fbpx

Author Archives: Hawpshti Media

بێریڤان ئەیوب: هێزە ئەمنییەکان نامرۆڤانە مامەڵەیان لەگەڵ دەکردم

هاوپشتی:هەولێر
بێریڤان ئەیوب، ڕایدەگەیەنێت، هەموو ئەو تۆمەتانەی ئاڕاستەی کرابوو ناڕاست بوون و بێتاوان دەرچوو، دەشڵێت: سەرەتای دەستگیرکردنم هێزە ئەمنییەکان نامرۆڤانە مامەڵەیان لەگەڵ کردم و ١٥ ڕۆژ لەژووری تاکەکەسیی دایاننام.

بێریڤان ئەیوب، چالاکوانی بادینان، دوای مانەوەی بۆ ماوەی ساڵێک و شەش مانگ لە زینداندا، ڕۆژی ٦ی مارس بەپێی بە دوو ساڵ زیندانیكردن سزادرا و ئەمڕۆش بە ئازادکردنی مەرجدار، کە بڕگەیەکی یاساییە و لە دادگاکانی هەرێمی کوردستاندا کاری پێدەکرێت، ئازاد کرا.

بێریڤان ئەیوب دوای ئازادبوونی لە کۆنگرەیەکی ڕۆژنامەنووسییدا  سوپاسی دەزگاکانی ڕاگەیاندن، چالاکوانان، پارێزەران و سەرجەم ئەو کەسانەی کرد، کە پشتیوانییان لێکردووە.

بێریڤان ڕایگەیاند، ئەو تۆمەتانەی ئاڕاستەی کرابوون ڕاست نەبوون و بێتاوان دەرچوو، ئەو تەنیا ڕەخنەی لە دەسەڵات گرتبوو، داوای ماف و مووچەی هاوڵاتیانی کردبوو.

لەبارەی دۆخی تەندروستیشیەوە بێریڤان وتی: تووشی شەکرە بووم، چاوەکانم بە باشیی نابینن، هەشت جار مانم لە خواردن گرت، بۆ ئەوەی کەیسەکەم یەکلایی بکرێتەوە.

هەروەها، ئاماژەی بە مامەڵی خراپی هێزە ئەمنییەکان کرد لەگەڵیدا و وتی: سەرەتا بۆ ماوەی ١٥ ڕۆژ لە ژووری تاکەکەسییدا بووم، مامەڵەیان باش نەبوو، نامرۆڤانە بوو.

هەر لەو کۆنگرەیەدا، پارێزەر بەشدار حەسەن، ڕایگەیاند: لە سەرەتای دەستگیرکردنیدا، مامەڵەی تەندروست و یاسایی لەگەڵ نەکراوە.

بێریڤان ئەیوب حەسەن، چالاکوانێکی خۆپیشاندانەکانی ساڵی ٢٠٢٠ی پارێزگای دھۆک كه‌ دایکی پێنج منداڵە، لە ١٣ تشرینی یەکەمی ٢٠٢٠ەوە، لە پارێزگای ھەولێر بەپێی ماددەی ١ لە یاسای ژمارە ٢١ی ساڵی ٢٠٠٣ کە تایبەتە بە “تێکدانی ئاسایشی نیشتیمانی” دەستگیرکرا.

مەرگی سەردەشت عوسمان سەربازە زیندووەکەی ئازادی

دانا مەنمی:
کاتێک یادی سەردەشت عوسمان دەکەینەوە ناتوانین باسی سۆرانی مامە حەمەو کاوە گەرمیانی و ویدادو عەبدولستار تاهیر شەریف نەکەین کە خۆیان گەیاندە کاروانی پڕ سەروەری عەبدولخالق مەعروف و قادر کابان ، ئەوانەی سەردەشت و سۆران و ویدادو عەبدولستار تاهیریان شەهید کرد ئەوانەن کە ئێستا توانای حوکمڕانی و ئیدارەو بەڕێوەبردنیان نییە و خەڵکی کوردستانیان توشی دەیان قەیرانی سیاسی و ئابووری و کۆمەڵایەتی کردووە ، ئەگەر بمانەوێت بەر بە تیرۆری قەڵەم و قەڵەمکوژەکان بگرین بۆ ئەوەی سەدان سەردەشت و کاوەی تر نەبنە قوربانی پێویستیمان بە شۆڕشێکی ڕۆشنبیری فیکری هەیە کە ئیمکانی هەبێت قەڵەمکوژەکان رابماڵێت. مەرگی سەردەشت عوسمان یەکێکە لە سیمبوڵ و فیگەرەکانی ئازادی ، سەردەشت عوسمان سەربەرزانە ژیا خوازیار بوو کە دوژمنەکانی مەرگێکی تراژیدی پێ ببەخشن ،مەرگی سەردەشت عوسمان پێی وتین پارتی بۆ مانەوەی خوی ئامادەیە خوێنی زیاتر بڕێژێ و جەرگی زیاتری دایکان بسوتێنێت، مەرگی سەردەشت عوسمان پێی وتین دیموکراسی لە ژێر سێبەری هێزێکی فاشیزمی وەکو پارتیدا هیچ نیە جگە لە باڵۆنێکی فوتێکراو کە بە رەخنەی نوسەرێک و وتاری ڕۆژنامەنوسێک و جوڵەی قەڵەمێکی بوێر باڵۆنەکە فش دەبێتەوە ، تیرۆرکردنی سەردەشت عوسمان هەوڵێکی نەزۆکانەی پارتی دیموکراتی کوردستان بوو بۆ دروستکردنی فەزایەکی پڕ لەترس وتۆقاندن لەنێوناخی ڕۆژنامەنوسان و قەڵەمە بوێرەکان تا کەس بوێری ئەوەی نەبێت ڕەخنە لەو بتانە بگرێت کە خێزانە سیاسییەکان دروستیان کردووە و بەرگی قەداسەتیان لەبەر دەکەن . مەرگی سەردەشت عوسمان پێی وتین کە پارتی چ هێزێکی ملهوڕ و دزێوو نامۆیە بە دیموکراسی و ڕووی دزێوی پارتی و سەرۆکی ئێستای حکومەتی هەرێمی کوردستان بۆ هەڵماڵین کە دەستی لە تیرۆرکردنەکەدا هەبووە ، تیرۆرکردنی سەردەشت عوسمان یەکێکە لە تیرۆرە هەرە پلان بۆداڕێژراو و قێزەونەکان کە پارتی لە قەڵەمرەوی خۆیدا ئەنجامیداوە کە هەرگیز ئەم خوێنە ووشک نابێتەوە و لەناو ڕۆژنامەنوساندا ، سەردەشت عوسمان لە وڵاتێکدا شەهیدبوو کە سیستەمی بەریوەبردنی تێدا نییە و دام دەزگاو دادگاو یاساکانیش ئامرازێکن بۆ خزمەتکردنی دەسەڵاتێکی فاشیل کە بست بە بستی کوردستان بە دوای نەوت و گازدا دەگەڕێت و ئازادی و نان و بژیوی لە خەڵک و لە موچەخۆران بڕیووە و نایەکسانی و ناڕوونی لە دابەشنەکردن و سەروەت و سامانی گشتی دا هەیە و یاری بە چارەنوسی هەست و شعوری خەلک و موچەخۆران و هەموو چین و توێژەکانەوە دەکرێت . بە داخەوە دوای 12 ساڵ لە تیرۆرکردنی سەردەشت عوسمان هێشتا قەڵەمکوژەکانی دژ بە ئازادی ئاشکرا ناکرێن و پارتی بە هەموو ئیمکانی سیاسی و ئەمنی خۆیەوە مەترسی زیاتری لە سەر ژیان و کەرامەتی ئینسانەکان دروست کردووە و هەوڵی زیاتر دەدات بۆ لەکەدارکردنی نێوناوبانگ و کەسایەتی قەڵەمە بوێرەکان و گرتن و سزادانیان لە زیندانەکاندا، دروود بۆ ڕۆحی پاکی سەردەشت عوسمان سەربازە زیندووەکەی ئازادی و سەرجەم سەربازە زیندووەکانی تر کە بە زیندووی لە رۆحی ئازادیخوازان و کۆمەڵگادا دەمێننەوە .

