لە نیوەی ئەو چیرۆكەی شیوعییەكانی گرتووخانەی نوگرە سەلمانی بەسەردا هاتووەتەوە، ئینسان كە هیچ دەسەڵاتێكی نەبوو لە چاككردنی ئەو هەموو هەڵە و پەڵەیەی سەركردەكان دروستیان كرد، ئاوات دەخوازێ كە وەكو حەمید عوسمان و ئەندامانی كۆمارە میللییەكەی، لە سەیارە دانەگیرێن خەڵتانی خوێن بكرێن و كۆتایی بە كۆمارە میلییەكە و ئاڵا سوورەكە بێنن و شمشێرە لە تەنەكە دروستكراوەكانیش نەتوانن زلـلـەیەكی دروژمن كەم بكەنەوە. چونكە ئەوەی كۆمارە میللییەكەی نوگرە سەلمان ئەنجامی ناواقیعیی و كەلـلـەڕەقیی سەركردەكانی بوو كە زووتر هەڵوەشایەوە.

هەموو خەون و ئامانجێك، چەندە پێویستی بەحەقیقەت و ڕەوایەتیی هەیە، ئەوەندە و زیاتریش پێویستی بە زەمینەسازیی هەیە، پێویستی بە بیركردنەوەی ژیرانە هەیە بۆ مسۆگەركردنی.

سەركردە و ئینسانی ژیر، هەوڵ دەدات زیاتر بمێنێتەوە بۆ ئەوەی زیاتر بەدەستبێنێ. بەڵام سەركردەی هەڵەشە پێچەوانەی ئەمانە دەكات بەر لەوەی زۆر بكات زۆری دەوێ!

كاوە شێخ عەبدوڵڵا

بۆ ئەوانەی كە شانازی بە هەڵبژاردنیان بە دەنگی میللەت دەكەن

بۆ ئەو لەشكرە ئەندام پەرلەمانانەی لەكابینەی یەكەمەوە بۆ كابینەی نۆیەم بە ژنان و پیاوانە بەعیلمانی و ئیسلامیەكانەوە، بە شیوعی و سۆشیالیستەكانەوە؟

با واز لە نیوەیان بهێنین، كە بن دیوار و بازرگانن یان نەخوێندەوارو حیزبیەكانن؟ كە زۆربەیان لە دەست بەرزكردنەوە زیاتر یەك ووشەیان لە پەرلەماندا نەووتوە؟ كەدەزگایەك بوە بۆ ئەو بەڕیزانەی چانسی بردنەوەی فرسەتێكیان هەبووە

بۆ كۆكردنەوەی سامان بەبێ ماندووبوون وزەحمەتكێشان لە پێناوی زامن كردنی مووچەی زەبەلاح و سەفەرەكانی ئەوروپایاندا پەرلەمانیان كردە دیوەخان و سەنگەری سەرسەختی حیزب یەكە بەیەكەیان بەرپرسیارن لە چەسپاندنی گەندەڵی بە چەپڵە ڕێزان ڕێگەیان بە تاڵانكردنی میللەت دەدا، شەرعیەتدان بەشەڕەكانی ناوخۆ و پەلكێشكردنی هێزی دەرەكیدا ، تا دەگاتە تێپەڕاندنی ئەو ڕیفراندۆمەی كە نیوەی هەرێمیان پێ دۆڕاند ڕۆژانە كەرامەتی ئەم میللەتە لەژێر پۆستالی عەجەم و توركدایە لەبری بەرگری كردن پاساو بۆ حیزب و دوژمنكاریەكانیان دەهێننەوە جگە لە شەڕی پۆست و سەنگەر گۆڕینەوە، هیچ دەستكەوت و سوودێكیان بۆ ئەم میللەت نەبووە؟

كارەساتەكە لەو نیوەیەدایە كە خاوەن بڕوانامە وڕۆشنبیر و نوخبەكانن كە گوایا نوێنەری ڕاستەقینە و پارێزەری دەنگی میللەتن كە ڕۆژانە لە شاشەی تیڤیەكان، یان لە پەیچ و ڕۆژنامەكان، جگە لە فەیسبووك و توویتەكانیان یان لە ڕێكخراو دەستە و گروپەكانیان كاسیان كردووین بە بانگهێشتی چاكسازی، بە هەڵڕشتنی دروشمی وەهمی لە نووسین و ڕەخنەكانیان داوای ڕاپەڕین و گۆڕانكاری دەكەن ؟ كە خۆیان بەدەم ڕاست و چاوساغی میللەت لەقەڵەم دەدەن كە ئێوە نەتوانن دەست بەرداری مووچەی خانەنشینیتان بن؟ گلەیی و گازندە لە حیزب و حكوومەتی چی دەكەن؟ ئیتر چۆن ڕووتان دێت، لەمەودوا باس لە چاكسازی و گۆڕانكاری بكەن؟ كاتێك كە بەها و ئاكاری سیاسی تەنها دروشم بێت بۆ خەڵك نەك بۆ خۆتان، سەرتان شۆڕكەن بۆ خانەنشینیە ناڕەواكانتان، ئیتر كوردایەتی و خەباتی شاخ و شارتان بە هاووڵاتیان مەفرۆشنەوە؟

قەندیل لەنێوان هەولێر و بەغدا ..!

ئه‌و كرده‌ سه‌ربازییه‌ توركییه‌ی له‌ هه‌رێمی كوردستانی عێراقدا درێژه‌ی هه‌یه‌، لایه‌نێكی خۆجێیی به‌ نیمچه‌یی تێیه‌وه‌گلاوه‌ كه‌ دوور نییه‌ حكومه‌تی هه‌رێمی كوردستان بێت، ئه‌مه‌ش‌ بۆ ده‌ربازبوون له‌ ته‌نگژه‌ داراییه‌ خنكێنه‌ره‌كه‌ی و پێویستی زۆری به‌ یارمه‌تی و هاوكاری.