سەردەشت و ماری

پەیکار عوسمان:

(شەهیدی قەڵەم)

پێش سەردەشت و دوای سەردەشتیش، تیرۆری قەڵەم هەر هەبووەو هەیە، بەڵام لەو نێوانەدا، ئەوە سەردەشتە کە ئەستێرە جیاوازو درەوشاوەکەیە. جیاوازییەکەش لە قەڵەمەکەدا نیە، لە کەسەکەدایە. یەعنی لەڕاستییدا سەردەشت، ئەگەرچی قەڵەمێکی جوانە، بەڵام شتێکی زۆر عەجیبیشی نەنوسیوەو دەقی مەزنی لێ بەجێ نەماوە، بەڵکو سەردەشت خۆی ڕۆحە مەزنەکەیە کە بە زیندویی بۆمان ماوەتەوە!

نهێنی ئەو زیندوییەش، تەنیا ڕاستگۆییەو هیچی تر. ئەو ڕاستگۆبوو لەگەڵ خۆیداو هەر ئەوەی ئەنوسی کە خۆی ئەیویست، نەکئەوەی بۆ ویستی ئەموئەو بنوسێت. ئەو ئەوەی نەکرد، کە لە سەنگەری حیزب و بنەماڵەو ئایدۆلۆژیایەکەوە، تەقە لە حیزب و بنەماڵەو ئایدۆلۆژیایەكی تر بکاو ئەوەشمان وەکو پاڵەوانێتی پێبفرۆشێتەوەو خۆی و ئێمەش بخاتە ناو درۆیەکەوە! ئەو سەر بە مۆدێلی یەك سەرچاوەیی بوو، کە ویژدانی خۆیەتی، نەك مۆدێلی دوو کونیی، ئەوەی لە کونێکەوە پارەت تێبکەن و لە کونێکەوە جنێو دەرکەیت!

ئەو لە ویژدانی خۆیەوە تەقەی لە پارتی ئەکرد، نەك لە پەنای یەکێتی و گۆڕان و پەکەکەوە.. سەنگەری ویژدانیش سەنگەرێکی بان جوگرافییە، ئیتر ئەو هەولێر جێناهێڵی و هەر لەوێوە قسەی خۆی ئەکات، نەك یارییە باوەکەی فشەپاڵەوانەکان، ئەوەی کە مەحکومە بە دێگەڵەو لە سلێمانییەوە تەقە لە دەسەڵاتی هەولێر ئەکەیت و لە هەولێرەوە تەقە لە دەسەڵاتی سلێمانی ئەکەیت!

لەڕاستییشدا، ئاغا لە کۆیلەی ئەوانیتر ناترسێ، چونکە خۆی کۆیلەدارەو ئەزانێ کۆیلە مرۆڤێکی بۆشە. کۆیلەدار تەنیا لە ئینسانی ئازاد ئەترسێ، بۆیە دواجار، ئەوە ئینسانی ئازادە کە ئەبێتە قوربانی، نەك ئەو کۆیلانەی کە لە ژێر پاڵتۆی ئەمەوە تەقە لەو ئەکەن.

ئەوەی لە سەنگەری ویژدانەوە قسە ئەکات، ئیتر پەیامەکەشی ئەگاتە ویژدان و لەوێدا ئەمێنێتەوە، بۆیە سەردەشت وا ماوەتەوەو هەمیشە تازەیەو کۆن نابێ. ئەوەشی لە سەنگەری لایەنگیریی و عوقدەو گیرفانەوە قسە ئەکات، ئەوە غازاتی ڕۆژانەیەو زوو بەتاڵ ئەبێتەوە، بۆیە دنیایەك شێرو پڵنگ و بوێرو پاڵەوان، کۆن بوون و باویان نەما.

سەنگەری ویژدان، خودی بێ سەنگەرییە، تۆ لێرەدا جەبهەت نیەو بەشێك نیت لە دابەشبوون و جەمسەرگیریی و بەرژەوەندییە جیاوازەکان، بەڵکو تۆ بە سنگی ڕووت و بە تەنیا، ڕووبەڕووی قەدەری خۆت ئەبیتەوە، قەدەری (تەنیایی و قوربانیی) کە ویژدانی خۆت بۆی هەڵبژاردوی بەرامبەر بە دێوی ستەمکاریی، ئەوەش چیرۆکی کورتی هەموو مەسیحەکانە.

“ڕاستگۆیی” بەهێزترین و نەمرترین وزەی ناو گەردوونی نامادییە، هەر ئەوەشە نهێنی پێغەمبەران و مرۆڤە مەزنەکان، ئەوان تەواو ڕاستگۆن لە گواستنەوەی ئەوەدا کە حەقەو لە ئاگایی باڵای خۆیاندا دەرکی ئەکەن، بەبێ گوێدانە ئەوەی لە بەرژەوەندی کێیەو لە بەرژەوەندی کێ نیە.. ئا لەو ڕاستگۆییەوە “نەمریی” لەدایك ئەبێت. سەردەشتیش یەکێکە لە ڕاستگۆترین مرۆڤەکانی ئێمە، بۆیە یەکێکە لە نەمرترینەکانیش.

(شەهیدی شەرەف)

وەکچۆن شەهیدی قەڵەممان زۆرەو سەردەشت ئەستێرەکەیانە، بەهەمان شێوە، شەهیدی شەرەفیشمان زۆرەو (ماری) ئەستێرەکەیانە. ماریی هەر وەکو سەردەشت، ڕاستگۆیانە ئەژی، بوکەڵەو مۆدێلی دەستی فەسادو سەرمایە نیە، خۆ ئەگەر وابووایە دەستی کوشتنی نەئەگەیشتێ و بێ پارەو بێ شوێن سەری نەئەنایەوە. ئەو باڵندەیەكبوو لە هەمانکاتا، قەفەسی کۆمەڵگاو نەریت، قەفەسی دین و ئیسلامی سیاسی، قەفەسی فیمینیزم و ڕێکخراوەکانی ژنان، قەفەسی دەسەڵات و سەرمایە.. هەمووی ئەخاتە ژێر پرسیارو ڕاستگۆیانە تەنیا خۆیەتی و تەنیا خۆشی ئەمێنێتەوە!

چ لە ژیانە تراژیدییەکەیداو چ لە تۆمارە دەنگییە هۆشیارانەکەیداو چ لە گۆرانییە تاقانەکەیدا، ئەو تەنیا مرۆڤێکی ئازادەو لە ویژدان و ئاگایی خۆیەوە ئەدوێ و بە ئاوازی هیچ حیکایەت و جەمسەرێكی فیکری ناخوێنێ. بە نەتیجەش، ئیتر ئەو تەنیا ژنێکی کوژراو نیە، بەڵکو باڵندەیەکی ئازادییەو بەناو خوێنی خۆیدا ئەفڕێ بۆ لای ڕۆحە ئازادەکان.

(ژن و قەڵەم)

خاڵی هاوبەشی ژن و قەڵەم، ئەوەیە کە هەردوکیان نوێنەرایەتی کەیسی عەدالەت و ئازادی ئەکەن. قەڵەم لەوێدا ئەکوژرێ، کە باری عەدالەت و ئازادی هەڵئەگرێ و خەمی گشتی لە خۆی بارئەکات. ژنیش لەوێدا ئەکوژرێ، کە باری ستەم و ناعەدالەتی و نائازادیی لێ بارکراوە!

ژنکوشتن و قەڵەم کوشتن، لە هەمان جەهالەت و ستەمکارییەوە دێن، کوشتنی سەردەشت چەنێك سیاسییە، ئەونەش کۆمەڵایەتی و نەریتییەو ئەچێتەوە لای پرسی شەرەف. کوشتنی ماریی چەنێك نەریتی و کۆمەڵایەتییە، ئەونەش سیاسییەو لە قووڵاییدا هەر مەسەلەی ئازادی و عەدالەتە!

کۆمەڵگا چەنێك ئازادی ژن و فکری تێدابێت، هەر ئەونەش عەدالەتی تێدایەو چەنێکیش عەدالەتی نێوان ئینسانەکان و نێوان ئەفکارەکانی تێدابێت، هەر ئەونەش ئازادی تێدایە. کاتێ یەکێ لە جیاوازەکان زاڵ ئەبێ، ئەمە تەنیا ناعەدالەتی نیە، بەڵکو جەبر و نائازادیشە.

(عەدالەت و ئازادی)

ئەو دووانە هەر یەکێکن و دوو ڕووی ژیانێکی تەندروستن، بوونی هەریەکێکیان دنیایەك بۆ ئەویتریان ئەخولقێنی، نەبوونی هەریەکێکیشیان دنیای ئەویتریان خاپوور ئەکات. جەهالەت و ستەمکارییش هەر یەکێکن، لەوێدا کە “جیاکاریی” لە نێوان مرۆڤەکاندا دروستئەکەن، جیاکاری ڕەگەزی و نەژادی و مەزهەبی و سیاسی.. بوونی جیاکارییش دۆخی ناعەدالەتیی دروستئەکاو جێگیربوونی دۆخەکەش، ناچاریی و نائازادی لێئەکەوێتەوە.

ستەمکاریی عەدالەتێکە کە ئازادی نافامێ و ئازادییەکە کە عەدالەت نافامێ، جەهلیش ئەوەیە کە هیچیان نافامێ. ئێمە ئەگەر لە ئازادییەکی عادلانەو عەدالەتێکی ئازادانەوە دەست پێ نەکەین، لەوسەرەوە هەر ئەگەینەوە ستەمکاریی، چونکە لەمسەرەوە هەر لە ستەمکارییەوە دەستمان پێکردوە!

ئەوە یاریکردن بە وشە نیە، بەڵکو کێشەکەی مرۆڤە هەر لە سەرەتاوە. ئێمە ئەبێ بچینەوە بۆ سەرەتایەکی یەکسان و یارییەکە لەوێوە دەستپێبکەینەوە، ئەگەر خاڵێکی هاوبەش نەبێ کە هەموومان تێیدا یەکسان بین، ئیتر تا کۆتایی شتەکە بە ناڕێکیی ئەڕوا. هەر لە سەرەتاوە کە بڕیار وابوو ژن و پیاو نایەکسان بن، ئیتر ئەمە ستەمێکەو تا کۆتایی ئەڕوات، چونکە عەدالەت و ئازادی نایەنە ناو ستەمەوە!

(شەهیدی دووانەیی)

کەیسەکانی عەدالەت، لەهەمانکاتا کەیسی ئازادییشن و بەپێچەوانەشەوە. کاوە باسی گەندەڵی ئەکاو لە عەدالەتەوە تێهەڵئەچێ، بەڵام لەوسەرەوە نائازادیی و نەبوونی فەزایەك بۆ وتنی ڕاستیی ئەیکوژێ. سەردەشت و ماری، قوربانییەکانی ئازادیین، بەڵام ناعەدالەتی و ستەمکارییەکانی دەسەڵات و کۆمەڵگا ئەیانکوژێ. شەهیدەکانی ئازادی، لە هەمانکاتا شەهیدی عەدالەتیشن، شەهیدەکانی عەدالەت لە هەمانکاتا شەهیدی ئازادیشن، هەردوکیشی هەر بە دەستی جەهل و ستەمکاریی ئەکوژرێن. ستەمکاریی هەر ئەوەیە کە سەرەتایەکی نایەکسان هەبێ، جەهل هەر ئەوەیە ئەو نایەکسانییەت لێببی بە حاڵەتە ئاساییەکەو پیرۆزیشی بکەیت!

(ئیمان و دیموکراسی)

دیموکراسی دەنگەدەنگی هەڵبژاردن و شەڕەشەقی کەمینەو زۆرینە نیە، بەڵکو پێش ئەوە، دەستپێکردنی یارییەکەیە لە سەرەتایەکی یەکسانەوە. هەڵبژاردن فڕێ بە دیموکراسییەوە نیە، لەوێدا کە یارییەکە دەستی پێکردوەو ژن و پیاو نایەکسانن، دیندارو بێ دین نایەکسانن، موسوڵمان و یەزیدی نایەکسانن، دوو زلحیزبەکە لەگەڵ ئەوانیتر نایەکسانن.. دیموکراسی لەوێوە دەست پێئەکا، کە نایەکسانییەکانی سەرەتا ڕێك بکرێتەوەو هەمووان لە یەکەوە ماراسۆنەکە دەستپێبکەین، نەكئەوەی من لە یەك و تۆ لە پانزەوە، ئیتر شکڵیاتی دیموکراسیش، ببێتە پەردەی داپۆشینی ئەو نایەکسانی و نادیموکراسیەتە!