هه‌ندێك سه‌رچاوه‌ش ده‌ڵێن كه‌ ئه‌نقه‌ره‌ پێشنیاری یارمه‌تیدانی بۆ هه‌رێم كردووه‌، به‌و مه‌رجه‌ی له‌ ڕووی سه‌ربازییه‌وه‌ چاوساغ و هاریكاریان بكات له‌ ڕاوه‌دوونانی گه‌ریلاكانی پارتی كریكارانی كوردستاندا و كارئاسانیشیان بۆ بكات.

چه‌ند سه‌رچاوه‌یه‌كی سیاسی و میدیایی عێراقی ئه‌وه‌یان ئاشكرا كردووه‌ توركیا پێش ئه‌وه‌ی ده‌ست به‌ پڕۆسه‌ی “چڕنووكی پڵنگ” بكات له‌ ناوچه‌ شاخاوییه‌كانی هه‌رێمی كوردستانی عیراق دژ به‌ گه‌ریلاكانی پارتی كریكارانی كوردستان، ئه‌نقه‌ره‌ یارمه‌تی هه‌واڵگری له‌ چه‌ند لایه‌نێكه‌وه‌ ده‌ستكه‌وتووه‌ كه‌ په‌یوه‌ستن به‌ حكومه‌تی هه‌رێمی كوردستانه‌وه‌.

ڕۆژنامه‌ی‌ عه‌ره‌ب زانیویه‌تی كه‌‌ ئه‌نقه‌ره‌ پێشنیاری بۆ هه‌رێمی كوردستان كردووه‌ كه‌ له‌ ڕووی ئابووری و داراییه‌وه‌ یارمه‌یتان بدات، له‌ به‌رامبه‌ریشدا حكومه‌تی هه‌رێمی كوردستان زانیاریان له‌سه‌ر په‌كه‌كه‌ پێ بدات.

ڕۆژنامه‌كه‌ ده‌ڵێت ڕه‌جه‌ب ته‌یب ئه‌ردۆغانی سه‌رۆكی توركیا له‌ هه‌وڵی قۆزتنه‌وه‌ی ته‌نگه‌تاوییه‌ داراییه‌كه‌ی‌ عێراق دایه‌ به‌ هۆی نزمبوونه‌وه‌ی نرخی نه‌وت كه‌ هه‌رێمی كوردستانیشی گرتۆته‌وه‌.

سه‌رچاوه‌كه‌ به‌ ڕه‌های ئه‌و هه‌واڵه‌ی پشتڕاست نه‌كردۆته‌وه‌، به‌ڵام ئاماژه‌ی به‌وه‌داوه‌ كه‌ ئه‌نقه‌ره‌ پێش ئه‌وه‌ی كرده‌ سه‌ربازییه‌كه‌ی دژ به‌ گه‌ریلاكانی په‌كه‌كه‌ ‌ له‌ له‌ 17 ی ئه‌م مانگه‌ له‌ هه‌رێمی كوردستان ئه‌نجام بدات، چاوی به‌ خشته‌ی دانه‌وه‌ی قه‌رزه‌كانی سه‌ر هه‌رێمی كوردستاندا خشاندۆته‌وه.

توركیا له‌و هێرشه‌یاندا فڕۆكه‌ی شه‌كه‌ر و په‌روانه‌دار و تانك و تۆپباران و دابه‌زینی ئاسمانی له‌ چه‌ند ناوچه‌یه‌كی هه‌رێمی كوردستاندا به‌كارهێناوه‌. چاودێران له‌و تێڕوانینه‌یاندا بوونی لێكتێگه‌یشتنی نێوان ئه‌نقه‌ره‌ و هه‌ولێر- یان به‌هه‌ند وه‌رگرتووه‌، ئه‌وه‌شیان له‌به‌رچاو گرتووه‌ كه‌ هه‌ڵوێستی هه‌ریمی كوردستان به‌رامبه‌ر به‌ هێرشه‌ سه‌ربازییه‌كه‌ی‌ توركیا هه‌ڵوێستێكی شه‌رمنانه‌ بووه‌.

هه‌ولێر به‌ ڕه‌تكردنه‌وه‌ی ئاگالێبوونی له‌و كرده‌ سه‌ربازییه‌ی توركیا، ویستی تۆپه‌كه‌‌ هه‌ڵداته‌ گۆڕه‌پانی به‌غداوه‌، له‌و میانه‌شدا جه‌بار یاوه‌ر- ی ئه‌مینداری گشتی وه‌زاره‌تی پێشمه‌رگه‌ی هه‌رێمی كوردستان بۆ كه‌ناڵی ئاسمانی ڕووداو گوتویه‌تی كه‌ ئه‌وان گومانیان له‌ ڕاستی و دروستی داتاكانی حكومه‌تی فیدڕاڵ هه‌یه‌ سه‌باره‌ت به‌ بۆردومانی ئاسمانی و تۆپبارانی توركیا و ئێران له‌ خاكی هه‌رێمی كوردستاندا.

یاوره‌ ئه‌وه‌شی گوتووه‌ كه‌ گومانیان له‌و زانیارییانه‌ هه‌یه‌ كه‌ فڕۆكه‌كانی توركیا به‌ قوڵایی 120 كیلۆمه‌تر سه‌روه‌ری ئاسمانی عێراقییان به‌زاندبێت و بی ڕه‌زامه‌ندی حكومه‌تی فیدڕاڵی عێراق بۆردومانی ناوچه‌یه‌كی شاری سلێمانی- یان كردبێت.

یاوەر گوتی به‌ گوێره‌ی ده‌ستور و یاسا پاراستنی هه‌موو ئاسمانی عێراق به‌ هه‌رێمی كوردستانیشه‌وه‌، به‌شیكه‌ له‌ به‌رپرسیاریه‌تی حكومه‌تی ئیتحادی له‌ به‌غدا، بۆیه‌ ئه‌و تۆماتانه‌ی ئاراسته‌ی هه‌رێم ده‌كرین له‌وباره‌وه‌ ناهه‌ق و به‌تاڵن.