ڕەهەندێکی ئیمانیش هەر باوەڕبوونە بەو سەرەتا یەکسانە، چونکە ئەگەر بەوە کافربیت، ئیتر کفری تری بەدوادا دێ و تەواوی شتەکان ئەکەونە ناو ستەم و نایەکسانییەوە. تۆ کافریت ئەگەر پێتوابێ پیاو فەرقی هەیە لەگەڵ ژن، یان موسوڵمان فەرقی هەیە لەگەڵ ناموسڵمان، یان زمانی عەرەبی فەرقی هەیە لەگەڵ زمانی تر.. چونکە ئەوە ستەم و سەرەتایەکی نایەکسانەو ستەمیش لە خوداوە نیە. ئیمان یەکسانییەکە کە جیاوازیی تیایدا تەنیا بە تەقوایەو تەقواش هەر ئەوەیە کە ستەم نیە، نەكئەوەی تەقواکە شتانێکی شکڵی و دەرەکیی بێت و لەناوەوە لەسەر ستەم و جیاکاریی و نایەکسانیی دامەزرابێ!

(کوردو شەهید)

لەوێدا کە دوژمن ئەمانکوژێ شەهیدین، بەڵام لەوێدا کە حیزب بەکوشتمان ئەدا، تڕی بنگۆمین. کورد ئەبێ تێبگا، حیزب داگیرکەری پێنجەمی وڵاتی ئێمەیە. کورد ئەبێ تێبگا، شۆڕش بکوژی دووەمی ئینسانی ئێمەیە. کورد ئەگەر دە گومانی هەبێت، ئەبێ یەکێکی لە دوژمن و نۆی لە خۆمان بێت. کورد ئەبێ تێبگا، ئازادی ئێمە، ناکەوێتە ناو وهم و مژدەو یۆتۆپیاکانی حیزب و ئایدۆلۆژیاوە، بەڵکو ئەکەوێتە ناو ئینسانێکی ئازادەوە، کە چاوی حەقی کراوەیەو ڕق و لایەنگیری کوێری نەکردوە.

کورد ئەبێ تێبگا، وەکچۆن دوژمن لەکوێ بێت ئەوێ داگیرکراوە، چەکداری خۆشمان لەکوێ بێت ئەوێ داگیرکراوە. کورد ئەبێ تێبگا، ئینسان لای حیزب، وەکو سەر مەڕ وایەو تەنیا ژمارەیە، نرخی ژیانی ئێمە لای حیزب، تەنیا پۆستەرێکە، کە جاران بۆی ئەداین لە دیوارو ئێستا بۆمان ئەدا لە فەیسبوك.

کورد ئەبێ بزانێت، شەڕو یاریی هیچکام لە حیزبەکان، شەڕو یاریی ئێمە نیە، شەڕو یاریی ئێمە، هەر ئەوەیە کە بە چاك بڵیین چاك و بە خراپ بڵێین خراپ، نەکئەوەی بە چاكوخراپ کۆیلەو مێگەلی حیزب بین. کورد ئەبێ تێبگا، ئەو شەهیدەی ئیسلامییەکان ئەڵێن هی خوایە، درۆئەکەن هی حیزبە، ئەو شەهیدەی کە شۆڕشگێڕەکان ئەڵێن هی نەتەوەو نیشتمانە، درۆ ئەکەن هی حیزبە. کورد ئەبێ تێبگات (حیزب و شۆڕش و شەهید) گەورەترین درۆی ناو دنیای ئێمەن.

ئێمە بەس خاکمان داگیر نەکراوە بەڵکو ئینسانیشمان داگیرکراوە. ئینسانی کورد، ئەبێ ئازادببێ لەو کەسایەتی و سایکۆلۆژیایەی کە دوژمن بۆی دروستکردوە، هەروەها ئەبێ ئازادیشببێ لەو کەسایەتی و سایکۆلۆژیایەی، کە سەرکردەو ئایدۆلۆژیاو حیزب و شۆڕش بۆی دروستکردوە. ئینسانی کورد، ئەبێ کەسایەتی خۆی بینابکاتەوە لەسەر ئەساسی توانای ڕەخنە گرتن، (ڕەخنە لە حیزب و ئایدۆلۆژیاکەی خۆت، نەك لەوەی ئەو). ڕەخنەی یەکەمیان ئەبێتە عەقڵانیەت و ئینسان و کۆمەڵگا دروستئەکاتەوە، ڕەخنەی دووەمیان ئەبێتەوە بە شەڕو چەلەحانێ و خراپتری ئەکات. ئینسانی کورد پێویستی بە بەخۆداچوونەوەیە نەك بە ئەودا ڕشانەوە. تەواوی حیزب و ئاراستەکانیش خەریکی بەرهەمهێنانی ئەم ئینسانەی دووەمیانن، بۆیە ئەبێ خۆمان لەوان وەرگرینەوەو ئینسانی یەکەم دروستبکەین.

تاریکی عەرش

پشکۆ ناکام:

یەن و بۆنی دەمت ئەکەن
نە بادا ووتبێتت: خۆشم ئەوێیت
یەن و دڵت ئەگەڕێن
نە بادا بڵێسەی عەشقی تیا  شارابێتەوە     
” احمد شاملو “

……. كاتێک “سەردەشت عوسمان ” چوو بۆ زانکۆ ، دونیای لەبەر  چاوا گەورە و جوانتر بوو ، لە گەڵیشیا خەون و ئارەزوەکانی قوڵ و بەر فراواتر بوو کە وای لێکرد سەرگوزەشتەی خەیاڵ و ئەندێشەی بە نووسین داڕێژێت… لای ئەو ئازادی بیر کردنەوە سنووری نیە و گەر تەنها بە خەیاڵیش بێ ئەتوانێ بە فڵچەی فانتازیا تابلۆیەک بۆ ئینسان و ئەندێشە دروست بکا…
( لە سەردەمێکا ئەژین هەموو شتێک لە ئینسان گرانترە…….داریوش ئیقبالی…)
سەردەشت پێ ی وابوو ئەوەی لە ئەندێشەی ئینسانا ئەگوزورێ گەر وەکو واقیع نەیەتە دی خۆ ئەتوانێ تەرجەمەی کاتە سەر چەن دێڕێک ، کە ئینسان خاوەنی مێشک بێ ئەشبێ دەربببڕێ و لای هەر کەسێک بە شێوەی جیاواز ، دەنا ئەو هەموو بیرکردنەوانە  بێ دەربڕین مێشک دووچاری جەنجاڵیەک ئەبێ کە عاقیبەتەکەی خێر نابێ….بەڵام ئەو دوور بوو لەوەی بزانێ لە شارەکەی ئەو هەوای زانکۆش لەژێر چاودێریایە و بۆ قامچی بەدەستەکان زانکۆ و ماڵ و ژن و پیاو و زیندان هیچ جیاوازییەکی نیە ، بۆ بیرکردنەوە و خەیاڵ بەسەربردنیش ئەبێ مۆڵەتی دەسەڵاتدارە مێشک بەتاڵەکان  وەربگریت بەو مەرج و داڕشتنانەی بۆ خاوەن مێشک چالاکەکان دانراوە ، بەڵام خۆشەویستی سەردەشت بۆ ئازدی بیرکرنەوە و خستنە قاڵبی نووسینێکەوە نەیهێشت درک بە مەترسی هەنگاوەکانی بکا و زەردەخەنەی خۆی تێکەڵ بە ڕستەکان کرد ، سەردەشت بە پەیژەی خەیاڵا سەرکەوت تا گەشتە عەرشی سەرۆک و داوای کچەکەی کرد ، نەیزانی لە عەرشەیا خاوەنی ئەو جۆرە بیرکردنەوانە ئەبێ گل بکرێنەوە و تەختی ئەرز بکرێن..!!  ئەو تەنیا لە خەیاڵی خۆی و بە دڵنیابوون لە مافی خۆی بۆ خەیاڵ پەیژەکەی دروست کرد و دژە ئینسانەکانی عەرشيش بە واقیع ..بە کردەوە  نەک بە خەیاڵ سزای سنوور بەزاننیان پێ گەیان و تێرۆریان کرد ، ئەمەش جیاوزی نێوان خەیاڵی ئازادی خواز و تۆڵەی ئەهلی عەرش و دەسەڵاتە ، سەردەشتی بە هەڵپە بۆ دەربڕینی خەیاڵەکانی هەرگیز لە بیری ئەوەیا نەبوو  باجی سەرکێشییەکەی و گەشتنە عەرش خوێنی خۆی ئەبێ و پەیژەکەش  سوور دائەگەڕێ…لەو نیشتمانەی پێ ی ئەووترێ ” خاکی کورد”..!!! ئینسانەکان ئەبێ لە کاڵا و شت و مەکی بازاڕ باجی زۆرتریان  لەسەر بێ ، باجی نووسین..باجی بیرکرنەوە،،باجی خەو بینین..باجی لەسەر پێ ی خۆت وەستان..باجی چرپە چرپ..باجی خوێننەوەی ڕۆژنامە قەدەغەکراوەوکان ..هتد..لە هەمووشی قورستر باجی خەیاڵ کردنەوە لە گەیشتن بە عەرشی سولطان..
گەرچی جەللادەکانی عەرش سەردەشتیان تێرۆر کرد بەڵام چونکە لە  ناخا ئەوەنە لاواز و ترسنۆکن، زاتی ئەوەیان نەکرد  لە شارەکەی خۆی سەردەشت بکوژن ، دوای ڕفانی
 لە شوێنێکی دەیان کيلۆمەتر دوور لە زانکۆوە فەرمانی عەرشیان بە جێ گەیان و وەک ئەوترێت” پیاوکوژ لە سێبەری خۆشی ئەترسێت ” ئەوانیش هەموو هەولێریان لێ بوو بوە سێبەر ، سێبەری ترس و عەرش و خوێن و دەم کوت کردن بەرامبەر بە ڕووناکی….. ، ڕووناکی ئازادی ئینسان ، ڕووناکی بیرکردنەوە و نووسین و دەربڕین …، ڕووناکی ئەقڵ بەرامبەر بە مێشکی ووشک  هەڵگەڕاو …. ڕووناکی سەردەشت بەرامبەر بە تاریکی عەرش………

سەردەشت قوربانییەكی هەمیشە زیندوو

دانا رەشید:

ئەوەی ئەم قوربانیە لە قوربانیەکانی تر جیا دەکاتەوە ، رەنگە بە درێژایی مێژو لە باشوری کوردستان ، هیچ قۆناغێک هێندەی ئەم قۆناغەی ،بە حساب حوکم و دەسەڵاتی خۆماڵی کوردە ، وا زیاتر لە چارەکە سەدەیەکە تێدەپەرێ ، ناشرین و بەدناوو پڕ مەرگەسات نەبووبێ ، رەنگە بە دەیان و سەدان هەزار بوبێتن بە ژێر دەستوپێی ئەم دەسەڵاتە بێ ماناو بێ تەعریف و بێ مەعریفەتەوە ، ئەمما تیرۆر کردنی گەنجێکی خوێنداکاری زانکۆ ، بەو شێوە هەتا بڵێی خێڵەکی و دڕندانەیە ، لەسەر نوسینی پەخشانێک ، کە زادەی خەیاڵی گەنجێکی خێرلەخۆ نەدیو بوو ، مرۆڤ بە سروشتی خۆی کە تاوانێک ڕودەدات ، ماوەیەک پێوەی گینگڵ دەخواو بیری لێ دەکاتەوە ، ئەمما تاوان لە ژێر حوکمی دەسەڵاتی کوردا ، لە باشوری کوردستان هێندە زۆر بوە ،تا ڕادەیەکی زۆر خەڵک لەگەڵیدا ڕاهاتون ، دروست وەک سەردەمی جەنگی ئێران و عێراق ، رژێمی صدام هەر ساتە ناساتێ لە سەر شاشەی تەلەفیزۆنەوە ، بەشێک لە وێنەی کوشتو کوشتاری مەیدانی جەنگی پیشان و خەڵک دەدا ، تا دیمەنی قێزەونی کوشتارو خوێنرێژی ،لەبەرچاوی منداڵ گەورەو پچوک ئاسایی بکات ، ئەم دەسەڵاتە گەندەڵەی باشوریش ، هێندە تاوان و قەیرانی لەو میلەتە بار کردوە ،هێندە ئەو میلەتەی بێ ئومێد کردوە ،کە کوشتن و تاوانی لا کردوە بە بابەتێکی رۆژانەی ئاسایی ، دەنا لە حزوری میلەتێکی بە رومەت ، ڕودانی هەر تاوانێکی شایەنی ئەوەیە ئاسمان بە زەمینەوە بچەسپێ، بەش بەحاڵی خۆم کاتێ زاراوەی دیمۆکراتیئ دەبیستم ، هەر لە خۆمەوە شەرم دەکەم ، کە ناوی سۆسیال دیمۆکراتی دێتە بەرگوێم ، عارەقەی رەش و شین دەردەدەم ، ئاخر بیهێنەرە بەرچاوی خۆت پارتێک ناوی دیمۆکراتی بێت ، هەر رۆژە کوروکاڵێکی بنەماڵە پیشانی خەڵک بدات و مزگێنی بدات کە سەرۆکی دوارۆژتانە ، واتە بێ نرخ کردنی هەم سیاسەت هەم دیمۆکراتی هەم تاکی کورد تا دوائەندازەی بێ نرخکردن ، واتە بە تێکرا میلەت کردن بە شعب الغلابە ، وەک مصریەکان دەیان وت ، واتە بێ ئەرزش کردنی دامودەزگاکانی حکومەت تا دوا پلە ، واتە پیشاندانی دەسەڵاتێکی بێ ئەندازە بێ مۆراڵ ، میلەتێکی بێ ئەندازە بێ دەنگ کراو ، ئەوەی سەردەشت لە قوربانیەکانی تر جیا دەکاتەوە ئەوەیە ، کە ئەم دوو جار کرا بە قوربانی ، ئەم پێشبینی ئەوەی کردبوو ،کە دەسەڵات دیمۆکرات خێڵەکیەکە خوێن بە دەماری پیاوەتیاندا هوروژم دەکات ، ناوگەڵی خێڵیان دەسوتێتەوە ، خێڵە هەزار پیاویەکە کەوتنە ئیزارەوە ، تا شەرفی خێڵ بکرنەوە ، ئاخر چۆن دەبێ هەڵەی وا بکات مسکێن خەون ببینێ ، چۆن دەبێ رەعیەت بە خەونیش تەمەنا بکات ، بگات بە مەقامی سەرۆکایەتی و بەرپرسیارێتی هەرێم ، نەخوازەڵا ببێت بە زاوای سەرۆک خێڵ ، ئای لەم کفرە ، هەمو کوردو کوردستان و ئەزمونەکەمان و دوارۆژی میلەت و مێژو و موقەدەسات هەیە کەوتە خەتەرێکی جدیەوە ، ئەمە لەکەدار کردنی شەرەفی بنەماڵەی خێڵە ، بۆیە سەردەشتیان بە تیرۆرست لە قەڵەم داو دوو جار تیرۆریان کرد ، بەڵێ ئەوەی سەردەشتی مەزن لە قوربانیەکانی تر جیا دەکاتەوە ، کە لە پاش خۆی ، نامەیەکی جێهێشت لەگەڵ کۆلێ خەندەو پێکەنیدا ، کە هیچی کەمتر نی یە لەو نامە مێژویانەی کە ٤ ئەفسەرەکە لە کاتی ئیعدامدا جێیان هێشت و دەڵێن شوێن جەهالەت مەکەون ، کە هیچی کەمتر نی یە لە نامەو خەندەی کۆتایی جیگیڤارای مەزن ، سەردەشت بە عەشقەوە بەرەو پیری مەرگ رۆی ، وتی ، با هاورێکەم خاڵێک بۆ من دابنێ و ئەو دەست پێ بکاتەوە ، ئەمەیە خاڵی جیاکەرەوەی ئەم لە قوربانیەکانی تر ، واتە مەرگ لە پێناوی بەردەوامیدا ، بۆیە هەمیشە سەردەشت دەژی و بە خەندەو پێکەنینەوە ، بەردەوامی هەیە تا خاڵی کۆتایی بۆ بکوژانی دادەنرێت.