یاوه‌ر وتیشی كه‌ له‌ ساڵی 2007 وه‌ بۆردومانكردنی سنوری عێراق به‌رده‌وامه‌، 13 ساڵه‌ سنوری عێراق ده‌به‌زێندرێت، له‌ سه‌ره‌تای ئه‌مساڵیشه‌وه‌ تاوه‌كو ئێستا، سه‌روه‌ری ناوچه‌ سنورییه‌كانی هه‌رێمی كوردستان 137 جار به‌زێندراوه‌ و تووشی بۆردومانی ئاسمانی و زه‌مینی بوونه‌وه‌، 135 جار له‌ لایه‌ن توركیا و دووجاریش له‌ لایه‌ن ئێرانه‌وه‌.

یاوه‌ر پێی وایه‌ ته‌نها به‌ به‌یاننامه‌ حكومه‌تی ئیتحادی له‌ به‌غدا ناتوانێت به‌ر به‌و پێشێلكارییانه‌ بگرێت، بۆیه‌ ده‌بێت به‌ لێبڕاوییه‌كی زیاتره‌وه‌ مامه‌ڵه‌ له‌گه‌ڵ توركیا و ئیراندا بكات و له‌گه‌ڵیان بچێته‌ گفتوگۆوه‌ و ئه‌و گرفته‌ چاره‌سه‌ر بكات.

سه‌رچاوه‌یه‌ك باسی له‌وه‌ كردووه‌ كه‌ جوڵه‌ی هێزه‌كانی یه‌كێك له‌ پارته‌ كوردییه‌كانی هه‌رێمی كوردستان له‌ نزیك قه‌ندیل پێش ده‌ستپێكردنی كرده‌ سه‌ربازییه‌كه‌ی توركیا، له‌وانه‌یه‌ بۆ ئاشكراكردنی پێگه‌كانی په‌كه‌كه‌ بوو بێت بۆ هێزی ئاسمانی توركیا.

سه‌رچاوه‌كه‌ ئه‌وه‌شی گوتووه‌ كه‌ له‌م ساڵانه‌ی دواییدا په‌یوه‌ندییه‌كانی نێوان ڕه‌جه‌ب ته‌یب ئه‌ردۆغانی سه‌رۆكی توركیا و مه‌سعود بارزانی سه‌رۆكی پارتی دیموكراتی كوردستان زۆر به‌ خێرایی په‌ره‌یسه‌ندووه‌، له‌ بری ئه‌وه‌ش مه‌سعود بارزانی به‌ پاڵنه‌ره‌ نه‌ته‌وه‌ییه‌كانی لاگیری پارتی كریكارانی كوردستان بێت، كه‌چی له‌ زۆر ئان و ساتدا لاگیری‌ ئه‌ردۆغان بووه‌.

چاودێران پێیان وایه‌ پاڵنه‌ری ئابووری له‌ پشت ئه‌و زۆر لێكنزیكبوونه‌وه‌ی نێوان ئه‌نقه‌ره‌ و هه‌ولێره‌، چونكه‌ به‌ هۆی سه‌رهه‌ڵدانی ڤایرۆسی كۆرۆناوه‌ هه‌رێمی كوردستان پێویستی زۆریان به‌ یارمه‌تی دارایی هه‌یه‌، به‌ تایبه‌تیش دوای ئه‌وه‌ی حكومه‌ته‌كه‌ی عه‌بدولمه‌هدی پێشوو ئه‌و بڕه‌ پاره‌یه‌ی برێ كه‌ بۆ هه‌رێمی كوردستانی ده‌نارد، تا ئه‌و كاته‌ی له‌گه‌ڵیان ده‌گاته‌ ڕێككه‌وتنێك.

چاودێران پێیان وایه‌ ته‌نگژه‌ داراییه‌كه‌ی‌ هه‌رێمی كوردستان سه‌خت و دژواره‌، به‌ تایبه‌تیش كه‌ سه‌رهه‌ڵدانی ڤایرۆسی كۆرۆنا- شی به‌دوادا هاتووه‌، بۆیه‌ پێیان وایه‌ ئه‌م فاكته‌ره‌ هۆكاری لێكتێگه‌یشتنه‌ گریماناوییه‌كانی ئه‌م دوایه‌ی نێوان ئه‌نقه‌ره‌ و كورده‌كانی عێراقه‌ به‌و ئامانجه‌ی یارمه‌تی و هاریكاری خێرایان ده‌ستكه‌وێت.

عێراقییه‌كان له‌وه‌ ده‌ترسن كه‌ ئه‌م ده‌ستتێوه‌ردانه‌ سه‌ربازییه‌ی توركیا، ته‌نها بۆ لیدانی په‌كه‌كه‌ نه‌بێت و ئامانجه‌كانیشی دوورمه‌وداتربن، پێشیان وایه‌ گوزاره‌یه‌ له‌ چاوتێبڕینه‌كانی توركیا له‌ ده‌ستگرتن به‌سه‌ر ڕووبه‌ره‌ خاكێكی فراوانی هه‌رێمی كوردستانی عێراق و باكوری ڕۆژئاوای كوردستان له‌ سوریا، له‌ هه‌ردوو ناوچه‌كه‌شدا ئه‌نقه‌ره‌ په‌كه‌كه‌ی كرۆدۆته‌ بیانوو و پاساو بۆ ده‌ستتێوه‌ردان و ئه‌نجامدانی هێرشی سه‌ربازی.

چاودێران ده‌ڵێن كه‌ ڕوخساره‌كانی دروستكردنی پشتێنه‌یه‌كی ئه‌منی توركی له‌ قوڵایی خاكی هه‌رێمی كوردستاندا ده‌ركه‌وتوون، توركیاش هه‌روه‌ك له‌ سوریا كردی، له‌و ناوچانه‌ ناكشێته‌وه‌ كه‌ له‌ كرده‌ی سه‌ربازی “چڕنووكی پڵینگ” دا كردوونییه‌ ئامانج. ته‌نانه‌ت توركیا ڕازیش نییه‌ بنكه‌ سه‌ربازییه‌كانی له‌ خاكی هه‌رێمی كوردستان بكێشێته‌وه‌ كه‌ گرنگترینیان بنكه‌ی سه‌ربازی به‌عشیقه‌- یه‌ له‌ نزیك موسڵ.

دەرمان لە ئیمارات دێت، دابەشی دەکەن بەناوی رێکخراوی مامەوە

د. غالب محەمەد ئەندامی پەرلەمانی عێراق رەخنەیەکی توند لە کۆمپانیاکانی یەکێتی و رێکخراوەکانیان دەگرێت و دەڵێت ” دەرمان وڵاتی ئیماراتی عەرەبی دەینێرێت و ئەمان بەناوی رێکخراوی مامەوە دابەشی دەکەن”.

لە پۆستێکدا لە ئەکاونتی خۆی. دغالب محەمەد ئەندامی پەرلەمانی عێراق نوسیوویەتی ” بەناو حكومەتی عیراق وەرگیراوە كە چی دەزگای مام بەناوی خۆی بڵاوی دەكاتەوە”.

هەروەها نووسیوویەتی ” بەراستی شەرمە پارەی میلەت بدزیت بە ناوی كۆمپانیای نۆكان و ئیدارەی گشتی و قەیوان ، دوای ئەو دەرمان و پێداویستی پزیشكی لە وڵاتی ئێماراتی عەرەبی دێت بیكەیتە ناو مام”.

ئەو پەرلەمانتارەی گۆڕان لە کۆتایی پۆستەکەیدا نووسیویەتی ” ئەم بنەماڵەی بوون بە خاوەنی دەیان ملیار دۆلار لەسەر داهاتی خەڵك كەچی بۆ خێرەكەش دەست دەبەن بۆ ماڵی خەڵك”.

زۆرێک لەو یارمەتیانەی لەلایەن وڵاتانی کەنداو و دەرەوە کە کۆمەکی هاوڵاتیان هەرێم دەکرێت، رێکخراوەکانی پارتی و یەکێتی قۆرخیان کردووە بۆ خۆیان و وەک دەستکەوتێکی حیزبی دابەشی دەکەن بەسەر ئاوارەو خاوەن پێداویستیەکاندا.

مانگی ڕابردو ٢٧ کۆڵبەر کوژران و بریندار بون

هاوپشتی:ئاژانسەکان

لەماوەی مانگی ڕابردووی زایینی، لانیکەم ٢٧ کۆڵبەر و کاسبکار لە سنوورەکانی کوردستان کوژراون و یان بریندار بوون.

بەپێی هەواڵێکی ڕێکخراوی مافی مرۆڤی هەنگاو، لە ماوەی مانگی ڕابردو لانیکەم ٢٧ کۆڵبەر لە سنوورەکانی کوردستان کوژراون و بریندار کراون کە ٨٩٪ی ئەو حاڵەتانە بە تەقەی ڕاستەوخۆی هێزە چەکدارەکانی ئێران و تورکیا بووە.

بە پێی ئەم ڕاپۆرتە، لەو ماوەیەدا ٧ کۆڵبەر و کاسبکار کوژراون و ٢٠ کۆڵبەریش بریندار بوون. زیاترین ژمارەی کوژران و بریندار لە پارێزگای ئورمیە تۆمار کراوە کە ١٨ حاڵەت بووە.

چۆنێتی کوژران یان بریندار بوون
تەقەی ڕاستەوخۆ : ٢٤ حاڵەت (٧ کوژراو و ١٧ بریندار) کە دەکاتە ٨٩٪ ی کۆی حاڵەتەکان.
تەقینەوەی مین: ٢ حاڵەت (٢ بریندار ) کە دەکاتە ٧.٥٪ ی کۆی حاڵەتەکان.
لێدان و کوتان: ١ حاڵەت (١ بریندار ) کە دەکاتە ٣.٥٪ ی کۆی حاڵەتەکان.

جیاکردنەوە بە پێی پارێزگاکان
پارێزگای ئورمیە: ١٨ حاڵەت ( ٧ کوژراو ١١ بریندار).
پارێزگای سنە: ٥ حاڵەت ( ٥ بریندار ).
پارێزگای کرماشان: ٤ حاڵەت (٤ بریندار ).

بەڤیدیۆ..لینۆڤۆ نمونەی کۆمپیوتەرە نوێکەی بە بەکارهێنەرانی ناساند

لینۆڤۆ، گەورە کۆمپانیای چینی بواری تەکنەلۆجیا کۆمپیوتەرە نوێکەی بە بەکارهێنەرانی ناساند، کە پاڵپشتی تەکنەلۆجیای نەوەی پێنجەم(5G) دەکات و خێراییەکی سەرسوڕهێنەری هەیە.

کۆمپویەتەرە نوێکەی لێنۆڤۆ ناوی( Lenovo Flex 5G) و کێشی تەنها 1350 گرامە، شاشەکەی تەچ سکرینە و 14 ئینچە، توانای نوشتانەوە بە 360 پلە هەیە و وەک تابلێت بەکاردەهێنرێت، قەڵەمی تایبەت بەخۆی لەگەڵدایە.

میمۆرییەکەی 256 گێگابایتە، بەهۆی بونی باتریەکی ناوازە تیایدا لەدوای بارگاویکردن توانای ئیشکردنی بۆ ماوەی 25 کاتژمێر هەیە.