بەڤیدیۆ:مەراسیمی رێزگرتن لە سەردەشت عوسمان لە شاری سیدنی ئوسترالیا

 

سەردەشت ماوە

“رۆژێک دێت خاڵێک لەسەر هەموو رستە شێواوەکان دابنێین”

لەساڵیادی شەهیدی قەڵەم
سەردەشت عوسمان

نەجات ئەحمەد-ھەولێر
کاتێک لە دیوارە بلۆکەکەی شورەی کۆڕەکەی شەهیدی قەڵەم سەردەشت عوسمان نزیک دەبیتەوە و لەدوورەوە دەرگا ژنگاویەکەی لایەکی ئارامگەکەی هێندە بەهێمنی داخراوە دڵت خورپە دەکات.
هەرکە دەست بۆ شیشی دەرگاکە دەبیت ئەودەرگایە هێندە ئاسان دەکرێتەوە و دەکەوێتە سەر پشت وەک بڵێ گۆرەکەی فەرمووت لێ بکات و لەدوورەوە هەست بە باڵای پلکە سێوی دەکەی کە وەک دارێکی بەرز بەرز سێبەرەکەی هەموو حەوشەکەی داگیر کردووە و لەملاشەوە سەردەشتیش زۆر بەهێمنی لێی راکشاوەو چاوی بڕیووەتە فرمێسکەکانی دایکی.
لەگەڵ هەنگاوەکانت بۆ سەر گۆڕەکەی هەست بە بۆن سۆی چەرگە سووتاوەکەی پلکە سێوەێی رەش پۆش دەکەی کە کۆڵمەکانی سور بوونەتەوە و لەگەڵ هەرچاو هەڵهێنانێکی رووبارێک فرمێسک بەسەر کۆڵمە سورەکانی دێنەخوارێ کەم ویژدانی زیندووه هەیە خۆی بۆ بگیرێت و کزوو مات لەتەک گۆڕەکەی دانەنیشێت و دەست لەچۆکی وەرنەنێ و بەدیاریەوە هەناسەیەکی قوڵ هەڵنەکێشێ.
کاتێ سەیری وێنەکەی سەردەشت دەکەی لە پارچە شکاوەکانی دەوروبەری گوڕەکەی دەڕوانی زۆرباش لەوە دەگەی کە ئەوە ئارامگەیەکی سارد وسڕ نیە، ئەوە گوڕێکە دەسەڵاتە بە مردوویشی لێ بۆتە مۆتەکە، زۆر باشیش هەست بەوە دەکەی ئەو هەزار وسەدوو پەنجاو دوو ووشەیەی نێو دوو ووتارەکەی چەندە کاریگەر بووە تا ئاوا دەستیان بچێتە گیانی گەنجێکی قۆناغی چواری زانکۆ کە تازە خەریکە بەدوای ئاواتەکانی دەکەوێ تا وەک هەر مرۆڤێکی ئاسایی پێیان بگات، کەچی واعیزەکانی ئەو دەسەڵاتە پێی رەوا نابینین دەبنە داردەستەی ئەوانەی پلانی شکاندنی نووکی قەڵەمەکەی دەدەن.
ھەموو سالێک لەنێو حەوشەی ئارامگەکەیدا ئازادی خوازان و قەڵەمبەدەستانی سێبەری ئازادی دێن بۆ ئەوەی تۆزێک لە حەسرەتەکانی پلکە سێوەی و ھەناسە ساردەکانی مام عوسمان کەمبکەنەوە بە چرپەوە بە گوێی ئارامگەکەیدا بچرپێنن کە ئێستا لەدوای خاڵەکەی داتناوە سەدان رستەی تازە لەدایک بوونە و ھەر یەکەیون بوونەتە شاخێک بەروی شەمشەمەکوێرەکانی دژ بە ئازادی قەلەمەکان و ئێستا رووبارێک ھەڵقوڵاوە بەرووی ئەو دەسەلاتە فاسید و فاشیلەی دژ بە ئازادی ئەمجارە بەکەس دانامرکێتەوە.
کاتێکیش ئاوڕێک لە مام عوسمانی باوکی سەردەشت دەدەیتەوە هەمیشە دەستێکی بە گۆچانەکەی گرتووە دەسەکەی دیکەی بە ریشە پیەکەیدا دێنیت و جار جارێکیش ئاو لەو سێبەرە دەداتەوە کە پلکە سێوی بۆ قەڵەمەکەی سەردەشتی کردووە بەو پەڕە سپیەیی کە هەمووان بتوانن تێدا بینەخشیێنن، مام عوسمانیش هەمیشە لەبەرە خۆی دەڵێت خودا هەڵیناگرێت و تۆڵەم لەو دونیا دەوێتەوە، ئەوکات زۆر باش لەوە دەگەی چەرگ سووتان هێندە ئاسان نیە چۆن ئاوا پشتت دەچەمێنێتەوە و دەستەکانت دەڵەرزێنت.
ئارامگەی سەردەشت لەگەڵ دارکانی دەورەبەری و باڵای پلکە سێوی وگۆچانەکەی مام عوسمان هێدە باڵای کردووە و بەیانینان لە گوندی گردعازەبانەوە چاوی بەرۆژە نوێیەکانی چاوەروانی هەڵدێنی کە لەقەڵاوە دەروانێتە گۆڕەکەی و ئێوارانیش لەگەڵ هەڵکێشانێکی هەناسەیەکی ساردی پڕ لەسۆ چاوەکانی دەچێتەوە هەمان ئەو سەرخەوەی کە بەنیاز بوو لەپاڵ قەڵەمە بوێرەکەی بەنیاز بوو وەک ئاگرێک بە باڵای زووڵم و ستەمدا بچتەوە و هەمیشە چاویشی بڕیووەتە سەری ئەو دێرەی کاتێ خاڵەکەی لەکۆتایی داناو هەزاران قەڵەمی دیکە لەدێرێکی تازەوە بە دەنگێکی بەرز سروودی ئازادی بۆ نیشتیمان دەڵێنەوە.
منیش دەڵێم قەڵەمە بوێرەکەی هەولێر ئارام بنوو دڵیابە رۆژێک دێت دوا خاڵ لەسەر هەموو ئەو رستە شێواوانە دابنێن.