پرۆسێسەری کۆپیوتەرەکە سناپدراگۆنی (Snapdragon 8cx )ە، ڕامەکەی 8 گێگابایتە، بەهۆی پاڵپشتیکردنی 5G بە مۆدیمێکی تایبەت توانای داونلۆدکردنی داتای هەیە بە بڕی دو هەزار مێگابایت لە یەک چرکەدا.

لەرێگەی فینگەر پرینت و تەکنەلۆجیای ناسینەوەی روخسار(Face Recognition) دەتوانرێت قوفڵ بکرێت، هاوکات شوێنی سیمکارت و ئی کارتی(e-Card)ی هەیە و دەتوانرێت وەک مۆبایل بەکار بهێنرێت.

نرخی دەستپێکی لاپتۆپەکە لە ئەمریکادا هەزار و 399 دۆلار دەبێت.

دانانی پارتی و یه‌کێتی و کۆنگره‌ی نیشتمانیی عێراقی له‌ لیستی ڕەشی ئەمریکا

فازیل کوردی:

له‌سه‌ردانانی پارتی دیموکراتیی کوردستان و یه‌کێتیی نیشتیمانیی کوردستان و کۆنگره‌ی نیشتمانی عیراقی له‌ لیستی ڕه‌شی ئەمریکا و چۆنییه‌تیی مامه‌ڵه‌ی پارتی و یه‌کێتی له‌سه‌ر دۆسیه‌ی که‌رکوک و ناوچه‌ دابڕێندراوه‌کان، توانرا هه‌ندێ سه‌ره‌داو ئاشکرا بکرێن، ئه‌ویش له‌ ڕێگای په‌یوه‌ندیکردن به کۆنه‌ دیپلۆماتێکی ئه‌مریکیی که‌ کاتی خۆی ده‌ستڕۆیشتووی هه‌ر یه‌ک له جه‌ی‌ گارنه‌ر و پۆڵ برێمه‌ر بووه‌ پاش ڕزگارکردنی عێراق له‌لایه‌ن هێزه‌کانی ئه‌مریکا و هاوپەیمانان‌.

ئه‌م کۆنه‌ دیپلۆماته‌ له‌ قسه‌کانی باس له‌وه‌ ده‌کا که‌ به‌ر له‌ هاتنی ئه‌مریکا پلانێک داڕێژرابو که‌ چۆن ئه‌و هێزه چه‌کدارانه‌ی له عێراقن به‌ عه‌ره‌ب و کورده‌وه کۆنترۆل بکرێن بۆ ئه‌وه‌ی ئه‌م هێزانه‌‌ نه‌بنه‌ به‌رهه‌ڵستکار یان تێکده‌ری پرۆسه‌ی ئازادکردنی عێراق پاش له‌ناوچوونی ڕژێمی به‌عس‌،‌ به‌ شێوه‌ێک له‌ شێوه‌کان بێدەنگبکرێن ئینجا به‌هێزی سەربازی بێ یان به‌ پاره‌. بۆ ئه‌مه‌ش یاسای (پاتریۆد ئاکت ئاماده‌بوو، لیستی ئه‌م هێزه‌ چه‌کدارانه‌ ئاماده‌کرابوو لەدوای رووداوەکانی ١١ی سێپتێمبەر لەلایەن وەزارەتی ئاسایشی ناوخۆی ئەمریکا، له‌ کۆنگریسیش ده‌رچوبوو و له‌ ئه‌نجومه‌نی نوێنه‌رانیش ده‌نگی زۆرینه‌ی پێدرابوو وه‌کو یاسا جێگیر کرابوو.
بەم یاسایە پارتی و یه‌کێتی و کۆنگره‌ی نیشتمانی عیراقی خرابوونە لیستی ڕەش.

ئه‌مریکییه‌کان‌ پێشبینی ئه‌وه‌یان کردبوو که‌ چه‌ند هێزێکی به‌رهه‌ڵستکاری سوننی له‌ ناوچه‌ سوننه‌نیشینه‌کان دروستدەبن، له‌ هه‌مان کات‌ هه‌رسێ هێزی چه‌کداری پارتی و یه‌کێتی و کۆنگره‌ی نیشتمانی عیراقی له‌م هاوکێشه‌یه‌دا بوون، بۆ ئه‌مه‌ش ئه‌مریکییه‌کان که‌وتنه‌ نێوان دوو بژارده:‌
یان هێزێکی زۆر ڕه‌وانه‌ی عیراق بکه‌ن، یان به‌ پاره‌ ڕازییان بکه‌ن و چاره‌سه‌ری ئه‌م کێشه‌یه‌ بکه‌ن. پاش ڕاوێژکردن لەگەڵ پسپۆران و شاره‌زایان له‌ کاروباری عێراق بۆیان ده‌رکه‌وت که‌ ئه‌م هێزانه‌ هێزی فشۆڵ و چاوچنۆکن. لەبەر ئەوە بژارده‌ی دوه‌میان هه‌ڵبژارد به‌پێی ئه‌وه‌ی کە زۆر لە عێڕاقییەکان ئاسانه‌ ملکه‌چی پاره‌ بن.

پاش هاتنی هێزەکانی ئه‌مریکا و کۆنترۆلکردنی عێراق له‌ یه‌کێک له‌ کۆشکه‌کانی سه‌ددام له‌ به‌غدا هێزه‌کانی ئه‌مریکا پاره‌یه‌کی یه‌کجار زۆر ده‌دۆزنه‌وه‌.
جه‌ی گارنه‌ر بۆ ئه‌وه‌ی یارمه‌تی پارتی و یه‌کێتی بدا چونکه‌ دۆستی نزیکی تاڵه‌بانی و بارزانی بوو، له‌لایه‌کی تریش بۆ ئه‌وه‌ی تووشی لێپرسینه‌وه‌ نه‌بێ له‌لایه‌ن گه‌لی ئه‌مریکا -باجده‌ر-تاکس پەیەر- بڕیار ده‌دا که‌ مانگانه‌ ٣٠ ملیۆن دۆلار له‌م پاره‌یه‌ بدرێ به‌ پارتی و یه‌کێتی و دابه‌شبکرێ به‌یه‌کسانی (١٥ ملیۆن بۆ پارتی و ١٥ ملیۆنیش بۆ یه‌کێتێ). وردەکاری پارەی تەرخانکراو بۆ کۆنگرەی نیشتمانی لای من گرنگ نییە. مانگانه‌کە‌ به‌رده‌وام ده‌بێ تاوه‌کوو جه‌ی گارنه‌ر ده‌ڕوا و پۆڵ برێمه‌ری جیگرەوەی ده‌ستبه‌کارده‌بێ.

برێمه‌ریش بۆ ئه‌وه‌ی ڕزگاری بێ له‌م مانگانه‌ بڕیارده‌دا ڕێککه‌وتنێک مۆر بکرێ له‌نێوان عه‌ره‌به‌کان و پارتی و یه‌کێتی که‌ ڕێژه‌ی پاره‌ی داهاتی نه‌وتیان بۆ زیاد بکرێ له‌ ١٣./’ بۆ ١٧./’  له‌جیاتی ما‌نگانه‌ی پاره‌ی کاش به‌ مه‌رجێک هێزه‌ چه‌کداره‌کانی پارتی و یه‌کێتی له‌ هێلی ٣٦ بمێننەوە و نه‌یه‌نه‌ پێشه‌وه‌ که‌ ده‌کاته‌ ناوچه‌ جێناکۆکه‌کانی ئه‌مڕۆ لەنێوان حکومەتی هەرێمی کوردستان و حکوومه‌تی عێراقی که‌ ناونراوه به‌‌ مادده‌ی ١٤٠.

بۆ پشتڕاستکردنه‌وه‌ لە وەرگرتنی ئەم بڕە پارانە، باشترین که‌س بایز تاڵه‌بانیی رەحمەتیی دەبوه که‌ ئەوکات لێپرسراوی دارایی یەکێتی بوو و لە کابینەی حەوت وه‌زیری دارایی بوو، چونکه‌ ئه‌م هه‌موو مانگێک به‌شی یه‌کێتی وه‌رده‌گرت له‌ فڕۆکه‌خانه‌ی هه‌ولێری کۆن. ئەگەر بایز تاڵەبانی نکوڵی کردبوایە، بەڵگەی ئاشکرای لەسەرە لەلایەن ئەو کەسەی کە بەشە مانگانەکەی تەسلیمکردوە.
زۆر سەرەداوی هاستیاری تر هەن لەبارەی دانانی پارتی و یەکێتی و کۆنگرەی نیشتمانی لە لیستی ڕەش لەلایەن ئەمریکاوە، پێویست بە هەڵوەستە دەکات و شیکردنەوەی بابەتییانەی دەوێ بۆ هەڵدانەوەی لاپەڕە ڕەشەکان.
هۆی سه‌ره‌کی پارتی و یه‌کێتی له‌ لیستی ڕه‌ش ده‌گه‌ڕێته‌وه بۆ بڕیاری‌ خودی ئه‌م دوو حیزبه که‌ له‌کاتی خۆی داویانه، به‌تایبه‌تیش پاش ڕزگارکردنی عێراق له‌لایه‌ن ئه‌مریکاوه‌‌‌، چونکه‌ خۆیان ڕازیبوون ناویان له‌م لیسته‌ بێ به‌رامبه‌ر به‌ چەند ملیۆن دۆلارێک کە لەسەرەوە باسمان کرد.‌

‌ لایەنە شاراوەکەی دروست بوونی قەوارەی هەرێمی کوردستان

هەڵەیە ئەوەی پێیوایە حکومەتی هەرێم بەرهەمی ڕاپەڕین و شۆڕشی چەکداری چەندین ساڵەی خەباتی سیاسی کوردە، بێگومان راپەڕینی خەڵک و شۆڕشی چەکداریی کاریگەریی خۆیان هەبوە.

لەگەڵ ئەوەی کەس ناتوانێ نکوڵی لەوە بکا کە میللەتی ئێمە بەدرێژایی سەدەیەکە خەریکی خەباتی سیاسی و چەکداری بووە و بە هەزاران کەس شەهید بووە، بەڵام دروستبوونی ئەم هەرێمە و پەیوەستکردنی بە شۆڕشی کورد رەنگە زۆر لە جێی خۆی نەبێ، بەڵکو ڕاستەوخۆ بەرهەمی لێکەوتەی شەڕی ڕزگارکردنی کوێتە بە سەرپەرشتیی ئەمریکا و هاوپەیمانان، بە تایبەتی لە پاش ڕزگارکردنی عیراق لە دەستی دیکتاتۆریەت و نووسینەوی دەستوری عیراق بە سەرپەرشتی ئەمریکا دەستخستنە ناو سیاسەت لە عیراق بە گشتی، ئەمە بوو بە بەرهەمی دروستبوونی ئەو هەرێمە.

ئاشکرایە میللەتی ئێمە لەدوای ئەنفال، بەعس کۆنترۆڵی هەموو کایەی سیاسی میللەتی ئێمەی کردبوو، دەستیشی خستبوە ناو رێکخستنەکانی هێزە سیاسییەکانی کوردستانیشەوە و هەموو ئەو هێزە سیاسییانە پەناهەندەبوون لە وڵاتانی دی، بەتایبەتی لە ئێران.
ئەوەی کە ئەم هەرێمەی دروستکردوە گۆڕانکاری لە هاوکێشە سیاسییەکانی ناوچەکە و بەرژەوەندیی وڵاتانی زلهێز بو لە ڕۆژهەڵاتی ناوەڕاست.

ئەمەی سەرەوە بیرەوەری برادەرێکم بیردەخاتەوە (ج ث) کە لە ١٩٩١ فەرماندەیەکی باڵایی سەنتەری هاوکاری سوپای ئەمریکا بوو لە زاخۆ بە هاوکاری هێزی سوپای ئینگلتەرا ئەم سەنتەرە بەڕێوەدەبرا.