Anniversary of Kurdish journalist murder sends out alarming truth about silencing of dissent in Iraqi Kurdistan

لەم لینکەدا تەواوی راپۆرتەکە ببینە:
https://www.saferworldforthetruth.com/updates/sardasht-osman?fbclid=IwAR3f-Ek2d6sf4Y5BNqZ8fPYtBJmK8TIAdJKNmNB_KKoa6P0ko0n5ygtTI0I

Read More »

‎سەردەشت عوسمان، سمبولی ئازادی لە فەرهەنگی مێژووی کورددا

ئاری جەمال:

‎لە مانگی دوازدەی ساڵی 1993 کۆمەڵەی گشتی نەتەوە یەکگرتووەکان بە بڕیاری ژمارە 48/432 ، ڕۆژی 3 ی مانگی پـێنجی وەک ڕۆژێکی جیهانی بۆ ئازادی ڕۆژنامەگەری پەسەندکرد. لەگەڵ ئەم یادە، لە 5 ی هەمان مانگ لە ساڵ یادێکی تراژیدیادا، ڕۆژی تیرۆرکردنی قەڵەمێکی ئازاد و دەنگێکی دلێر کە سنووری عەقڵە دۆگماکان و داپڵۆسکارە ڕزیوەکەی دەسەڵاتی بڕیبوو، ئەو خامە سپیەی بە ئازادانە لە دژی حوکمی ستەمکارانەی دەسەڵاتێکی خێڵەکی وەستایەوە، ئەو ئازادیخواز و سمبولی ئازادیەی ڕۆژنامەنووس ( سەردەشت عوسمان)ە، ئەو بە قەڵەمە بڵندەکەی بانگی شکاندنی بتەکانی دەدا و بە دەنگی بەرز هاواری بۆ ئازادی دەکرد، ئەو تەنها بە نوکی قەڵەمێک بەرەنگاری چەتەکان دەبۆیەوە و مافیاکانی دەسەڵاتی وشە باران دەکرد، ئەو شەهیدە جوانە مەرگەی کە دەستی جەلادەکان نەیانهێشت بەهاری تەمەنی پڕبکات لە خەیاڵی ئازادییەکانی، ئەو ئایکۆنێک لە توخمی جوامێرییە، تاکوو ئەمڕۆ لەهەر شوێنێک باسی ئازادی ڕۆژنامەگەری و هەڵوێست و جوامێری بکرێت، ناکرێ ناوی ئازادیخوازان، سەردەشت عوسمان و سۆران و کاوە و وەدات نەهێنرێت، بەڵام خەیاڵی پوچیانبوو لە بری سەردەشتەکان سەدان سەردەشت لەدایک دەبێت، بۆ ئەو حوکمە چینایەتیەی هەرێمی کوردستان، کە تەمەنی کورتیان لە مێژووی ڕەشیان بە ڕوونی درکی پێدەکرێت، هەمیشە دەسەڵاتی کوردی دروشمی پیرۆزی ئازادی ڕۆژنامەنوسی بەکاردەهێنێ بۆ درێژەدان بە زیادکردنی مێژووی ڕەشیان و ماکیاژ کردنی ڕووی ناشرینیان،
‎ئەو عەقڵە خێڵەکی و چینایەتیەی کە خۆیان لە سەروو یاسا دەبینن، حزب جێی حکومەتی گرتووە و حزب هێزی چەکدار و دەسەڵاتی پارە و دەزگای ئاسایش و هەواڵگری و میدیا و ڕۆژنامەوانی کۆنترۆڵ کردبێ، ئەبێ چ ناوێکی لێبنرێت, کە دیکتاتۆر شایستەیە بۆ وەسفی ئەم جۆرە حکومڕانیە،
‎ئەمڕۆ کە 12 ساڵ تێدەپەڕێ بەسەر شەهید سەردەشت، لەسایەی دەسەڵاتی کوردیدا و لەپەنای پەرلەمان و دادگاو قەڵاو کونسوڵخانەی وڵاتانی بیانیدا لەبەردەم کۆلێژەکەیدا ڕفێنراو پاشان تیرۆرکرا، کە تا ئەمڕۆش
‎ئازادی ڕۆژنامەوانی لەهەرێمی کوردستان تەنها دروشم و درۆیەکە لەلایەن دەسەڵاتدارانەوە دەکرێت و خەڵکی پێ لە خشتە دەبەن، بۆ داپۆشینی مێژووە پڕ لە شەرمەزارییەکانیان کە تاکوو ئەم ئێستایەش دەسەڵات، ڕۆژنامە و میدیاکان بەکاردەهێنێ بۆ خوێندنەوەی مانشێتە هیچەکانیان بە ئامانجی سڕینەوەی ئەو وێنە ناشرین و مێژووە پڕ شەرمەزاریەیان بەرامبەر ڕۆژنامەوانان و تاک بە تاکی خەڵکی خێر لە خۆی نەدیوەی ئەم گەلەمان دەکرێ، تا ئێستاش حکومەتی خۆسەپێن بە ناوی ئازادیەوە بەندینخانەکانی پڕن لە ڕۆژنامەنوس و چالاکەوان و ئازادیخوازان، ئەگەر ئازادی هەیە بۆ تاکوو ئێستاش سەردەشتەکان تیرۆردەکرێن و دەگیرێن، بۆ تا ئێستاش بکوژان داڵدە دەدەن،
‎دوای 12 ساڵ لە تیرۆرکردنی سەردەشتدا، هێشتا جەلاد و مافیاکانی سەر بە دەسەڵات، لە دیوەخانەکانیان بە ئازادی دەسوڕێنەوە و بەردەوامن لە ستەم و خۆسەپێنیان,
‎هەموو کوردێک ئەو ڕاستیە دەزانن ئەوەی حکومڕانی دەکات دوو بنەماڵەی خۆسەپێن و مافیان، دوو گروپی گەندەڵ و دز و چەتەن، کە بە ناوی سیاسەت و لە سێبەری حکومەتەوە بەردەوامی ئەدەنە عەقڵێتە خێڵەکیەکەیان، لە ڕێگەی حزبەکانیان بە زەبری چەک و هێز کۆنتڕۆڵی دەسەڵاتیان کردووە، لە ڕێگەی میلشیاکانەوە خۆیان فەرزکردوە بەسەر کۆمەڵگاوە، کە تاکوو ئێستاش دەیانەوێ ئەو دەنگە ئازادیخوازانە لە ناو کوچە و سوچی کوردستاندا کپ بکەن، خۆفەرز کردنەی دەسەڵاتی چەتەیی سەلمێنەری ئەو دۆسیە و کەیسانەی گیراوانی بادینانە، کە چنینەوەی ئەو مافیایەتیەی دەسەڵاتە بە نێوچەوانی حزب و هەڵوێستە دیکتاتۆریەت و ئەو خێڵەکیەی بەردەوامن لەسەری، لافی ئازادی لێدەدەن و پاساوی ڕەفتارەکانیان بە درۆی شاخدار هەڵدەکەن بۆ تیرۆرکردن و گرتنی دەنگی ئازاد و ئازادیخوازان، بەڵام خەیاڵ پڵاوی عەقڵێتە کۆنەپەرست و خێڵەکیەکەیان ناتوانن ڕەنجی سەردەشتەکان بە با بدەن، بە گرتن و تیرۆرکردنی هەر دەنگ و ڕەنگێک کاروانی ڕێی ئەم خەباتە فراوانتر و بڵندتر دەبێت، سوورتر دەبین و پێداگیرتر دەوەستین بەرامبەر ستەمکاری دەسەڵات تاکوو بەرهەمهێنانی خەباتی ڕێگای سەردەشت و دەنگەکانیان، تاکوو ئازادی دادگا و یاسای کوردستان، کە خەڵک و هەموو توێژێک شایەنی ئەو دەسەڵاتە مافیاگەری و خۆسەپێنەیان نییە،
‎دەسەڵاتی ماوە بەسەرچوو، لە ڕێگەی میدیا و گۆڤار و ڕۆژنامەکانەوە، ئاڕاستەی ڕای جەماوەر و بە لا ڕێدا بردن و بانگەشەی ئەو بابەتانەی کە دوور لەو دۆخەی خەڵکی تیادا ئەژین، کە ئامانجی سەرەکیان شۆردنەوەی مێشکی جەماوەرە، فۆڕمێکی پێ ئەدەن کە سەر و بنی زاری خەڵک ئامانجەکەی خۆیانبێت، خەڵکی لە بابەتە گرنگەکان دوور دەخەنەوە، دەرخواردی بابەتە پوچەکانی دەسەڵاتی خۆسەپێنی خۆیانمان دەکەن، کە بیری ئازادی تەسک دەکەنەوە، هەوڵی بازنەیەک ئەدەن بۆ چەق بەستووی و دۆگمای کردنی بیرکردنەوەی تاک و کۆمەڵگا، هەروەها خۆبەدەستەوەدان و هەڵکردنی ئاڵای سپی لەبەردەم دەسەڵات،
‎ بۆیە (سەردەشت عوسمان) و هاودەنگە ئازاد و ئازاکانی ئەو ڕێگایەی گرتویەبەر، لای دەسەڵات هێڵی سوربوو، بەڵام نەیدەتوانی بێدەنگی هەڵبژێرێ و ئاڵای سپی هەڵبکات لەبەرامبەر کارە مافیاگەری و دیاردە نامۆ و نەشیاوەکانی دەسەڵات، ئەمەشبوو وایکرد (ئازادی ڕادەربڕین) وشە تیژەکانیبێت بۆ چاوی ستەمکار، ئامادە نەبووە مل بۆ هەڕەشەکانی دەسەڵات بدات و بەردەوام بووە لە ڕێچکە حەقبێژییەکەی خۆی، ئەو بیرکردنەوە ڕاستەکانی ژیانی فێری دەسەڵات دەکرد و ئامانجی گۆڕینی ژیانی تاک و کۆمەڵگا و بیری ژیانێکی باشتری دەکردەوە بۆ گەلەکەی، لە دوای شەهید بوون، وشەکانی بوونەتە پشکۆ بۆ گەشکردنەوەی بەرەنگاری ستەم، بوەتە ڕێچکەیەک کە هەرگیز ڕێبواری ڕێگای وون نابێت، بۆ هەمیشە ناوی بە بەرزی لە پەڕە زێڕینەکانی مێژوو دەمێنێتەوە، سەردەشت و ئازادی، وشەیەکی لێکدراوەن لە فەرهەنگ و کلتوری کوردستان، هەمیشە بە بەرزی دەمێنێتەوە، بۆیە دۆسیەیی سەردەشتەکان بە کراوەیی دەمێنێتەوە تاکوو ڕێگای ئازادیخوازان دەگەنە سزادانی تاوانباران و سەرانی بکوژانی دەنگە دلێرەکان.
5/5/2022