(ج ث) دەگێڕتەوە کاتێ ئاوارە کوردەکان بە دەیان هەزار ئاوارەی ئیران و تورکیا بون، فشارێکی زۆر هەبو کە چۆن ئەم هەمو ئاوارەیە بگەڕێندرێتەوە. بۆ ئەم مەبەستە و وەک هەنگاوی یەکەم، بیرۆکەی دو چادرگەی گەورە لە فرۆکەخانەی بامەڕنی و فڕۆکەخانەی هەریر دروستبکرێ بۆ گەیاندنی پارمەتییە مرۆیییەکان. ئەو دەگێڕێتەوە و دەڵی: “ترسی عێراقمان هەبو لە بۆردومانکردنی چادرگەکان بەتایبەتی ڕای ئاوەرەکان وەرگیرابوو کە ترسیان لە چەکی کیمیای و کیمیاباران هەبو.” پەیوەندی دەکەن بە حکومەتی عیراقی بەتایبەتی تاریق عەزیز بۆ ئەم دوو چادرگەیە و گەرەنتی وەرگرن کە هیچ هێرشیکی سەربازی ئەنجامنەدرێ لەلایەن عیراق. تاریق عەزیز ئاگاداریان دەکاتەوە کە سەدام حسێن فەرمانی کردوە کە نەک هەردوو چادرگەی بامەڕنی و هەریر بەڵکو سوپای عیراقی لە هەرسێ شاری هەولێر، سلێمانی و دهۆک کە ناوچەی ئۆتۆنۆمیە پاشەکشە پێدەکا بە مەرجێک ئەمریکا سەرپەرشتی بکا بەڵام بەبێ کەرکوک، چونکە بە قسەی سەدام، ئەگەر کەرکوک بخرێتە ناو ئەو پلانە ئەوا کوردەکان داوای جیابونەوە لە عیراق دەکەن لەبەرئەوەی دەبن بە خاوەنی ئابورییەکی بەهێز کە سامانی نەوتە.
لەبەر ئەمە، دووبارەی دەکەمەوە هەڵەیە ئەوەی پێیوایە حکومەتی هەرێم بەرهەمی ڕاپەڕین و شۆڕشی چەکداری چەندین ساڵەی خەباتی سیاسی کوردە.

نەمانی شکۆی مرۆڤ لە هەرێمی کوردستان..

🔹‏شكۆی مرۆڤ پەیوەندی بە پۆست و پارەوە نییە بەڵكو شكۆی مرۆڤ هەڵوێست و راستگۆیی و دڵسۆزیی و پابەندبوونە بە بەهای بەرزی مرۆڤایەتی و ئایینەکان.
🔸بە درێژایی مێژوو خودای گەورە هەرگیز لەبەر نەبوونی ئایین و زانست و تەکنۆلۆژیا و کۆشک و تەلار و باڵەخانە و ئەهرامات، مرۆڤی لەناو نەبردوە، بەڵام لەبەر شکاندنی شکۆی مرۆڤ و ستەم و ستەمکاریی و داڕمان لە ڕەوشتی جوان، ژیان و شارستانیەتی ڕووخاندوە و کۆشک و تەلار و باڵاخانەکانی لە رێی دەسەڵاتەکانی خۆیەوە تێک و پێک داوە.
🔹تێکدان و لەناوبردنی گەردوون لای خودای گەورە ئاسانترە لە شکاندنی شکۆی مرۆڤ زانستیش هیچ نرخێکی نیە ئەگەر مرۆڤ تێیدا شکۆدارنەبێ .
🔸ئەبێ مرۆڤ باڵاتر بێ لە تەکنەلۆژیا، باڵاتر بێ لە زانست، باڵاتر بێ لەشارستانیەت، باڵاتر بێت لەسیاسەت دەبێ زانست و تەکنەڵۆژیا و شارستانیەت و سیاسەت بۆ خزمەتی مرۆڤ بن، نەک مرۆڤ بکرێتە قوربانی دەستی ئەوانە.
🔹لە کوردستان بەهۆی دەستبەرداگرتنی شکۆی مرۆڤ و بێنرخ بوونی مرۆڤ و سەرگێژکردنی مرۆڤ بە کۆمەڵێک شتی بێ کەڵک و بێماناوە، زۆرجار تاکی کورد نازانێت بۆ دەنگ هەڵدەبڕێت یا ئەو کاتانەشی دەنگ هەڵەبرێت زۆر جار ئامانجەکە ناپێکێت.
🔸تاکی کورد لە ناخییەوە هەست دەکات بابەتێک پرۆژەیەکی هەیە، بەڵام بەهۆی سەرگێژبوونی بە کۆمەڵێک شتی ترەوە، وەک پێناسی مرۆڤ و ماف و ژیان، نازانێت قەزییەو بابەتەکەی چییە و دەبێت بۆچی تێبکۆشێت.
🔹هۆکاری ئەم دۆخەش دەگەڕێتەوە بۆ ئەو بەرداشە سیاسی و کۆمەڵایەتییانەی کە زەمەنێکە لەم کۆمەڵگەیەدا هەڵدەسوڕێن، بۆ بێنرخ کردنی مرۆڤ و هەر رۆژە و بەجۆرێک بیر لە دیلکردنی مرۆڤ و لە ژێرپێنانی کەرامەتی مروۆڤ و مرۆڤایەتی دەکرێتەوە، ئەمانەش پێکەوە بونەتە هۆکار بۆ ونبوونی ئەو کێشە سەرەکییەی کە دەروونی مرۆڤەکانی داغان کردووە و هەڵتەکاندووە.
🔸گەلی کورد و کۆمەڵگەکەی زۆری چەشتووە لەدەست حکومەتەکان هەر لە پێش راپەڕین و دووای راپەڕین و ئەو ٢٩ ساڵەی حوکمرانی کوردییش وای لە کورد و تاکەکانی ناو کۆمەڵگەی کوردی بە تایبەتی باشوری کوردستان کردوە کە متمانەیان بە حکومەت و دەسەڵاتی کوردی نەمینێت و ئاواتەخوازی ئەوە بن بێگانەکان حکومداریان بکەن لەبری ئەم دەسەڵاتدارانە لایان ئاسایی بێت.
🔹حکومەتە یەک لەدوای یەکەکان و حیزبەکان لەکاتی هەڵبژاردنەکاندا دەیان دروشمی زۆر بریقەدارو بەڵێنی زۆریان بە خەلک داوە لەپاشان هیچیان جێبەجێ نەکردوە یاخود بۆی نەکراوە جێبەجێی بکا، لە باشکردنی بژێوی ژیان ودابینکردنی پێداویستەکانیان لە خزمەتگوزاری تەندروستی و چاککردنی ڕێگاوبان، دابینکردنی شوێنی نیشتەجێبوون و باشکردنی سیستمی خوێندن و دامەزراندنی دەرچوان و زیادکردنی هەلی کار.
🔸لەو چەند ساڵانەی رابردووشدا کێشەی ئازادی رادەربڕین و گرفتی موچە بەزەقی رەنگیدایەو و زیاتر لە متمانەی هاوڵاتی کەمکردۆتەوە بەرامبەر بە حکومەت و دامو دەزگاکانی.
🔹هاوڵاتی بە چاوێکی زۆر خراپ و گوماناوییەوە سەیری هەمو کارێک و هەنگاوێکی حکومەت دەکا تەنانەت ئەگەر لە بەرژەوەندی هاوڵاتیش بێت، ئەمەش وایکردوە داواکاریەکانی هاوڵاتی سەرەتایی بن و بۆ تێرکردنی سک و دابینکردنی پێداویستەکانی هەنوکویی بێت و بیر لە پڕۆژەی درێژخایەن نەکەنەوە .
🔸کوردستان لەبارودۆخێکی لەم شێوەیەی ئێستادا کە بەدەست دەیان قەیرانی ناوخۆی و ڤایرۆسی کۆرۆناوە دەناڵێنێت هەموو حزبەکانی کوردستان کەم تا زۆر پشکیان هەیە لە دروستبوونی ئەم قەیرانانە
🔹حکومەت و دەسەڵات سەرەتایی ترین مافەکان بۆهاووڵاتیان دابین ناکات تەنانەت موچەکانیشیان نادەنێ کە لە بەغدادەوە دێت بۆ فەرمانبەران.
🔸 ئەوەی جێگەی داخە لەبەرامبەر ئەم دەسەڵاتە خۆسەپێنە ئۆپۆزسیۆنێکی چالاک و کرداریمان نیە پشتیوانی لەمافخوراوان بکات.
🔹حکومەت خەمى خەڵک و نەخۆشى کۆرۆناى نییە ، لەبیرى ئەوەدایە چۆن بە کۆرۆنا خەڵک لەبابەتى موچە بێدەنگ بکات چەندە کەرەنتینەکردن و قەدەغەی هاتوچۆ پیویستە دووئەوەندە موچە و ژیانی خەڵک پێویستترە .
🔸سیاسەت لەم هەرێمەدا وایلێهاتوە مانای ڕاستەقینەی لەدەست داوە، دادپەروەریی سەرەو ژێر کراوە، شکۆی مرۆڤ وەک سەنتەر بوون لەکەدار کراوە گرنگە تاک بەتاکی کورد ئەم ڕاستیە بزانێت شکۆی مرۆڤایەتی ناگۆردرێتەوە، ژێر دەستەیی هەرچرکەیەکی مردنێکە.
🔹ھەموو مرۆڤێک شایەنی بایەخ و ڕێزلیێنانە سەرەڕای ئەوەی مافی ھەیە کە چۆن ژیان بەسەر بەرێ ئەوەش لە ئادەمیزادبونیەوە سەرچاوە دەگرێت، بە پێی ئەو باوەڕەی ھەیەتی کە دەوترێ ھەندێ شتی دیاری کراو ھەن کە مرۆڤێک لەگەڵ مرۆڤێکی تر دا بەشداری تیا دەکەن بەتایبەت مافە سروشتیەکان .
🔸جیاوازی ئاینی یان جێندەری یا نەتەوەیی نابنە بنەمایەک بۆ ڕێزگرتنی مرۆڤ ھەر کەسەو وەک مرۆڤ مافی خۆیەتی ئەو ژیانە ھەڵبژێریت کەخۆی مەبەستیەتی بەمەرجێک مافەکانی خەڵکی دیکە پێشێل نەکات بەڵام ئەوەی دروست نەبوو ئەمانە کردیان لە بەرامبەر شکاندنی شکۆی مرۆڤایەتی.
🔹بەشێوەیەکی گشتیی هەموو ئەو هۆکارانەی کە باسمانکردن ئەوە دەردەخەن شکۆی مرۆڤ و بەهای مرۆڤبوون پێشێلکراوەو دەکرێت وە بە بیانووی جیاواز و هەندێکجار لەبەر نەزانیی و ناهۆشیاریی و شڵەژاویی دۆخەکە، ڕەچاویی شکۆ و بەهای مرۆڤ ناکرێت.

🔸 ئیتر کاتی ئەوە ھاتوە کۆتایی بە شکاندنی شکۆ و کەرامەتی مرۆڤ و دزین و قەیران و خوێن مژیە بھێنرێت و تاک و هاوڵاتی کوردیش خۆی دەتوانێت شکۆ بۆ خۆی بگێڕێتەوە..

یادیان دەکەینەوە تا بیریان نەچێتەوە ! کۆمەڵکۆژی هەولێڕ

کۆمەڵکۆژی هەولێر: یادیان دەکەینەوە تا بیریان نەچێتەوە !